Nongan Pol iratulwiy imu iya kili
Timoti
Nongan imu
Pe Timoti ara wihou hamou mepo yiy Kristen pe iyau kol ngawan Listra para kol namandran iya Kalatiya. Pe tina ara yiy para ndraye Yutah, pe taman ara para ndraye Krik. Pe Pol ara iwiri Timoti para kiya rikai polo yiy para kapombulen para pohoweya nongan polo yiy, (animei ita Aposel 16:1-3). Pe nimnim para aliy, ara tehe iyamulan, Timoti irayah pohon hamou para hu ndramat hurokum iro kol ngawan Epesus, pwen pe Pol, ara iratuluwi nongan iye iya kili yiy.
Pe nongan imu para nongan ratuluwiy iye, ara iwong tehe Tmoti ara kiro hinehes, matisan hu ndramat hayah andre hu kapwalngani lohongai ndrisiyon tahu ndramat. Pe hu ndramat ara, ara lohonga hu handra masih, tehe hu melit para kol pwan, ara hu hiyan pwi. Pwen tehe tora ko, ndramat pakiwiri taleh ndrokonan, ara kiyindronge yiy kiya anandrinai hayah, pe mbuna kiyesou.
Pe nongan luhin namandran mepo nongan ara iwong iya aliy, ara iya hu kultuw hiyan para kapwokerani totohun pe mbulen para kambultere pe karokum. Pe iwong i para sehe ndramat ndrokonan andre kilahiy para kirayah ndramat para pwokere pe kirayah ndramat para pombulen para hu ndramat hurokum.
Pe nongan ratuluwiy iyahapwen, ara iwong tehe Timoti ara kiro tehe ndramat hiyan para poya mbulya Yesu Kristus, pe kultuwayin, ara kimbusiy kiya kili hu ndramat hamou-hamou kiya kili hu ndramat mepo hurokum.
1
1 Yo Pol aposel hamou ta Kristus Yesu, Ngindrai Sopwat torou ipwandrandrahani yo pe uratuluwi nongan iye. Yiy mepo Kristus Yesu melit hiyan torou itapo isa.
2 Timoti, yo uratuluwi nongan iye isa kili wou, pe wou ara noru ndrokonan iya lohongai ndrisiyon. Pahas, koisirai pe ndriya wayis iyau kili Ngindrai Tamarou pe Yapan Yesu Kristus torou isa kili wou.
Timoti iwong anna hu ndramat para hinuwani nongan pwasoyou
3 Pwen tehe kunrakamam pwen kinsa kili wou iro mwonen uya Masetoniya para aro ndron Epesus, pwen pe andre apwandrandrahani hu ndramat hayah, para hu mbuna kahinuwani hu kiya hu hinonou pwasoyou.
4 Pe apwandrandrahani hu para hu kahatohai para hu mbuna kaiki lohongahu kiya hu pweheriy mwaihei para ndraye tumbuhu, mepo andre kipakarawani lohongahu pe kimbusi hu karakokowai, pe andre kinsopwat lohongai ndrisiyon tahu—para andre hu kanmbusi mbulya Ngindrai pwi.
5 Pe ndroiyi nongan para pwandrendrehe iye, ara para kultuw para kambulihi ndramat, kiyau ndriya ndramat mepo imwonen, pe kiyau lohongai ileu pe lohongai ndrisiyon mepo hiyan.
6 Hu ndramat hayah, ara hu kantapaiwani hu kultuw aro pe hu kantaliy, pe iyki nongan pwasosohou para hu koro wong kiya aliy.
7 Pe hu namiliy para karayah hu ndramat para hinuwani nongan para pwahanou, hapeko hu kowu iya tesah hutora wong iya aliy, pe hu pwokeyani lohonga hu tehe ara ndrokonan.
