3
Soksok para katohun
1 Pe wawu nali pe pisu, nongan iya hapwen ara para akatohun kisa towu tehe nongna Yapan ara andre kingau kileh kiya hu kol hayah, pe hu kahaiyaniy pe kawiriy, pwen tehe wawu kanwiriy pwen.
2 Pe wawu katohun tehe Ngindrai andre kisopwat yowu para koro mawen kili hu ndramat kultuwayi hu pwassin pe mwomwan masih, paratesah, hu ndramat masih ara lohongahu ndrisiyon pwi.
3 Hapeko Yapan ara andre kimbusi tesah ipwai, pwen andre kipwokeyani wawu pe kipwokere wawu koro mawen kili sinai.
4 Pe yowu rahatini lohonga yowu iya kili Yapan tehe andre akoro waiyaniy para wawu koro mbusi hu melit mepo yowu pwandrandrahani wawu iya aliy.
5 Pe yowu tohun Yapan andre kiluwani ndriya wawu kiya namiliwa Ngindrai pe Kristus para andre akoro tine pwokeyan kapa akakuni nopwaran.
Pwahanou kapa anpombulen pwi
6 Pe iya ngala Yapan Yesu Kristus, wawu nali pe pisu, yowu pwandrandrahani wawu para akoro mawen kili hu ndramat masih mepo hu pwotisingi lohongahu, pe hu konho mbusi mbulen pwi, pe hutora ko, pe hu konto ndruwa hinonou mepo wawu wiriy kinyau kili yowu pwi.
7 Paratesah, wawu mbukena wawu pahasani para akoro ndruwa kultuwayi yowu tapeh. Yowu ro sura wawu, ara yowu konto ko mwaihei o, ara pwi.
8 Pe anandrinai yowu ro yan, ara yowu kaniyan kili hamou o mwaihei pwi, yowu sowaniy. Pe yowu pombulen pwokeyan, pe yowu ro pombulen lang pe ping para yowu mbuna kaiki nopwaran kisa kili hamou tawawu.
9 Yowu pombulen toro ara para wawu koro sopwat yowu, ara pwi, hapeko yowuiki yowu mbukenan tehe yukyuk para wawu kanime kultuwayi yowu pe akoho ndruwan.
10 Paratesah, tandrohongan yowu ro sura wawu, yowuiki pwahanou iye isa kili wawu yowupa, “Ndramat mepo ndrinameren soyon pe kinpo mbulen pwi, ara mbuna kinamnam.”
11 Pe yowu hilong tehe hu hayah hutora mwalinga wawu, ara hu konho pombulen pwi. Pe hutora hingou tahu. Pe mbuwali hu para hu kapo mbulyahu mbukenan, hapeko hunamiliy para hu koro wong pe kapakarawani mbulya hu ndramat hayah.
12 Yowu rakamam pe pwandrandrahani nongan iya ngala Yapan Yesu Kristus tehe yihu ndramat tehen tora, ara hu kamayum, pe hu kapombulen para kapo anandrinahu mbukenan.
13 Hapeko wawu nali pe pisu, wele wawu mbuna kimai para akambusi kultuw hiyan.
14 Pe kapa hamou tahu ndramat ara hu kanhilingi nongan yowu ratuluwiy iye pwi, akoro pahan kiyatan, pwen mbuna akasusuye kiyasura hu, pwen tehen tora ko andre hu kamasi.
15 Pe wawu mbuna kanime hu tehe hu ndramat mepo hu ngara kamwisnani wawu, hapeko wawu kapwahanou hu pwokeyan tehe nali wawu hamou mepo ipwotisingi lohongan.
Nongan iyahapwen
16 Pwen mahapo Yapan para ndriya wayis mbukenan, ara andre kiyki ndriya wayis kisa kili wawu lang masih, pe kiya poho sai masih. Yapan kiro sura wawu masih.
17 Yo Pol uratuluwi ndrokololang iye iya nimo mbukeno, pe nongno masih ngara kuratuluwiy, pwen andre akanime kinimo ngara kuratuluwiy ara toro. Pe iye ara nongan ngara kuratuluwiy tapeh.
18 Pe utohun tehe pahas ta Yapan torou Yesu Kristus ara kiro sura wawu masih.