5
Nongna hu pihinau, hu pohon, pe hu ndramat para pwandrendres
1 Hapeko mbuna apomate parangoloh hamou, pe awong nokule ko kiya kili yiy pe aranuhuyani yiy tehe, yiy tamam. Pe aponokulani hu wihou tehe nalim hu,
2 pe aponokulani hu pihi parangoloh tehe tinam hu, pe aponokulani hu pihindrahin tehe pisum hu, kiyapolo kultuw howen.
3 Pe aranuhuyani hu pihinau mepo yihu ndroisiy masih.
4 Hapeko kapa pihinau hamou manorun hu ndre mamangambun hu, ara norunhu pe mangambun hu ara yihu kapwainganiy tehe hu pwotisingi lohongahu iya kili Ngindrai. Pe hu kapwokere pihinau ara tehe hu ndrai sih tahu imwonen. Iya sai aro, hu lahiy kaposoiwi hiyan ta tamahu pe tinahu ndre tumbuhu, iya pwokere hu mbusiy iya kili hu, paratesah, kultuw iye, ara iyki pwesai iya kili Ngindrai.
5 Pe pihinau mepo indroisiy masih, pe yiy hamou o imin, ara ngara kiyki lohongan masih kiya melit hiyan itapo isa ita kili Ngindrai, pe ping pe lang masih ngara kiwaiyaniy para kitohun pe kisok Ngindrai para kisopwat yiy.
6 Hapeko pihinau mepo ngara kipwesani melit para nombuwen, konan kiye ndron mwalen, hapeko yiy meren.
7 Apwahanou hu ndramat kiya hu nongan iye, pwen andre hu kantasusut nongan kinsa kili wou pwi.
8 Hapeko ndramat mepo kinho pwokere yowen hu pwi, hu mepo hu ndrai sih tan imwonen, ara kinkowu lohongai ndrisiyon tan, pe kultuwayin ara iya pwalngengei masih ta ndramat hamou mepo kinpwotisingi lohongan pwi.
9 Pihinau mepo nambuyun hamou o, pe kapa hayou tan kiramwaitini manongui, ara karatuluwi ngalan kiyasura ndromwoya hu pihinau.
10 Pe yiy ara tiyeyan hiyan pe kultuwayin hiyan, pe ngara kipwokere norun hu, pe kipwokere hu ndramat, pe ngara kisingani ndrika hu yau ta Yapan, pe kisopwat hu mepo hu kuni nopwaran, pe ngara kiyki yiy mbukenan kiya hu mbulen masih hiyan handra-handra.
11 Pe hu pihinau mepo hu pihindrahin, ara mbuna karatuluwi ngala hu kiya pwan ndromweya hu pihinau ara, paratesah, matisan namiliwai para nombuwe hu kiya mu kiya namiliwahu iya mbulya Kristus, pe hu kanamiliy para hu kayesou i.
12 Pe andre hu kaiki nopwaran kimui kiya kili hu mbukenan, paratesah, tesah hu tandrangan imu iya aliy, ara hu konto ndruwan pwi.
13 Pe kultuwaye hu para ndrinamat ara soyon, pe hu ngara karikai payumwa wum hawum-hawum. Pe ndrinamerehu kinho mat o pwi, hapeko hu mbukenan hu konhopo mbulyahu pwi, pe hu ngara kanamiliy para hu kapwahalte, pe hu melit mepo kinlahiy para hu kawong kinna aliy pwi, ara ngara hu kawong kiya aliy.
14 Pwen pe upwahanou hu pihinau mepo hu pihindrahin, ara hiyan para hu kayesou, pe hu kapo noruhu, pe hu kaponokule suwehu, pwen andre hu mepo hu mwisnani rou, ara andre hu kanrasusut nongan anto pwi.
15 Pe hayah tahu ara hu kansongsin pe hutora ndruwa Sinai.
16 Pe kapa pihin hamou mepo ipwotisingi lohongan pe ita pwokere hu pihinau, ara kiro sopwat hu manau, pwen andre kiniyki nopwaran kinna kili hu ndramat huro rokum pwi. Pe hu mepo huro rokum ara andre kiro sopwat hu pihinau mepo yihu ndroisiy masih.
17 Pe hu pohon tahu ndramat huro rokum mepo huye mu iya mbulya hu ndramat huro rokum, ara kahaiyani hu kiya hiyan, hu mepo mbulyahu ara para hu kahinuwani nongan pe para kapohowe nongan.
18 Paratesah, Nongan Haiyan ipa, “Mbuna akawasi poho mbulmwakau hamou para akakaituwe yiy para mbuna kiyan wit kiro mwonen kiro rapele pwisi wit.” Pe, “Hu ndramat hu pombulen, ara andre kaiki kene hu.”
19 Pe mbuna akahilingi nongan para tasusut iya kili pohon hamou mepo kinmbusi pakut mwomwan pwi, kipoo ndramat malmou ndre matimou hu kapwokeyani nongan.
20 Hapeko yihu pohon mepo hukoro mbusi pakut mwomwan, ara wawu kapwomate hu kiro marahu ndramat, pwen andre kirayah pwahanou kiya kili hu pohon hayah pe hu kanoh.
21 Pe iya mbulmara Ngindrai pe Kristus Yesu, pe yihu angelou mepo rakinima hu para andre hu kapwokeyani nongan, pe upwandrandrahani wawu para akoho ndruwa nongan kunpwahanou wawu kinna aliy, pe mbuna akandrihisaniy, pe mbuna akambusi kultuw para hire.
22 Pe mbuna ahambuh para aiki nimam kiya ndrita paya hu ndramat para arakinima hu para hu kambusi mbulya Ngindrai. Matisan pakut mwomwan tahu ndramat hayah kisa kili wou. Pwen ahaiyani wou mbukenam aro howen kiya mara Ngindrai.
23 Pe aitohai kuimwa ndran opu pe ayin wayin hape para kisopwat ndriyam mepo ata mwa iya aliy, paratesah, ata mwa lang masih.
24 Pe hu ndramat hayah ara hu mbusi pakut mwomwan kiro yelan o pe hu wiri kora hu, hapeko pakut mwomwan tahu hayah, ara iyamulan isarayah ngawan.
25 Pwen tehen tora ko, kultuw hiyan ara ngara kanimei ngawan o, pe kultuw hiyan mepo kinho rayah ngawan pwi, ara andre kinto kohon o pwi yi.