1 Pe Mwoiwan Haiyan iwong ngawan tehe nondriya hu lang kamulan, hu ndramat hayah andre katali lohongai ndrisiyon tahu, pe hu koho ndruwa hu mwomwoyou para pwasoyou, pe hu hinonou ta hu payit. 2 Hu hinonou tora, ara iyau kili hu ndramat para pwandrandraman pe ndrokotina pwasoyou, mepo lohongahu kinmat pwen tehe kantimwiy iya hayen sih ngandrahan. 3 Hu ngara kapa pwi para hu ndramat kayesou, pe ngara hu kapwai para hu ndramat, kahatohai para mbuna hu kayan anandrinai hayah. Hapeko hu anandrinai mepo Ngindrai imangsaniy hu, ara anna hu mepo hu pwotisingi lohongahu, pe hu mepo hu pahasani nongan ndrokonan, para hu karawuloh pe hu katohun pe hu kayan. 4 Paratesah, melit masih Ngindrai imangsani hu, ara hiyan, pe wawu mbuna kapa pwi kapa kanrawuloh pwen kinna kili Yapan para kayan. 5 Paratesah, kantohun kina aliy, pe kanmbusiy kinna haiyan kinna nongna Ngindrai.

6 Pe kapa apwaingani hu melit aro kiya kili nalim pe pisum hu, ara andre arayah ndramat hiyan para poya mbulya Kristus Yesu. Pe mwoiwa hu andre kiwiri pwoke kiya hu nongan ndrokonan para lohongai ndrisiyon, pe para hinonou hiyan mepo wawu topo ndruwan. 7 Hapeko akoro mawen hu hinonou mepo ndrokonan pwi, pe hu titiye mepo hiyan pwi, mepo andre kimbusi wawu pe kinsopwat para hu ndramat kahaiyani Ngindrai pwi. Pe akanohonou wawu mbukenan para koro ndruwa hu kultuw mepo Ngindrai inamiliy. 8 Paratesah, hinonou para nombuwe ndramat ara hiyan iya sai hayah, hapeko hiyan masih kapa kultuwayi ndramat hamou kiho ndruwa kultuw mepo Ngindrai inamiliy para koro mbusiy. Paratesah, kultuw aro, ara andre kisopwat ndramat kiya mipwan tan para mahapo pe mipwan tan para kamulan.

9 Nongan iye ara nongan ndrokonan, pe ilahi hu ndramat masih kawiriy pe hu kapwotisingi lohongahu kiya aliy. 10 Pwen tunan ara ko, yowu topo mbungas para kambusi mbulen pwokeyan, paratesah, yowu pwotisingi lohonga yowu iya melit itapo isa ita kili Ngindrai mwalen, mepo yiy Ngindrai Yiy mepo Sopwat hiyan tahu ndramat masih. Pe ngara kisopwat hu mepo hupwotisingi lohongahu iya kili yiy.

11 Pe apwandrandrahani hu pe ahinuwani hu kiya hu nongan. 12 Pe mbuna hamou kinime wou tehe ngalam pwi, paratesah, wou ara wihou, hapeko kultuwayim hiyan, ara kirayah tehe kultuw hu ndramat hu pwotisingi lohongahu andre kanimei, pe hu koro ndruwan. Pe nongnam ara kiro mwonen, pe kultuwayim ara kiro hiyan o, pe aro nondriya kultuw para namiliwai, pe aro nondriya lohongai ndrisiyon, pe aro howen kiya mbulmara Ngindrai. 13 Kipoo kusa, pe aiki wou masih para aro pohowe Nongan Haiyan, kiya mbulmara hu ndramat, pe ahinuwani hu pe apohowe nongna Ngindrai. 14 Pe mbuna akose para ambusi yukyuk mepo Ngindrai kiniykiy kinsa kili wou para ambusiy, mepo iyau nongan para poropet pe isa kili wou iro mwonen hu namandran husa rokum pe huiki nimahu isa payam pe hutohun isatam iya aliy.

15 Pe ambusi hu melit masih aro nokulaniy, pe aiki wou masih kiya hu mbulen ara pe ambulyani, pwen andre hu ndramat masih kanime kultuwayim tapeh. 16 Pe aponokulani mipwan tam, pe nongna Ngindrai mepo ata hinuwani hu ndramat iya aliy, ara kiro mwonen o kiya kili hu mepo hu hilingiy. Paratesah, kapa ambusiy tehen tora, ara andre Ngindrai kisopwat wou mbukenam, pe yihu mepo huhilingi nongnam i.