4
Mipwan tawawu ara kiyki pwesai kiya kili Ngindrai
1 Pwen tehen tora ko wawu nali pe pisu, wawu kanwiri hinonou pwen iyau kili yowu para mipwan tawawu andre kiro tapeh, pwen andre kiyki pwesai kiya kili Ngindrai tehe ndrokonan ara, ara mipwan tawawu mahapo. Pe yowu rakamam isa kili wawu iya kili ngala Yapan Yesu para akoro waiyaniy para akoro rikai tora kiropo kiya.
2 Paratesah, wawu pahasani sehe pwahanou yowu kaniyki kinsa kili wawu, iyau pwoke nopwaran ta Yapan Yesu.
3 Pe ara namiliwai pwokeyan ta Ngindrai para akarayah haiyan, pwen andre akoro mawen kultuwayi memeng.
4 Pwen hamou-hamou tawawu ara kiyki songot kiya namiliwan para nombuwen, pe kihaiyani nombuwen kiro haiyan,
5 pe ndriya wawu mbuna kitine kiya kultuw para namiliwai para nombuwe wawu, tehe hu ndramira lah mepo hu kanpahasani Ngindrai pwi.
6 Pe iyau lohongai aro ko, andre akanmbusi mwomwan ndre akanpakarawani nali wawu pe pisu wawu hu pwi. Pe Yapan andre kiyki kora yihu masih mepo hu mbusi hu pakut mwomwan aro, tehe yowu kanpwatisingiy pe kanpwahanou wawu pwen kinna aliy mamu.
7 Paratesah, Ngindrai kiniyoh worou para mbuna tukoro ndruwa kultuw para memeng, hapeko para mipwan torou ara kiro haiyan.
8 Pwen tehen tora ko, ndramat mepo kindrihisani pwahanou iye, ara kindrihisani ndramat pwi, hapeko indrihisani Ngindrai, Ngindrai ara ko mepo iyki Mwoiwan Haiyan tan isa kili wawu.
9 Pe iya kultuw para akanamili hamou-hamou tawawu, ara andre yowu kanratuluwi nongan para aliy kisa kili wawu pwi, paratesah, wawu mbukena wawu akanwiri hinonou kinyau kili Ngindrai para akanamili hamou-hamou.
10 Pe ndrokonan tehe wawu namili hu ndrai sih masih ta Ngindrai hutora kene kol Masetoniya, hapeko yowu isa kili wawu, yowu rakamam isa kili wawu nali pe pisu, tehe akoro mbusiy tora kiropo kiya.
11 Pe akapwokeyani wawu para mipwan tawawu kiro hiyan pe kiro waison, pe akambusi mbulya wawu mbukenan, pe akapombulen kiya nima wawu mbukenan, pwen tehe yowu kanpwai kinsa kili wawu.
12 Pwen pe andre tokuya wawu para lang sih-sih, ara andre kimbusi hu ndramat mepo hu kanpwotisingi lohongahu pwi para hu kahaiyani wawu, pe andre akaniyki lohonga wawu kiro kili hamou, ara pwi.
Hu ndramat hupwotisingi lohongahu mepo hu kanmat
13 Pwen wawu nali pe pisu, yowu namiliy para wawu kapahasani tesah andre kirayah kiya kili hu ndramat hupwotisingi lohongahu pe andre hu kamat, pwen pe andre wawu kanrang tehe hu ndramat lohongahu kinto melit hiyan itapo isa, ara pwi.
14 Paratesah, tupwotisingi lohongarou tehe Yesu ara imat pe itine paiwe yi. Pe tehen aliy o, tupwotisingi lohongarou i tehe yihu mepo hu kanmat, ara Ngindrai andre kihingini hu kamui kiyapolo Yesu, yihu mepo hupwotisingi lohongahu iya kili yiy.
15 Paratesah, nongna aro, ara Yapan kinpwai pe yowu pwai isa kili wawu, tehe worou mepo tutopo ndron mwalen, ara andre worou kanmu kiro mwonen Yapan kimui, ara pwi. Worou andre kanto mu kinnata hu ndramat mepo hupwotisingi lohongahu pe humat, ara pwi.
16 Paratesah, Yapan mbukenan andre kiyau kol paingan yang kisa pwan, pe andre kipwandrandrahani nongan sahin namandran, kiyapolo yoholai ata namandran ta hu angelou hamou, pe andre kira ndrah ta Ngindrai. Pe hu ndramat mepo hu pwotisingi lohonga hu iya kili Kristus mepo hu kanmat, ara andre hu katine kimat kimu.
17 Pwen kiya mulan, worou mepo tutopo mwalen pe tutopo ndron, ara andre worou kaya paingan pe kaya harong sura hu kiho hu kokom para kapohonani Yapan kiro paingan yang. Pwen pe andre tukoro sura Yapan kinto-kinto.
18 Pwen tora ko, akapwokeyani lohonga hamou-hamou kiya hu nongan aro.