11
Jepthah Israel te Thutan Vaihom'a Ahungpan
1 Tun Gilead gam'a cheng Jepthah chu gal hattah anahi. Ama hi Gilead chapa ahin amavang anu chu numei noti anahi.
2 Gilead jinu chun chapa phabep ana neijin ahi, ama ho ahung khanlet phat un ama hon Jepthah chu agam uva kon'in ana nodoh un ahi. Ama hon Jepthah kom'ah, “Nangin ipau gou hi nachan thei louding ahi, ajeh chu nang hi numei chavai noti khat cha nahi bouve atiuvin ahi.
3 Hijeh chun Jepthah chu asopi hoa kon'in ana jamdoh in Tob gam'ah ana chengin ahi. Gangtah in aman anungjui ding loi phabep ahin nei paitan ahi.
4 Hiche phatlai hin, Ammon miten Israel te chungah gal ahin boltan ahi.
5 Ammon miten ahin nokhum phat uhin, Gilead lamkai ten Tob a um Jepthah hi akou tauvin ahi.
6 Hiche lamkai ho hin aseijun ahi, “Hungin lang keiho lamkaijin hung pangtan! Ammon mite toh kisatna ding ahin neihung panpi uvin!” atiuve.
7 Ahin Jepthah chun amaho kom'ah, “Nanghon nei vetda uva kapa in a konna neina nodoh u hilou ham? Tua hahsatna nanei phat uva hi ipi dinga kakom'a nahungu ham?” atin ahi.
8 Lamkaiho chun adonbutnun “Ajeh chu tua hi nangma ka ngaichat u ahitai, nangman Ammon mite toh kisattona a hi neihung lamkai uva ahileh keihon Gilead mite jouse chunga lamkaija kapan sah dingu ahi” atiuve.
9 Jepthah in lamkaiho kom'a chun hitin aseije, “Keima kahunga Pakaijin Ammon mite chunga chu gal eijosah a ahileh na lamkai uva nei pansah mong diu hinam?” ati.
10 Lamkai hon adonbut un, “Pakai chu ichung uva ahetoh in pangjing hen nangin nasei chan chu bol dinga kakitep u ahi” atiuve.
11 Hiti chun Jepthah chu Gilead lamkaiho toh akilhon khom tauvin ahi, chuleh Gilead mipite chun alamkai diuvin apansah tauvin chule gal lamkai jong ahisah tauve.
12 Hiche jou chun Jepthah in thupole ho Ammon lengpa kom'a asolin hitin aseije, “Ibola ka gamsunga hi galbol dinga nahung ham?” ati.
13 Ammon lengpan Jepthah thupole ho kom'ah hitin ahin sei uvin ahi, “Israel te Egypt a konna ahungu chun, ama hon kagam'u, Arnon vadunga kon'in Jabbok vadung gei chuleh Jordan chan geijin eilahpeh un ahi. Tun chamna nadei leh hiche ho chu neihin nungpeh tan,” ati.
14 Jepthah in thupole ho chu Ammon lengpa kom'a alesol kitnin aseije:
15 Hiche hi Jepthah in asei chu ahi, “Israel ten Moab ahin Ammon mite ahin agam'u kalahpeh pouve.
16 Israel mipite Egypt a konna ahung kitoldoh uva Twipi San ahung galkai jou uchun Kadesh ahunglhungun,
17 ama hon Edom lengpa kom'a agamsung ahin phalpeh pouvin ahi. Hiche jou chun Moab lengpa kom'a hiche tobang machun agah thumkit un ahileh agamsung ahopa ding chu ahin janom dehpon ahi. Hijeh chun Israel mipite chu Kadesh a akinga tauvin ahi.
18 Akhonna in Edom le Moab chu apellun gamthip noija akitol tauvin ahi. Ama hon Moab solam gamgi lang chu ajot un Arnon Vadung pang tenia chun ngahmun asem tauvin ahi. Ahinla ama hon Moab lutna dingin Arnon Vadung ahin pal galkai khapon ahi, ajeh chu Arnon chu Moab gamgi ahi.
19 Hiche jou chun Israel ten Heshbon a um Amor mi Sihon lengpa kom'ah ajotnau mun athum theina dingun agamsung hopana dinga phalna thumin thupole ho asolin ahi.
20 Ahinlah Sihon lengpan Israel ten agamsungu ahopa diu ana phal pon ahi. Aman asepai te agongtoh in Jahaz munah amaho chu ana kidoupin ahi.