8 Pe worou pahasaniy tehe nongan para pwahanou, ara hiyan kapa worou katokuyaniy kiye sayan imwonen.
9 Pe worou kapahasaniy yi, tehe nongan para pwahanou, ara Ngindrai kiniykiy pwen kinna tahu ndramat imwonen, ara pwi, hapeko ta hu ndramat para ndrihisani nongan para pwahanou, pe hu ndramat para loweyani nongan, pe hu mepo huiki ndruwa hu iya kili Ngindrai, pe hu mepo pakut tahu mwomwan, pe hu mepo hu haiyan pwi, pe hu mepo hu kowu totohun, pe hu mepo hu ngara katingundru tamahu ndre tinahu, pe ta hu ndramat para taya ndramat,
10 pe ta hu ndramat para kultuw para pilah, pe ta hu ndramat mepo hu ngara kambusi memeng, pe ta hu ndramat mepo ngara hu kapahanowe hu ndramat, pe hu ndramat para pwandrandraman, pe hu mepo ngara katandrangan pwasoyou—pe para sehe melit mepo kinho ndruwa hinonou ndrokonan ata Ngindrai pwi,
11 pe hinonou para nongan hiyan para nganngana pwoke ta Ngindrai para lomwes pe lohongan ipwotisingi yo pe iykiy isa kili yo para kirayah mbulyo.
Pahas ta Yapan iya kili Pol
12 Pe yo urawuloh iya kili Yapan Kristus Yesu torou, yiy mepo kiniyki pwoke kinsa kili yo, pe irakinimo para kumbusi mbulyan, paratesah, iyirowei tehe lohongo ara ndrisiyon.
13 Pe konan mamu yo ndramat hamou para pwasimiri ngala Ngindrai, pe ndramat hamou para pwalngani hu ndramat, pe ndramat hamou para tambumbuwat, hapeko Kristus, ara ndriyan isikirani yo. Paratesah, ukowu tesah yo uro mbusiy, pe lohongo kinpwotisingi yiy pwi.
14 Pahas ta Yapan ara itilingiy ipopo ko isa kili yo, pe iyapolo lohongai ndrisiyon pe kultuw para namiliwai mepo ita kili Kristus Yesu.
15 Nongan iye ara ndrokonan pe ilahiy para akawiriy tisingiy: Kristus Yesu isa kol pwan ara para kiyki sopwat hiyan kiya kili hu ndramat pakut tahu mwomwan—pe yo ara pakut to ara pwalngengei iya, iyata hu ndramat masih.
16 Hapeko tunan ara ko, Ngindrai koyun isikirani yo, pe tehen tora ko Kristus Yesu andre kipwaingani kultuw waison kipep kiro kili yo, yo mepo pakut to pwalngengei masih. Pwen andre hu ndramat masih mepo kanime yo, pe kapwotisingi lohongahu kiya kili yiy, ara andre hu kawiri taleh mepo andre kinto-kinto.
17 Pe tukahari ngala King mepo andre kinto-kinto, pe kinho mat pwi, pe konho nime yiy pwi, pe yiy ara Ngindrai hamou opu, pe worou karanuhuyani yiy pe tukahari ngalan kinto pe kinto. Ndrokonan.
Pol ipwahanou Timoti para kirahatini yiy
18 Noru kamai Timoti, uiki nongan para pwahanou iye iyapolo nongan para poropet mepo mamu hu kanpwai mepo kintiyani wou pwen, para alohongani hu nongan ara, pwen andre apopahun kiya hiyan.
19 Pe arahatini lohongai ndrisiyon tam, pe lohongai ileu hiyan. Hu hayah, tahu ara hu ndrihisaniy, pe hu kantali lohongai ndrisiyon tahu pe hu kanna pwalngengei.
20 Pe mwalinga hu, ara Himenayus pe Aleksantar. Hilu mepo kuntali hilu kanna nima Sinai, umbusiy toro para hilu kawiri hinonou kiyau aliy, pe hilu mbuna koro pwasimiri Ngindrai.