2
Pwahanou para kultuw para totohun
1 Pe urakamam isa kili wou Timoti para melit ambusiy kimu kiya kili Ngindrai, pe atohun, pe asok Ngindrai pe awiri pohohu ndramat pe atohun, pe arawuloh kiya kili Ngindrai kiya tesah kunmbusiy pwen kinna kili hu ndramat masih.
2 Pe akatohun kiyata hu king pe hu masih para kapman mepo pwoke nopwaran ita kili hu para andre mipwan torou kiro nondriya ndriya wayis, pe mipwan torou ara andre kiro waison o. Pe andre worou koro pahandra nohowai ta Ngindrai pe kambusi kultuw haiyan.
3 Pe iye ara kultuw hiyan mepo ngara kimbusi Ngindrai Sopwat Hiyan torou kipwes.
4 Pe yiy mepo inamiliy para kisopwat hu ndramat masih para hu kawiri lohongai iman para nongan ndrokonan.
5 Paratesah, Ngindrai ara hamou opu, pe moyut hamou opu mwalinga Ngindrai pe hu ndramat, yiy mepo ndramat Kristus Yesu.
6 Pe yiy mepo iyki yiy mbukenan para kikonuh hu ndramat masih para hu kasa mawen pakut mwomwan. Pe irahihini lang imwonen pe ipwaingani yiy para kisopwat hu ndramat masih.
7 Pe tunan aro ko, Ngindrai irakinimo para kurayah aposel hamou—pe para kupohowe nongan hiyan. Pe tesah urupo pwai, ara ndrokonan pe kunpwasoyou pwi—pe Ngindrai irakinimo para kurayah ndramat uiki lohongai ndrisiyon to para hinuwani nongan ndrokonan kiya kili hu Ndramira Lah.
8 Pwen tora ko, unamili hu ndramat masih kene hutora kol masih mepo huiki hu iya kili Ngindrai para hu katohun, pe mwomwan mbuna kiro kili hu, pe ndriyahu mbuna kilokuh ndre hu karakokowai.
9 Pe unamiliy i para hu pihin kasohongani hu koiwe hu kiyapolo lohongai hiyan, kiro mwonen akambultere para akatotohun. Pe hu kahaiyani hu pe hu kasuluye hu mbukenan kiya koyau mepo hiyan, pe mbuna hu kariyi kompaya hu kiya lahayan, ndre hu kaiki kolt ndre hu sowiy, ndre hu koyau mepo kene hu ihohin iya.
10 Hapeko hu kultuw hiyan mepo mwayih iya para hu pihin hu koro mbusiy, ara hiyan para hu kapwainganiy tehe hu ngara katotohun kiya kili Ngindrai.
11 Pe hu pihin ara hu kamun o pe kawiri hinonou, pe hu kaiki hu kaya pwan masih.
12 Pe kunpa hiyan para hu pihin hu kahinuwani hu ndramat, ndre kawiri pwoke nopwaran para hu koro mu kili hu kamai, ara pwi, hu kamun opu pe hu kahalong nongan.
13 Paratesah, Ngindrai imangsani Atam imu, iyamulan imangsani Ewa.
14 Pe Sinai ara kinpwasike Atam pwi, ipwasike pihin mepo Ewa, pe pihin hamou mepo sinai ipwasike yiy, pe imbusi pakut mwomwan.
15 Hapeko kapa hu pihin koro manau lohongai ndrisiyon tahu, pe hukoro nondriya kultuw para namiliwai, pe hu koro haiyan, Ngindrai andre kisopwat hu kiro mwonen hu kamwalahiy kiyata noru hu. Pe kultuwayi hu ara kiro hiyan pe kiro mwonen sai.