Nongan luhin Pol iratuluwiy iya kili
Timoti
Nongan imu
Timoti ara ngara susuye pe kipo mbulen kiyasura Pol, pwen tehe tora ko, Pol iratuluwi nongan iye iya kili Timoti para kipwainganiy kiyatan kiya hu kultuw hiyan para kiro ndruwan. Pe Timoti ara mbuna kikose kiya lohongai ndrisiyon tan mbukenan, pe mbuna kitali kultuw para pohoweya nongan hiyan ata Yesu Kristus. Pe yiy ara kiro ndruwa topwe nongna masih ata Ngindrai. Pe konan yihu ndramat kaiki ngandran pe nopwaran kiya kili yiy, hapeko kipwoke kiya mbulen mepo Ngindrai kiniykiy kinna kili yiy.
Pe Timoti mbuna kiyki ndraingan kiya hu nongan para pwakekeriu ta hu ndramat mepo lohongai hiyan kinto kili hu pwi. Hu nongan tehen tora, ara ngara kipwalngani hu ndramat mepo huhilingiy. Pe hiyan para aliy ara, ara Timoti kilohonganiy kiya hiyan hu kultuw ata Pol mbukenan, pe kiho ndruwan. Pe hu kultuw, ara, ara para kapwokeyani lohongai ndrisiyon, pe para ndriya wayis, pe para kanamiliy tisingi hu ndramat hayah, pe para kakuni hu nopwaran handra-handra.
1
1 Yo Pol, aposel hamou ta Kristus Yesu, iyau namiliwai pwokeyan ta Ngindrai, yiy Ngindrai kintandranga taleh kinsa kiltou mepo ita kili Kristus Yesu.
2 Pe nongan iye isa kili wou Timoti, wou mepo noru kamai mepo nere imwonen: Pahas, ndriya wayis, pe koisirai ta Ngindrai Tamarou pe Kristus Yesu Yapan torou.
Nongan para rawuloh
3 Pe urawuloh iya kili Ngindrai mepo urupo pombulyan tehe tumbuhu hu ngara kambusiy, pe lohongo ara ileu. Ping pe lang masih ngara kulohongani wou pe kutohun satam.
4 Pe ulohongani ndruimaram, pe kunuwe imun tam para kusa nime wou, pwen pe andre kupep kiya pwesai.
5 Pe ulohongani lohongai ndrisiyon hiyan atam, mepo mamu aro kili tuhum NaLoyis, pe aro kili tinam NaYunis, pwen upahasaniy ndrokonan tehe mahapo, ara ita kili wou i.
Nongan para aro hiyan kiya kili Pol pe nongan hiyan
6 Pwen tunan aro ko, upwai para alohonganiy tehe yukyuk mepo Ngindrai kiniykiy kinsa kili wou iro mwonen uiki nimo isa ndrita payam, ara aponokulaniy hiyan pe kimandra.
7 Paratesah, Ngindrai iyki Mwoiwan Haiyan isa kili tou, ara para kinmbusi worou kanoh pwi, hapeko para kiyki pwoke kisa kiltou, pe kiyki kultuw para namiliwai, pe andre kimbusiy pe worou kaponokulani tou.
8 Pwen mbuna amasi kiya titiye ta Yapan torou, ndre titiye to tehe ndramiran urupo kou, hapeko awiri pwoke kili Ngindrai pe akuni nopwaran kiya nongan hiyan.
9 Pe Ngindrai kinsopwat tou pe kiniyoh worou iya taleh sih haiyan—pe kiniyoh worou iya sehe melit hiyan worou kanmbusiy, ara pwi, hapeko iya namiliwan pe pahas tan mbukenan. Pe pahas iye ara Ngindrai kiniyki pwen mapu lang kintayah kinsa kiltou iyau kili Kristus Yesu.
10 Hapeko mahapo pahas ara, ara kinsa rayah ngawan kili Ndramat Hiyan para Sopwat torou, Kristus Yesu, yiy mepo kinpwalngani kimat pe kiniyki taleh mepo andre kinto-kinto isa ngawan iyau nongan hiyan mangannganan.
11 Pe iya nongan hiyan iye ko, Ngindrai irakinimo para kurayah ndramat para pohoweya nongna Ngindrai, pe urayah aposel hamou, pe urayah ndramat hamou para hinuwani nongan.
12 Pwen tunan aro ko, pwen urupo kuni nopwaran. Hapeko kunmasi kinna aliy pwi, paratesah, upahasaniy yiy mepo upwotisingi lohongo iya kili yiy, pe upahasaniy tehe andre kipwokere tesah iykiy isa kili yo, kipoo kiya matne lenge Kristus kimui.
13 Pe tesah anhilingiy kinyau kili yo mepo uhinuwani wou iya aliy, ara apwahatiniy, pwen kirayah tehe hinonou para aro ndruwan. Pe apwotisingi lohongai ndrisiyon tam pe kultuw para namiliwai kiya kili Kristus Yesu.
14 Pe apwokarani tesah hiyan mepo Ngindrai kiniykiy kinsa kili wou—apwokaraniy kiyapolo sopwat ta Mwoiwan Haiyan mepo iripo kiltou.
Kultuw para koro hiyan pe konto hiyan pwi para kawiri hinonou kiyau aliy
15 Pe apahasaniy tehe hu masih para kol namandran iya Esiya, ara hu kantali yo, pe Pikelus hilu Hermokenes tehen aliy i.
16 Pe utohun tehe Yapan andre kipwaingani koisirai tan kiya kili hu ndrai sih ta Onesiporus, paratesah, ngara kimbusi yo kupwes, pe kinho masi tehe urupo kou, ara pwi.
17 Hapeko iro mwonen yiy iro kol Rom, ara iro ten yo iya masih kene, ipoo isa kahi yo.
18 Pe utohun tehe Yapan andre kiyki koisirai tan kiya kili yiy kiro mwonen Lengen. Pe wou, ara apahasaniy hiyan iya, iya hu melit mepo isopwat yo iya aliy tandrohongan uro kol Epesus.