3
1 Hapeko unamiliy para apahasani lohongai aro: Tehe hu lang nakiya hapwen, ara hu nopwaran mwomwan andre karayah.
2 Hu ndramat andre kanamili hu mbukenan, pe andre hu kanimanga singayai tahu, pe andre hu kapo ngalahu pe kasikiye hu, pe andre hu karaminmini hu ndramat, pe andre hu kapwasimiri Ngindrai, pe andre hu kanhilingi tamahu pe tinahu pwi, pe andre hu kanrawuloh pwi, pe andre hu konto haiyan pwi.
3 Pe hingorou para hu kanamili hu ndramat hayah ara andre kiya pwi, pe andre hu kantali mwomwan ta hu ndramat pwi, pe andre hu karasusut nongan, pe andre hu kannamiliy para hu kakaituwe namiliwahu pwi, pe andre hu kambusi mwomwan kiya kili hu ndramat, pe andre hu kannamili melit hiyan pwi.
4 Pe andre hu karatuni hu kowase hu, pe andre hu kapakarawani hu, pe andre hu kahambuh pe kanlohonge para kambusi melit pwi, pe andre hu kanamili melit para nombuwe hu pe andre hu kannamili Ngindrai pwi—
5 Pe andre kultuwaye hu andre kipwainganiy tehe ngara hu katotohun hapeko hu ngara kapa pwi kiya pwoke para totohun. Pwen hu ndramat tora, ara mbuna akasusuye sura hu.
6 Paratesah, mwalinga hu ndramat tora, ara yihu mepo ngara kasong kaya suwe hu pihin mepo pwokeya hu pwi, pe hu mepo pakut mwomwan ta hu ngara kiyki nopwaran kiya kili hu, pe hu ngara kambusi hu namiliwa nombuwe hu handra-handra ara ngara kiro mu tahu.
7 Pe yihu pihin ara, lang masih hu ngara kawiri hinonou, hapeko hukonho yirowe lohongai iman ndrokonan ta Ngindrai pwi.
8 Pwen tehe Yannes hilu Yampres ara hilu ngara kalowani nongna Mose, pe hu ndramat aro, ara humwisnani nongan ndrokonan. Pe yihu ara hu kamai mepo lohonga hu kinho kuw pwi, pe lohongahu ara pwassin, pe tunan ara lohongai ndrisiyon opu hu ara ngara kahambuwali hu.
9 Hapeko andre yihu koro mbusiy kiya pe andre hukanlahiy pwi, paratesah, lohonga hu ara tehe hilu kamai ara, pe hu kultuwaye hu ara andre kiro yelan kiya mara hu ndramat masih.
Nongna Pol iyahapwen para kipwokeyani Timoti
10 Hapeko Timoti, wou ara apahasani hu hinonou to masih, pe mipwan to, pe lohongo para mipwan to, pe lohongai ndrisiyon to, pe koro waison o, namiliwo, pe uro tine pwokeyan tapeh,
11 hu nopwaran uro kuni, hu ngandran—sehe melit irayah isa kili yo uro kol namandran hape Antiyok, Yikoniyum, pe Listra, hu nopwaran uya nondriyan pe uro tine pwokeyan. Hapeko melit masih aro, ara Yapan isopwat yo usa mawen aliy topwei.
12 Ndrokonan para aliy, ara hu masih mepo hu namili mipwan hiyan para taleh kili Kristus Yesu, ara andre hu kakuni nopwaran,
13 pe hu ndramat kultuwayihu pwassin pe hu ndramat para pwasoyou, ara kultuwayi hu andre kiya mwomwan pe kiya pwalngengei masih. Pe andre hu kapwasike hu ndramat hayah, pe hu ndramat ara andre kapwasike hu yi.
14 Hapeko wou, awaiyaniy para apwotisingi lohongam kiya nongan ndrokonan mepo anwiri hinonou kinyau aliy, pe ndriyam kinpwoke kinna aliy. Paratesah, apahasaniy tehe apwotisingi lohongam iya nongan ndrokonan mepo yihu kanhinuwani wou kinna aliy.
15 Pe apahasaniy tehe aro ndron tehe mbunah mendreheh, ara anpahasani hu Nongan Haiyan. Pe andre kilahiy para kimbusi wou arikai kiya lohongai waison para sopwat hiyan mepo andre kiyau lohongai ndrisiyon kili Kristus Yesu.
16 Pe hu Nongan Haiyan masih ara Ngindrai iyki taleh ita aliy, pe hiyan para kisopwat worou, pe para kihinuwani hu ndramira Ngindrai kiya nongan ndrokonan, pe para kipomate hu ndramat, pe para kimwaniyani hu ndramat, pe para kihinuwani hu para hu kambusi kultuw imwonen.
17 Pwen pe hu ndramat para poya mbulya Ngindrai, ara andre hu karahatini hu pe kambusi mbulen masih hiyan.