18
Dan Phung'a Limsemthu
1 Hiche phatlai hin Israel ten leng aneipon ahi. Chuleh Dan phung hin achen theina diu mun ana hol'un ahi. Ajeh chu Israel phungho chenna ding mun ana kihop laiyuva amaho chu ana kipehna mun a chu chenglut loulai ahiuve.
2 Hijeh chun Dan mite chun amaho phung lah a kon'in amaho chenlut theina ding mun vetohle dingin Zorah leh Eshtaol khopi hoa kon'in gal-hang mihat cheh nga ana lhengdoh un ahi.
Hiche gal-hat ho hi Ephraim thinglhang gam ahung lhun uhin Micah in'ah ahung lhung’un ajan geh tauvin ahi.
3 Micah in'a aum sung’u chun ama hon Levi mipa chu apaotho dan a kon chun ahedoh jengun hijeh chun acheuvin ama chu agadong tauvin, “Kon hilai mun’a hi na-na puilut a hichea hi ipi nabol ham? Chuleh ipi dinga hichea hi naum ham?” tin ana dong un ahi.
4 Aman Micah toh akinoptona chuleh Micah in athempua apansahna thu chu aseipeh tan ahi.
5 Hichun ama hon aseijun, “Ka kholjin nau hi lolhinna kanei diu hinam? Ahiloule lolhinna ka neilou diu ham? Pathen kom’ah neidoh peh un,” atiuve.
6 Thempupa chun adonbut in ajah uvah, “Lungmongin chetauvin, Pathen’in na kholjinna uva hin naching jing nauve,” ati.
7 Hiti chun mi nga ho chu Laish khopi langa acheuvin ahileh hichea mite chun hinkho nomtah amangun Sidon mite bangin lungmong tah le lung gimlou hel'in achengui ti amudoh tauvin ahi. Hiche mipi ho chu agam’u aphat jeh in ahao thei lheh jeng’un ahi. Chuleh amaho chu Sidon’a konna gamla tah in achengun avel uvah pankhompi thei jong anei pouvin ahi.
8 Amaho chu Zorah leh Eshtaol a akile phat uchun asopi houvin ana dongun, “Na thilmu hou itobang nam?” atin ana dong uve.
9 Ama hon adonbutnun ajah uvah, “Hungun amaho khu gakisatpiu hite keihon agam chu kagamu uvin, agam u chu apha lheh jenge. Ipi na nga nahlai diu ham? Gache a amun galo ding khu lungsa-ihna neihih hel’un,” ati tauve.
10 Nangho nache uva amun naga lhun tengu leh amipi te khu imacha lungkhamna anei pouve ti namudoh diu ahi. Pathen’in gam lentah le gam phatah imacha avat umlouhel mun khu eipeh u ahi!” atiuve.
11 Hijeh chun Dan phunga kon'in galsatna manchah kichoi cheh mi jagup Zorah leh Eshtaol’a kon'in ahung kipat doh un,
12 Judah gam Kiriath-jearim lhumlam munkhat ah panmun akisem’un ahi. Hiche mun hi Mahaneh-dan ti in tuni chan gei jin amin akisah tan ahi.
13 Hichea kon chun Ephraim thinglhang gam'a Micah in chu agalhung tauvin ahi.
14 Mi nga Laish vella gam gavetoh a cheho chun aloidang ho chu aseipeh un, “Hiche in hoa hin thempu ompho leh insung mite doi ho leh milim semthu chuleh thing’a kisema dangka a kitom doi jong uma ahi, hiche ho hi ilo ding natiuvem?” atiuve.
15 Hijeh chun mi nga ho chu lampia kon’in akiheidoh un Micah insunga chun alut un Levi gollhang pan khohsahna neitah in ana lamton ahi.
16 Dan phunga konna gal manchah kichoi mi jagup ho chu kelkot kom'a chun ading jingun ahi.
17 Gam vetoh a ana che mi nga ho chu doihouna munna chun alut un milim semthu, thempu ompho le insung doiho leh dangka a kitom doi chu akilah tauve. Hiche sung chun thempupa chu kelkot kom'a chun gal manchah choi mi jagup chutoh ading khom’un ahi.
18 Thempupa chun Micah doi koina maicham in a konna thil thengho ahinlah doh uchu amu phatnin, “Ipi nabol u hitam?” ahin tin ahi.
19 Ama hon “Thipbeh in keiho dingin mipa leh thempun hung pang tan, mikhat seh insunga thempu nahi sangin Israel phung khat thempu nahi ding chu phajo louham?” atiuve.
20 Hichun gollhang thempupa chu amaho toh kilhon ding chu atha anom lheh jengin ahi. Hiti chun aman thempu ompho ahin, insung doiho le milim doi kisem ho chu achoijin alah uvah apang tan ahi.
21 Amaho ahung kileheijun akholjin’u ajomkit tauvin ahi, hiti chun achapang teu, agancha hou leh athilkeu hou amasat sah un ahi.
22 Dan phung miho chu Micah inmun'a kon’a gamla tah agei phat’un Micah in aheng akomho chu ahin puijin ahin del tauvin ahi.
23 Ama hon ahin phah phat un, hiti hin ahin hoh un ahileh, Dan mite chu ahung kileheijun Micah kom’ah chun hiti hin ahin seijun ahi, “Ipi thu hitam? Ipi dinga amaho pihi nahin puija neihin del uham”? atiuve.
24 Micah in adonbutnin, “Ipi nabol nau ham? Ipi thu hitam? Ken kakisem ka pathen jouse nang hon nei lahpeh un, kathempu pa kisan nei puidoh peh tauvin! Tua hi nei chom thenghel'u hitalou ham?” ahin ti.
25 Dan miho chun hiti hin ahin donbut’un, “Kichih theijin mohpao pao hih in ajoleh hiche mite hi hung lunghang’un tin nang le na insung mite chu nathalo diu ahi” atiuve.
26 Hiti chun Dan mite chu akijot kit tauve. Micah chun amaho chu kisatpi ding angapchat louj eh in ahung kileheijin a inlam'a achetai.
27 Hiche jou chun Dan mite chun Micah doi ho leh athempupa chutoh Laish khopi chu aga lhung tauve. Ama hon achemjam’un asatchap jengun akhopi chu meijin ahallha tauve.
28 Koimacha amaho huhdoh ding chu anaum tapon ahi, ajeh chu amaho Sidon’a konna gamla tah a chenga ahiuvin koima kitho khompi ding anei pouvin ahi. Hiche thilsoh hi Beth-rehob phaicham kom ahi.
Dan phung mite chun khopi chu akisemphat un hilai mun a chun acheng tauve.
29 Ama hon hiche khopi chu apu apau Israel chapa min alosah un Dan asah tauve, ahin atil abulla chu Laish ana kitia ahi.
30 Hijou chun adoilim chu atungdoh un Mose cha Gershom chapa Jonathan chu thempun apansah tauve. Hiche Dan insung mite hi soh channa a alut tokah seuhin, amaho hi hiche mite thempun ana pan peh un ahi.
31 Hiti chun Pathen ponbuh chu Shiloh a aum laise chun Micah doi sem chu Dan miten ana hou jingun ahi.