6
1 Pe hu ndramat mepo hu pwotisingi lohongahu pe hutora pahandra pwandrendres, ara hu kahaiyani hu namandran tahu iya melit masih. Pwen pe andre kipenani hu ndramat para andre hu kanpwasisiman kiya ngala Ngindrai, pe hinonou towu pwi.
2 Pe yihu ndramat para pwandrendres mepo hu namandran tahu hu pwotisingi lohongahu, ara hu kahaiyani hu, paratesah, hu mbuna kanime hu tehe hu ndramat hu pwotisingi lohonga hu ko. Pe yihu kapo mbulya hu kiya pwokeyan, paratesah, hu namandran ta hu, ara hu nere hu imwonen tehe hu hapat o mepo hu pwotisingi lohonga hu.
Hu ndramat para hinuwani nongan pwasoyou pe namili singayai
Pe hu ngara kanimnim kiya mipwan hiyan ta hu ndramat para pwandrendres ta hu.
3 Pe kapa ndramat hamou kihinuwani lohongai handra yi, pe kinpwes kinna hinonou imwonen pe ndrokonan mepo ta Yapan torou Yesu Kristus,
4 ara hu ndramat tora, ara hu ngara kahari ngalahu mbukenan, pe lohongahu kinileu kinna melit handra pwi. Hu ndramat tehen tora, ara lohongahu ngara kimwa pe ngara hu karakokowai kiya lohongai mepo melit hiyan kinyau aliy pwi, pe kihipwen para aliy, ara andre kiluwani hu kiya takokowai mwalingahu. Pe ngara kiyki maimai, pe ngara kirasumbuwani hu, pe ngara hu kapipiye nongan mwomwan pe ngara hu kalohonge mwomwan.
5 Pe lohongahu ara imeu pe ipep iya takokowai, pe nongan ndrokonan, ara hu kowu. Hu ndramat tehen toro, ara hupa andre kultuw para koro mwonen kili Ngindrai, ara andre hu kapo hiyan kiya singayai kiyau aliy.
6 Hapeko koro ndruwa kultuw imwonen, ara andre kimbusi menmenarou kiya soyon, kapa worou kapwes kiya tesah iripo kili tou.
7 Paratesah, iro mwonen tinarou imwalahiy isa torou, ara worou kanwiri hapesah isa sura tou kol pwan pwi, pe kapa worou kamat, ara andre worou kanwiri handra melit kiyapolo rou pwi.
8 Pwen kapa ma anandrinarou pe makoiwerou, pwen hu melit aro ara ilahi rou.
9 Pe hu ndramat mepo hu namiliy para menmena hu kiya soyon, ara huyos huya nondriya nohonou pe melit soyon mepo hiyan pwi, pe irayah tehe kam ikami hu. Pe namiliwai para kultuw para nombuwe ndramat, ara imbusi lohonga hu imwa, pe iluwani hu iya melit pwalngengei.
10 Paratesah, hu ndramat hu namili singayai iya pwokeyan, ara hu mbusi hu kultuw mwomwan handra-handra para hu kapo singayai kiyau aliy. Hu ndramat hayah ara hu namili singayai iya pwokeyan, pwen hu tali lohongai ndrisiyon tahu, pe imbusi hu mbukena hu huya nondriya ngandran soyon.
Nongan iyahapwen iya kili Timoti
11 Hapeko wou Timoti ndramira Ngindrai, ara aro mawen hu melit masih aro, pe aro ndruwa kultuw imwonen, pe kultuw hiyan masih, pe kultuw para lohongai ndrisiyon, pe kultuw para ndriyam kimbulihi ndramat, pe kultuw para koro tine pwokeyan, pe kultuw para weleso, pe kultuw para koro wayis o.
12 Pe apopahun kiya pahun hiyan para lohongai ndrisiyon. Pe apwahatini taleh mepo andre kinto-kinto, mepo Ngindrai kiniyoh wou iyaliy iro mwonen awong ngawan iya lohongam ndrisiyon iro mbulmara hu ndramat soyon mepo hu pwokeyani nongnam.
13 Pe upwandrandrahani wou para arandrangan kiya mbulmara Ngindrai mepo iyki taleh iya melit masih, pe iya mbulmara Kristus Yesu mepo itiyani titiye tan, pe ipohopoh hiyan iya lohongai ndrisiyon tan iro mbulmara Pontus Pailat,
14 pe aho ndruwa pwahanou iye pe aiki wou masih kiya kili hu masih mepo kanpwai kinsa kili wou, pe aho ndruwan kipoo Yapan torou Yesu Kristus kimui.
15 Pe Ngindrai andre kimbusiy kirahihini lengen imwonen—pe yiy ara Ngindrai mepo lomwes ita kili yiy, pe yiy opu ara yiy Namandran ita Mu, mepo yiy King tahu king masih pe yiy Yapan tahu yapan masih,
16 pe yiy opu kinho mat pwi, pe ngannganan ara kinlahi hamou kiya aliy pwi, pe hamou kinnime yiy mapu, pe kinlahiy para kinime yiy pwi. Pwen worou karanuhuyani yiy, pe pwoke ara atan lang masih. Ndrokonan.
17 Pe apwandrandrahani hu para hu mbuna kasikiye hu, ndre hu kaiki lohongahu kiya menmenahu soyon para kol pwan, hapeko hu kaiki lohongahu kiya kili Ngindrai kiya melit hiyan mepo itapo isa. Yiy mepo iyki melit ipopo ko isa kili worou, iyapolo hu melit masih mepo andre kiyki pwesai kisa kiltou.
18 Pe apwandrandrahani hu para hu kambusi kultuw hiyan, para andre hu kultuw hiyan kihon kiro kili hu. Pe hu ndramat menmenahu soyon, ara apwai kiyata hu para hu katainge menmena hu kipopo ko.
19 Pe iyau sai aro ko, andre hu karato melit hiyan tahu mbukenan mepo andre kirandroiyi mipwan ta hu hiyan kiro lang itapo isa, pwen andre hukawiri taleh mepo taleh ndrokonan.
20 Pwen Timoti aponokulani tesah mepo Ngindrai kiniykiy kinsa kili wou para apwokeraniy. Pe asa mawen hu nongan mepo kinyau kili Ngindrai pwi, pe hu nongan pwasoyou para pepet mepo pohowei lohongai iman.
21 Pe lohongai iman ara, ara imbusi hu ndramat hayah hupa hiyan pe hu kantali lohongai ndrisiyon tahu.
Pe pahas ta Ngindrai kiro sura wawu masih.