2
Ndramat mepo kultuwayin pwassin
1 Pe wawu nali pe pisu, yowu sok wawu iya lohongai para lenge Yapan torou Yesu Kristus para andre kimui, pe andre worou kasa rawure tou kiyasura yiy.
2 Pe lohonga wawu mbuna kihileh para kimeu kiya hinonou mepo akanwiriy kili yowu—pe kapa kiyau nongna poropet, ndre kiyau poho ndramat, ndre hu karatuluwiy—tehe lenge Yapan ara kinsa pwen.
3 Pe hamou mbuna kipakarawani wawu kiyau sai handra-handra, paratesah, lenge Yapan para kimui ara mapu, kipoo hu ndramat para lowani nongan karayah, pe ndramat, mepo kultuwayin pwassin mepo andre kimwisnani Ngindrai pe nongan para pwahanou tan, kisarayah, yiy mepo para pwalngani melit.
4 Pe andre kiwong ana Ngindrai pe kisikiye yiy mbukenan kiya melit masih mepo hu ndramat ngara katotohun kiya kili hu, pe hu melit mepo pohowei Ngindrai. Pe andre kiya nondriya yumwa totohun namandran ta Ngindrai pe kimpwan aliy pe kipwaingani yiy mbukenan tehe yiy ara Ngindrai.
5 Pe wawu ngara kalohonganiy tehe hu melit aro, ara iro mwonen uro sura wawu, ara ngara kupwai kisa kili wawu.
6 Pe mahapo wawu pahasani tesah ita kaituwe ndramat kultuwayin pwassin ara para mbuna kisa, pe andre kisarayah kiro mwonen lang Ngindrai inamiliy.
7 Paratesah, pwoke kokohon para kultuw pwassin ara, ara kintayah pwen, hapeko yiy mepo ita kaituwe hu ndramat para hu kandrihisani Ngindrai ara andre kiro mbusi kiropo kiya, kipoo kisa rahihini lengen para Ngindrai kirasse yiy kiya mawen.
8 Pwen ndramat kultuwayin pwassin ara andre kisarayah, yiy mepo Ngindrai andre kihili ngohan pe kipwalngani yiy kiro mwonen Yapan Yesu kisa kiyapolo nonowa pwoke tan.
9 Pe ndramat kultuwayin pwassin ara, ara andre kisa pe kimbusi melit kiho ndruwa mbulya Sinai. Pe andre kipwaingani hu kaipisa pwoke pwasoyou masih handra-handra, pe kinima pwoke masih pwasoyou handra-handra,
10 pe hu kultuw masih mepo hu ndramat kultuwayi hu pwassin ngara kambusiy para kipwasike hu mepo huro sai para hu kaya pwalngengei. Pe huya pwalngengei, paratesah, mbuwali hu para kanamili nongan ndrokonan pe Ngindrai kisopwat hu.
11 Pe tunan aro ko, Ngindrai iyki pwoke para lohongahu kimeu pe andre lohongahu kipwotisingi nongan pwasoyou.
12 Pe hu ndramat masih andre hu kawiri kora hu, hu mepo hu kanpwotisingi lohongahu kinna nongan ndrokonan pwi, hapeko hupwesani melit pwassin.
Akoro tine pwokeyan
13 Hapeko wawu nali pe pisu, lang masih yowu ngara karawuloh kiya kili Ngindrai kisata wawu, wawu mepo Yapan ndriyan imbulihi wawu. Paratesah, wawu pwotisingi lohonga wawu iya nongan ndrokonan, pwen Ngindrai kinrakinima wawu pwen ma kol pwan kintayah mapu. Pe pwoke ta Mwoiwan Haiyan andre kisopwat wawu, pe kimbusi wawu para akarayah haiyan kiya lohongai ndrisiyon tawawu mepo iya nongan ndrokonan.
14 Ngindrai imbusiy toro pe irakinima wawu iya nongan hiyan yowu pohowei isa kili wawu, pwen pe nonowa pwoke mepo iykiy iya kili Yapan Yesu torou, ara andre kitainganiy kisa kili wawu yi.
15 Pwen tora ko wawu nali pe pisu, wawu koro tine pwokeyan pe kapwotisingi hu hinonou yowu kanhinuwani wawu kinna aliy, iya nongan yowu pwai iya poho yowu, ndre yowu ratuluwiy.
16 Pe Yapan Yesu Kristus torou mbukenan, pe Ngindrai Tamarou mepo ndriyan imbulihi worou pe iyau pahas atan, ara kiniyki pwahanou mepo andre kinto-kinto para kipwokeyani tou kiya melit hiyan itapo isa.
17 Pe ndriya wawu kipwoke pe akapwokeyani lohonga wawu kiya mbulen hiyan masih mepo wawu ngara kambusiy, pe akawong kiya aliy.