Nongan luhin Pol iratuluwiy iya kili
Hu Tesalonaika
Nongan imu
Pe nimnim para aliy, ara tehe hu ndramat hurokum huro kol ngawan Tesalonaika, ara yihu lolohonge soyon iya sehe melit ndrokonan andre kirayah kiro mwonen Kristus andre kimui paiwe. Pe hayah ta hu, ara hu kanpwai pwen tehe Lang ata Yapan ara kinsa pwen. Pwen tehen tora ko, Pol, Silas pe Timoti, ara huratuluwi nongan aro para kimwaniyani lohongahu.
Pe Pol ara ipa, lang ara kintayah mapu. Pe hu ndramat andre kambusi kultuw pwassin, pe hu kultuw mwomwan handra-handra ara andre karayah kimu na, pe andre kipwoke masih. Pe ndramat hamou para lowani nongan para pwahanou, ara andre kisarayah, pe andre hu kamwisnani Kristus kiya pwokeyan.
Pe Pol ipwai iya kili hu ndramat para hu koro tine pwokeyan kiya lohongai ndrisiyon tahu, pe hu kakuni nopwaran. Pe inamiliy para yihu kapombulen pwokeyan, para hu kapwokere hu mbukenan, tehe yiy, pe hu susuyan para poya mbulen ngara kambusiy. Pe wele hu mbuna kimai para kambusi mbulen, pe wele hu mbuna kimai para kasopwat hu hayah.
1
1 Yo Pol, Silas pe Timoti,
yowu ratuluwi nongan iye isa kili wawu yowe Ngindrai tora rokum para kol ngawan Tesalonaika, wawu ata Ngindrai Tamarou pe Yapan Yesu Kristus toro:
2 Pahas pe ndriya wayis iyau kili Ngindrai Tamarou pe Yapan Yesu Kristus kiro kili wawu.
Pol irawuloh pe itohun
3 Wawu nali pe pisu, yowu rawuloh lang masih iya kili Ngindrai isata wawu, pe imwonen masih para yowu kambusiy tehen toro, paratesah, lohongai ndrisiyon tawawu, ara ita mandra itapo iya, pe ndriya wawu ngara kimbulihi wawu masih hamou-hamou, ara ita mandra lang masih.
4 Pwen tehen tora ko, hu nopwaran masih pe hu nohonou wawu ya nondriyan, ara imbusi yowu hari ngala wawu iro mwalinga hu yowe Ngindrai tora rokum, tehe wawu tora tine pwokeyan iya lohongai ndrisiyon tawawu.
5 Hu melit masih aro ipwainganiy tehe tamwanye ta Ngindrai ara imwonen, pwen tora ko, wawu andre karayah tehe ndramat imwonen kiro Kingtom ta Ngindrai, iya hu nopwaran wawu ngara kakuniy.
6 Pe Ngindrai ara ndramat imwonen para tamwanye, pe andre kipo soiwi kora mwomwan tahu mepo hu mbusi mwomwan isa kili wawu,
7 pe andre kiyki ngohongoh kiya kili wawu mepo wawu ngara kakuni nopwaran, pe andre kimbusiy tehen aliy o kisa kili yowu yi. Pe melit aro, ara andre kirayah kiro mwonen Ngindrai kipwaingani Yapan Yesu kisa kiyau kol paingan yang kiyapolo mwan iroholulun pe hu angelou pwokeyan atan.
8 Pe andre kiyki kora hu mepo hu kowu ta Ngindrai pe hu konho ndruwa nongan hiyan ata Yapan Yesu torou pwi.
9 Pe yihu andre kawiri kora hu mwomwan tahu mepo andre kinto-kinto, pe andre hu koro mawen mbulmara Yapan pe nonowa nganan pe pwoke tan.
10 Pe kiro mwonen lang mepo Yapan kimui, andre hu ndramiran haiyan kahari ngalan pe hu kalohonge ndrit mwalinga hu mepo hu kanpwotisingi lohonga hu. Pe wawu yi andre karo mwalinga hu yi, paratesah, wawu pwotisingi lohonga wawu iya titiye towu.
11 Pe yowu lohongani lohongai aro, pwen lang masih yowu ngara katohun sata wawu, para Ngindrai torou andre kimbusi wawu koro mwonen kiya yoholai tan kisa kili wawu. Pe kiyau pwoke tan andre kimbusi wawu karo ndruwa hu kultuw hiyan mepo wawu namiliy pe hiyan, pe mbulen masih wawu mbusiy, ara iyapolo lohongai ndrisiyon.
12 Yowu tohun toro para ngala Yapan Yesu torou ara andre wawu kahari, pe wawu andre koro kili yiy. Pe andre kipwaingani pahas ta Ngindrai Tamarou pe Yapan Yesu Kristus kisa kili wawu.