3
Pwahanou iya kili hu ndramat para pwokereyahu ndramat pe hu pohon mepo husarokum
1 Nongan iye ara nongan ndrokonan: Kapa ndramat hamou inamiliy para kirayah ndramat para pwokereya hu ndramat hurokum, pwen tesah inamiliy, ara melit mwayih iya para kimbusiy.
2 Pe ndramat para pwokereya hu ndramat hurokum, ara mwomwan mbuna kiro kili yiy, pe kikuw kiro sura nambuyun, pe lohongan kileu, pe nondriya hu nopwaran masih, ara kiwayis o kiro, pe hu ndramat andre kahaiyani yiy, pe kipo hiyan kiya kili hu ndramat, pe kirayah ndramat hiyan para kihinuwani nongna Ngindrai.
3 Pe mbuna kirayah ndramat para kuimwa ndran tunguyan, pe mbuna kirayah ndramat para tahatai hapeko kiwayis o, pe mbuna kitakokowai, pe mbuna kirayah ndramat hamou para namili singayai.
4 Pe kiluwani hu ndrai sih tan mbukenan para hukoro mwonen, pe kihinuwani norun hu para hu kahaiyani yiy hiyan, pe hu kahalingi yiy, pe hu koro ndruwa nongnan.
5 Pe kapa ndramat hamou kinlahiy para kiluwani hu ndrai sih tan mbukenan pwi, pwen andre kipwokere hu ndramira Ngindrai hurokum tapeh?
6 Pe mbuna kirayah pohon hamou kapa kirapaiwani ndriyan mahapo ko, matisan kisikiye yiy pe Ngindrai kiyki koran kiya harong o tehe Ngindrai iyki kora Sinai iro mwonen isikiye yiy.
7 Pe kultuwayin kiya kili hu ndramat hu kanpwotisingi lohongahu pwi, ara kiro mwonen, pwen andre hu kapahasaniy tehe yiy ndramat hiyan. Pe andre hu ndramat kaniyki masirai kinna kili yiy pwi, pe andre kinyos kinna kam ta Sinai pwi.
8 Pe tehen tora ko, hu ndramat para sopwat hu ndramat hurokum, ara hu karayah hu ndramat mepo hu ndramat kahaiyani hu, pe melit hu kambusiy ara kimwonen, pe mbuna hu koro yin wayin pe kirayah kultuwayi hu para hu koro yin ndran tunguyan o, pe mbuna hu koro pwasike hu ndramat pe hukoro wiri singayai tahu.
9 Pe hu kapwahatini hu nongan ndrokonan kokohe para lohongai ndrisiyon kiyapolo lohongai ileu.
10 Pe kanohonou hu kimu, pe kapa mwomwan kinto kili hu pwi, pwen hu karayah hu ndramat para sopwat hu ndramat mepo hurokum.
11 Pwen tehen tora ko, hu pihin tahu yi, kultuwayi hu ara kimbusi hu ndramat hu kahaiyani hu, pe hu mbuna koro pwahalte, hapeko hu kaponokulani nongna hu pe lohongahu kileu. Pe melit masih hukambusiy ara hukapwotisingi lohongahu.
12 Pe ndramat para sopwat hu ndramat husa rokum, ara kikuw kiro sura nambuyun hamou opu, pe kipwokere norunhu pe yowen hu hiyan.
13 Hu ndramat para sopwat ndramat husa rokum mepo hu pombulen hiyan masih, ara hu ndramat andre kahaiyani hu hiyan. Pe andre hukoro tine pwokeyan pe hu kawong kiya lohongai ndrisiyon tahu mepo iya kili Kristus Yesu.
Ndroiyi hu pwahanou ta Pol
14 Yo ulohonganiy para kusa nime wou kileh, hapeko uratuluwi pwahanou iye ara,
15 kapa kunsa kileh pwi, ara andre apahasaniy para aponokulani kultuwayi wawu mbukenan koro yumwa totohun ta Ngindrai tapeh. Pe hu ndramat hurokum, ara tehe pahut mepo irandroiyi nongan ndrokonan ata Ngindrai mwalen.
16 Pe hamou kinlahiy para kipa ikowu iya lohongai kokohon namandran mepo Ngindrai kinpwainganiy kinsa kili worou pwi:
Kristus isarayah ndramat,
Mwoiwan Haiyan ipwainganiy ndrokonan tehe yiy ara Noru Ngindrai.
Pe hu angelou ara hu kannime yiy,
Pe nongnan, ara kanpohowei kinna kili hu ndraye ndramat masih,
Pe hu ndramat para kol pwan, ara hu kanpwotisingi lohongahu kinna kili yiy.
Pe Ngindrai kinwiri yiy kinnapolo nganngana pwoke kinna kol paingan yang.