2
Pol ipwahanou paiwe yi
1 Pe noru, wou ara aro tine pwokeyan kiya pahas mepo ita kili Kristus Yesu.
2 Pe hu melit mepo anhilingiy kunpohowei iro mbulmara hu ndramat soyon, ara aikiy kiya kili hu mepo hupwotisingi lohongahu pe hulahiy para hu kaponokulaniy pe hu kambulyaniy. Pe yihu andre kalahiy para kahinuwani hu hayah kiya aliy yi.
3 Pe aro tehe ndram hamou para pahun hiyan ta Kristus Yesu, pe akuni nopwaran tehe urupo kuniy.
4 Pe ndramat hamou kapa kirayah ndram hamou, ara kinho mbusi handra mbulen o mwaihei mepo mbulya ndram pwi, ara pwi, hapeko andre kinohonou para kimbusi namandran tan para kipwes.
5 Pe tehen aliy i, kapa ndramat hamou mepo ngara kingap kiya ngapilai, ara andre kinwiri kenen pwi, kipoo kiro ndruwa pwahanou masih para ngapilai.
6 Pe ndramat mepo ngara kipo mbulen pwokeyan para piyang, pe kipwokeraniy, ara yiy ngara kipo anandrinai tan kimu.
7 Wou alohongani tesah urupo pwai, paratesah, Yapan andre kiyki lohongai ileu kisa kili wou kili hu melit aro.
8 Pe alohonganiy tehe Ngindrai ara kinhingini Yesu Kristus kintine kimat, pe yiy ara iyau ndraye Tepit. Iye ara nongan hiyan ato mepo ngara kupohowei.
9 Paratesah, tunan nongan hiyan opu, pwen huwasi yo pe urupo kuni nopwaran tehe ndramat hamou para tandroindroi ipoo uya nondriya kou. Hapeko nongna Ngindrai, ara kinto kou pwi.
10 Pe hu nopwaran handra-handra uya nondriyan, ara uwiri pwoke iyau aliy, paratesah, para hiyan ta hu ndramat mepo Ngindrai kintakinimahu tehe hu atan. Pe yihu yi, ara andre kapwotisingi lohongahu pe kawiri sopwat hiyan kiya kili Kristus Yesu, kiyapolo nganngana pwoke tan, mepo andre kinto-kinto kiya kili hu.
11 Pe nongan ndrokonan ara iye:
“Kapa worou kamat sura yiy,
ara andre tukoro mwalen sura yiy i;
12 Pe kapa tukoro tine pwokeyan pe kakuni nopwaran kiya ngalan,
ara andre tukoho mu kiyasura yiy tehe hu king.
Pe kapa tukakowu tan,
ara andre kikowu torou i.
13 Pe kapa tukatali lohongai ndrisiyon torou,
yiy andre kimbusi tesah ipwai,
paratesah, kinhopa pwi kinna tesah irandrangan iya aliy, ara pwi.
Nongan iya kili hu ndramat para hinuwani nongan pwasoyou
14 Pe aro waiyaniy para arakelehani lohongahu kiya hu melit masih aro kiya kili hu ndramat. Pe apwandrandrahani hu kiro mbulmara Ngindrai para hu mbuna karakokowai o mwaihei kiya hu nongan, hu nongan mepo hiyan kinyau aliy pwi, mepo andre kipwalngani hu ko mepo andre hu kahalingiy.
15 Apombulen pwokeyan para aluwi lohonga Ngindrai tehe andre kinamili mbulyam, pe ambusi mbulen tehe ndramat para poya mbulen mepo kinho masi kinna mbulyan pwi, pe alahiy para aponokulani nongan ndrokonan hiyan o.
16 Pe aro mawen nongan omwaihei pe nongan pwasesemit, paratesah, yihu mepo ngara kambusi nongan tehen tora, ara andre kiluwani hu ndramat kaya mawen kili Ngindrai.
17 Pe hu ndramat soyon andre hu kahilingi nongna hu, pwen nongna hu ara, ara andre kipwalngani hu tehe neken mepo kinlahiy para kihiwin pwi. Pe hilu ndramat hilu ngara kahinuwani nongan aro, ara Himenayus hilu Piletus.
18 Pe hilu ndramat malmou ara, ara hilu kantali nongan ndrokonan. Pe hilupa worou kansa tine kimat pwen. Pe nongna hilu, ara ipwalngani lohongai ndrisiyon ta hu ndramat hayah.
19 Hapeko pahut mepo Ngindrai isoyei, ara pwokeyan, pe nongan iye ara kantatuluwiy ita ndritan: “Yapan ipahasani hu mepo hu atan,” pe “Hu masih mepo hu ngara kapohopoh kiya ngala Yapan, ara hu kasa mawen kultuw pwassin tahu.”
20 Pe nondriya seu hawum namandran, ara pwelekei masih handra-handra hutora aliy, hayah mbusiy iyau pat kolt, pe hayah iyau pat siliwa, hapeko hayah i, ara mbusiy iyau kei pe hayah mbusiy iyau pwan nakak. Pe hayah tahu ara mambulyahu hiyan, para hu lang namandran, pe hayah tahu, ara para mbulen o mwaihei.
21 Yihu mepo hu mbusi hu mbukenan hurayah howen pe huro mawen hu melit mwomwan, ara andre hukarayah tehe pwelekei hiyan mepo hu ndramat andre kawiriy pe hu kapombulen kiya aliy. Pe andre hukarayah haiyan, pe andre hu karayah ndramat para pombulen, ta Namandran tahu, pe andre kimwaniyani hu para kipo hu mbulen hiyan kiyau kili hu.
22 Pe aro mawen hu kultuw pwassin tahu wihou, pe apwokeyani wou pe aho ndruwa kultuw imwonen, pe lohongai ndrisiyon, pe namiliwai, pe ndriya wayis, pe aro sura hu mepo ndriya hu imwonen pe hu ngara kaiyoh kiya kili Yapan kiyapolo ndriyai imwonen.
23 Pe mbuna aiki ndraingam kiya nongan pwasosohou pe nongan mwomwan para hingas, paratesah, apahasaniy tehe andre kiyahapwen para aliy, ara takokowai o.
24 Pe ndramat para poya mbulya Yapan, ara mbuna kirakokowai, hapeko kipo hiyan kiya kili hu ndramat masih, pe kilahiy para kihinuwani nongna Ngindrai, pe kiwayis o kapa hu ndramat kambusi mwomwan kiya kili yiy.
25 Pe apwahanou hu nokulaniy hu mepo hu lowani nongan ndrokonan, ara kiwong kileu kiya kili hu kiyapolo kultuw waison. Kapa kimbusiy tora, pwen matisan Ngindrai kimbusiy kiya waison kiya kili hu, pe hu karapaiwani ndriyahu kiya lohongai iman para nongan ndrokonan.
26 Pe andre lohongahu kimui pe hu kawop kasa mawen kam ta Sinai, yiy mepo kiniyki hu tora kou para hu kambusi namiliwan pwokeyan.