10
Tola Israel te Thutan Vaihom'a Apan
1 Abimelech thijou hin Dodo chapa Puah chapa Tola hi Israel te huhdoh dingin ahung pangin ahi. Ama hi Issachar phungmi ahin, Ephraim thinglhang gamsunga um Shamir khopia cheng mi ahi.
2 Ama hi kum somni le thum sungin Israel te lah a thutan vaihom’in ana pangin ahi. Ama athi phatnin Shamir munnah ana kivuijin ahi.
Jair Israel te Thutan Vaihom'a Apan
3 Tola athijou hin Gilead a kon'in Jair in kum somni le ni sungin Israel te thutan vaihom in ana pange.
4 Chapa somthum aneijin, amaho chun sangan somthum ana mangcha uvin chuleh ama hin Gilead gamsung'ah khopi somthum ma ana neijun ahi, hiche ho chu tuni chan geijin Jair khopi ho akitin ahi.
5 Jair athi phatnin Kamon khopia ana vuijun ahi.
Ammon Miten Israel Mite Abol Genthei
6 Avellin Israel ten Pakai mitmun thilse jeng anabol kitnun ahi. Ama hon Baal le Ashtoreth milim doi semthu ana hou kitnun chule Aram, Sidon, Moab, Ammon chule Philistine te semthu pathen ana houvun ahi. Ama hon Pakai chu ana nuse uvin hou din jong ana gotapouvin ahi.
7 Hijeh chun Pakai chu Israel chungah nasatah in ana lunghang tan ahileh amaho chu Philistine te le Ammon mite khut ah ana pedoh tan ahi.
8 Hiche kum apat chun ana sugenthei lheh jengun ahi. Ama hon Gilead gamsunga um Amor mite gam solam gamkaija cheng Israel te jouse chungah kum som le get sungin ana sugentheijun ahi.
9 Ammon miten Jordan lhumlam ajong ahung galkaijun Judah, Benjamin chuleh Ephraim ho jong ahung bulu jiuvin ahi.
Hiti chun Israel te hin agenthei nau chu ana thohlel lheh jeng tauvin ahi.
10 Athohlel behseh phat un Pakai kom'ah panpi ngaichatna in ana kapjah jengun, “Pakai keiho nangma dounan kana chonse lheh jeng tauve, ajeh chu keihon ka Pathen'u nangma kana nuse uvin Baal doi semthu milimho kana hou tauve” atiuve.
11 Pakaijin ahin donbutnin, “Keiman nangho hi Egypt mite a kon, Amor mite a kon, Ammon kite a kon chule Phileistinete te a konna kana huhdoh nahilou uham?
12 Sidon mite Amalek mite leh Maon mite a konna jong kana huhdoh u hilou ham? Ama hon nabol genthei tengu leh panpi ngehna a nahung kajah jeng jiuva keiman kana huhdoh jiu hilou ham?
13 Ahiyeng vang'in nang hon Keima einuse jiuva semthu pathen dang ho joh nahou jiu hilou ham? Hijeh chun Keiman nangho huhdoh tapou vinge,
14 Cheuvin lang nang hon na deilhen joh u semthu pathen ho joh kom'ah gakap unlang na hahsat nauva kon hin kihuhdoh sah tauvin” atipeh joh tan ahi.
15 Ahinlah Israel te Pakai kom'a atao tei-tei jengun hitin aseijun ahi, “Pakai keiho kachonse tauve nangin nadei dan danin nei engbol tauvin ahinla ka galmi teuva kon'in tunin nei huhdoh tei-tei jun,” atiuve.
16 Hijou chun Israel ten gamdang semthu pathen ho chu apaimangun Pakai joh chu ahou tauve. Hichun Israel te gimna chu avet a ahileh Pakai jong alung ahimo lheh jeng tan ahi.
17 Hiche pettah chun Ammon sepai te galsat dingin akikhom uvin, Gilead gamsunga chun panmun akisem un ahi, chuleh Israel te jong akikhom khom uvin Mizpah mun'ah chun a panmun diu ana kisem un ahi.
18 Gilead lamkaiho chu khat le khat akihou som'un, “Koi hileh Ammon mite sat masa pen-pen chu Gilead mite chunga vaihom'in pang jeng hen” atiuvin ahi.