21 Ahinlah Pakai Israel te Pathen chun amite chu Sihon lengpa chu ana josah tan ahi. Hijeh chun Israel ten kholang gamkaija um Amor mite gam jouse,
22 Arnon Vadunga konna Jabbok Vadung chuleh gamthip noi solanga konna Jordan chan gei chungah tha ana neijun ahi.
23 Hiti chun Pakai Israel Pathen’in Amor mite gam chu alahpeh a Israel te anapeh ahin hichu keihon iti dan a nangho kanungpeh kit diu ham?
24 Hijeh chun na pathen u Chemosh in napeuvin napeh uchu kikoi unlang keihon jong Pakai ka Pathen uvin eipeh u gam chu kakoiju ahi bouve.
25 Nangho Moab lengpa Zippor chapa Balak sanga phajo nahiuvam? Aman Israel te chunga gal anabol khah em?
26 Israel hi hiche gam'a hi kum 300 hung chenga ahitan, Heshbon leh avel'a achenna hou Aroer leh achennau gam jouse chule Arnon Vadung vel'a khopiho jouse hi ana chenphau ahitai. Phat hitih chanpi hi ipi dinga nahin nunglah louham?
27 Hijeh chun keiman nang chungah suhkhel kaneipoi, nangjoh in neihung nokhum jeh a hi kei chunga suhkhel nanei joh ahi, hijeh chun tuni hin ichung uva vaihom'a Pakaijin Israel ham ahilouleh Ammon mite joh themmoa ham ti hin phongdoh jenghen” ati.
28 Ahinlah Ammon lengpan Jepthah thuthot chu anahsah pon ahi.
Jepthah Kitepna
29 Hiche phat chun Pakai lhagao chu Jepthah chungah ahung pansa tan, hichun ama Gilead gam'a kon'in Manasseh chan gei chuleh Gilead sunga Mizpah chan gei agachonin Ammon mite kisatpi dingin sepai aga khom tan ahi.
30 Jepthah in Pakaiyah kihahselna khat ana neijin hitin ana seijin ahi, “Pakai nangman Ammon mite chunga hi galjona neipeh a ahileh,
31 Keima gal jouva kakile tengleh ka insunga konna hung potdoh a eihung kimutopi masa pen-pen chu nang kom'a pumgo thilto a dinga katodoh jeng ding ahi” ati.
32 Hiti chun Jepthah in asepai te alamkaijin Ammon mite chu akisatpin ahileh Pakaijin galjona anape tan ahi.
33 Aman Ammon mite chu Aroer apat Minnith kimvella gamho geijin ana jouvin khopi somni chu analan, Abel-keramim geijin ana suchip jengin ahi. Hiti hin Israel ten Ammon mite chu ana jouvin ahi.
34 Jepthah chu Mizpah a inmun'a ahung kile phat chun achanu chu lamna a kimang agingthei chaokol chu kibu pumin kipah tah in apa lamto dingin ahung potdoh in ahi. Aman chapa chanu dang aneipon amanu seh-seh chu anei ahi.
35 Aman achanu chu amu phatnin lungna tah in avonho abottel jengin, “Vo ka chanu!” atin apengjah jengin, “Nangin kalungthim nasuna lheh jengtai, nang hi ipi dinga ka lungthim suna a napan hitam? Ajeh chu keiman Pakai kom'a kihahselna khat kahin nei ahitan, hichea konna chu kaki nunghei theilou ding ahitai,” ati.
36 Hichun achanun aseitai, “Hepa nangin Pakai kom'a kihahselna nahin nei ahitah leh nahung kihahselna bang chun ka chungah tongdoh jengin, ajeh chu Pakaijin nagalmi Ammon mite chunga galjona loupitah chu napeh tah chula em.
37 Ahinlah thil khat vang nei bolsah ding kadeije, Keima nungah thenga thi ding kahitah jeh in lhani sungin kaloi kagol hotoh thinglhang gam'ah gavahle uvingting kakhang donlai pul hi gadou khom uvinge” ati.
38 Jepthah in, “Gache tan” atin lhani sunga dingin asoldoh tai. Hiti chun ama chu aloi agol chengtoh akhangdonlai pul doukhom dingin ache tauvin ahi.
39 Achanu chu a inna ahung kile phatnin apan achung changa akihahselna bang chun aboltan ahi. Hiti chun ama chu nungah thengin athitan ahi. Hiche Israel te chonna khatnin ahung umdoh tan ahi.
40 Israel khangdong nungah hon kumseh leh Jepthah chanu puldouna in nili aga potdoh jiuvin ahi.