3
1 Pe iro mwonen yowu nimei tehe yowu kanlahiy para kapwokeyani yowu pwi, pwen yowu lohonganiy tehe hiyan para yowu mbukena yowu keye ndron kol namandran Atens.
2 Pe yowu kanpwandrisa Timoti, mepo nali worou pe susuya worou pe ndramat para poya mbulya Ngindrai iyapolo youlu mepo ngara kipohowe nongan hiyan ta Kristus, para kirahatiniy pe kipokeyani wawu kiya lohongai ndrisiyon tawawu.
3 Pwen pe hu nopwaran mepo wawu tora kuniy, ara andre kinmbusi hamou tawawu kinkose pwi. Paratesah, wawu pahasaniy tehe Ngindrai irakinima rou para tukakuni hu nopwaran toro.
4 Ndrokonan, paratesah, tandrohongan yowu rondron sura wawu, ara yowu ro pwai isa kili wawu tehe andre worou kakuni nopwaran. Pe irayah tehen aliy o tehe wawu kanpahas pwen kinna aliy.
5 Pe tunan aro ko, iro mwonen kunlahiy para kurahatini yo pwi, pwen upwandrisa Timoti isa kili wawu para kisa nimei tehe wawu tora tine pwokeyan iya lohongai ndrisiyon tawawu, ndre pwi. Pe unoh matisan ndramat para pakarawani ndramat kipakarawani wawu pe tesah yowu kanmbusiy pwen, ara kirayah mwaihei o.
Nongan para pwokeyani lohongai ta Timoti
6 Hapeko Timoti iro kili wawu pe mahapo isarayah isa kili yowu, pe isa nese titiye hiyan tawawu iya lohongai ndrisiyon tawawu, pe kultuw para namiliwai tawawu. Pe itiyaniy tehe wawu ngara koro lohongani yowu lang masih, pe wawu namiliy para kanime yowu, pwen tehe yowu yi namiliy para kanime wawu.
7 Pwen tehen tora ko, wawu nali pe pisu, nondriya nopwaran pe ngandran, ara titiye tawawu iya lohongai ndrisiyon tawawu, ara ipwokeyani yowu.
8 Paratesah, mahapo iyki taleh isa kili yowu, kapa wawu koro tine pwokeyan kiya kili Yapan.
9 Yowu rawuloh iyata Ngindrai isata wawu. Paratesah, isata wawu ko, pwen yowu ara yowu pwes namandran iya iro mwonen yowu ya mbulmara Ngindrai torou.
10 Ping pe lang yowu ngara katohun pwokeyan para yowu kasa nime wawu paiwe, pe kasaiki tesah wawu ndroisiy iya lohongai ndrisiyon tawawu.
11 Pwen yowu tohun tehe Ngindrai Tamarou mbukenan pe Yapan Yesu torou, ara andre kimbusi sai kileu kisa towu para yowu kasa kili wawu.
12 Pe yowu tohun tehe Yapan andre kimbusi namiliwa wawu kipep pe kisahapwas kiya kili hamou-hamou tawawu, pe akanamili hu ndramat masih i, pwen tehe yowu ngara kanamili wawu.
13 Pe yowu tohun tehe andre kipwokeyani ndriya wawu, pwen andre akoro mwonen pe haiyan kiya mbulmara Ngindrai pe Tamarou, kiro mwonen Yapan Yesu kisa kiyapolo hu haiyan masih atan.