5
Lenge Yapan
1 Wawu nali pe pisu, iya lohongai para sehe paramwandrai pe lang Yapan andre kimui, andre yowu kantatuluwiy kinsa kili wawu, ara pwi.
2 Paratesah, wawu pahasani hiyan tehe lenge Yapan nakisa, ara tehe ndramat hamou ping pe pakisa pahana.
3 Pe hu ndramat andre hu koro pa, “Lang hiyan, pe ndriya wayis kiro.” Pwen kindrou pwi ko, nopwaran andre kirayah pe andre hu kanwop pwi, tehe pihin hamou mepo ihingotou iyata norun.
4 Hapeko wawu nali pe pisu, wawu kanto lokuhan pwi, pwen pe lenge Yapan nakisa, ara andre kiniyki mwoiwahin kisa kili wawu tehe ndramat hamou para pahana, ara pwi.
5 Wawu masih, ara wawu ngara kambusi melit kimwonen tehe hu ndramat ngara kambusi melit kiro lang, pe worou, ara para lokuhan ndre para ping, ara pwi.
6 Pwen pe mbuna tukarayah tehe hu hayah mepo hutora matin, hapeko tukoro hinehes pe lohongarou kiro leu.
7 Paratesah, hu mepo ngara kamatin, ara ngara kamatin ping, pe hu mepo ngara kayin ndran tunguyan, ara hu ngara kayin ndran tunguyan ping.
8 Hapeko worou ara para lang, pe lohongarou kiro leu, pe lohongai ndrisiyon pe kultuw para namiliwai kiro tehe nosarou para penanirou kiro wiyineretou, pe lohongai para sopwat hiyan mepo iya melit itapo isa, ara tehe ndrutuha paya ndramat sih.
9 Paratesah, Ngindrai kintakinima rou para tukanwiri ndrinalokuh tan ara pwi, yiy irakinima tou, ara para worou kawiri sopwat hiyan kiyau kili Yapan Yesu Kristus torou.
10 Pe Yesu imat isata worou, pwen pe konan tukoro mwalen ndre worou kamat, ara andre tukoro mwalen kiyapolo yiy.
11 Pwen tehen tora ko, akasopwat wawu pe akapwokeyani wawu hamou-hamou para akamandra, tehe ndrokonan wawu tora mbusiy.
Nongan iya hapwen
12 Hapeko wawu nali pe pisu, wawu kahaiyani hu mepo pohon hu tora pombulen pwokeyan mwalinga wawu, pe hu pwokere wawu pe hu pwahanou wawu para mipwan tawawu kiro tapeh kili Yapan.
13 Pe wawu kahaiyani hu kiya hiyan kiyapolo kultuw para namiliwai, paratesah, iya mbuliyahu. Pe ndriya wawu kiwayis kiya kili wawu hamou-hamou.
14 Pe wawu nali pe pisu, yowu rakamam isa kili wawu para wawu kapwahanou hu mepo ndrinamerehu soyon, pe wawu kapwahanou hu mepo ngara hu kahandrundru, pe wawu kasopwat hu mepo hu kanlahiy para hu akambusi handra melit pwi, pe akambusi kultuw waison o kiya kili hu ndramat masih.
15 Pe mbuna wawu kaposoiwi mwomwan ta hamou-hamou tawawu, hapeko wawu kapwoke para wawu kambusi tesah hiyan kiya kili hamou-hamou, pe kiya kili hu ndramat masih i.
16 Pe wawu koro pwes lang masih,
17 pe wawu koro tohun lang masih.
18 Pe nondriya nopwaran masih, ara wawu karawuloh, paratesah, ara namiliwai pwokeyan ta Ngindrai iyau kili Kristus Yesu mepo ita kili wawu.
19 Pe wawu mbuna kakaituwe mbulya Mwoiwan Haiyan.
20 Pe wawu mbuna kawiri hu nongna poropet kiho mwak o.
21 Hapeko wawu kanohonou melit masih, pe wawu kapwahatini tesah mepo hiyan.
22 Pe hu kultuw pwassin masih handra-handra, ara wawu koro mawen aliy.
23 Pe yo utohun tehe Ngindrai mbukenan mepo Ngindrai para ndriya wayis, ara andre kimbusi wawu karayah haiyan. Pe lohonga wawu masih, pe nombuwe wawu masih, pe mwoiwa wawu masih, pe hape mwomwan mbuna kiro kili wawu kiro mwonen lang Yapan Yesu Kristus torou kisa.
24 Pe Ngindrai mepo iyoh wawu, ara andre kimbusi tesah ipwai, pe lohonga wawu ara kipwotisingi yiy.
25 Pe wawu nali pe pisu, wawu katohun kisata yowu.
26 Pe akapa ndrokololang kiya kili hu ndramira Ngindrai kiyapolo rahunghung haiyan.
27 Pe upwandrandrahani iya mbulmara Yapan para nongan iye, ara akapohowei kiya kili hu nali rou pe pisu worou masih.
28 Pahas ta Yapan Yesu Kristus torou, ara kiro sura wawu.