2
Mbulen Pol imbusi iro Tesalonaika
1 Wawu nali pe pisu, wawu pahasaniy tehe yowu sa saisai isa kili wawu, ara kinna mwaihei o pwi.
2 Wawu pahasaniy tehe mamu yowu kansa kili wawu mapu, ara yowu ya nondriya nopwaran pe hu hingasi yowu iro kol Pilipai tehe wawu pahasani, hapeko iyapolo sopwat ta Ngindrai towu, yowu rahatini yowu, pe yowu tiyani nongan hiyan isa kili wawu iro nondriya pepet pwokeyan.
3 Paratesah, nongan yowu pwatisingiy, ara yowu kanwong kinyau ndriyai mwomwan pwi, ndre pwandrandraman ara pwi, ndre yowu kannohonou para kapakarawani wawu, ara pwi.
4 Hapeko yowu wong ara Ngindrai kintakinima yowu pwen, pe kinpwotisingi lohongan kinsa kili yowu iya nongan hiyan. Pe yowu kanmbusiy para kanohonou para kapwesani ndramat, ara pwi, hapeko para kiyki pwesai kiya kili Ngindrai mepo ngara kinohonou lohonga worou.
5 Pe wawu pahasaniy, nongan yowu ngara kapwai ara yowu konho wong para kaluwi lohonga wawu pwi, ndre yowu konho yungurani mwomwan towu pwi—Ngindrai andre kipwokeyani nongna yowu.
6 Pe yowu kanmbusiy toro para hu ndramat karanuhuyani yowu, ara pwi, pe para wawu ndre hu hayah i para kahari ngala yowu, ara pwi yi. Konan yowu lahiy para kambusiy kiyapolo pwoke nopwaran tehe yowu aposel ta Kristus.
7 Hapeko yowu ara tehe mbunah mendreheh iro mwalinga wawu, pwen tehe pihin hamou para pwokere hu mbunah mepo ngara kipwokere norun hu.
8 Yowu namili wawu tisingiy, pwen yowu pwes pe yowu namiliy para kapohowe nongan hiyan ta Ngindrai pe mipwan towu kisa kili wawu.
9 Paratesah, wawu nali pe pisu wawu lohonganiy ndrokonan tehe hu mbulen yowu mbusiy, ara ngandrahan iya. Pe yowu pombulen lang pe ping para yowu mbuna kaiki nopwaran, kiya kili hamou iro mwonen yowu ro pohowe nongan hiyan ta Ngindrai isa kili wawu.
10 Ngindrai pe wawu kene ara kanyirowe yowu, tehe yowuro haiyan tapeh, pe kultuwayi yowu imwonen, pe handra mwomwan kinto kili yowu pwi, mwalinga wawu mepo wawu pwotisingi lohonga wawu.
11 Paratesah, wawu kanpahasaniy sehe kultuw yowu ngara kambusiy kisa kili hamou-hamou tawawu, tehe tama mbunah hamou ngara kimbusiy kiya kili norun hu mbukenan.
12 Yowu ngara kapwahanou wawu pe kapwokeyani wawu pe ngara karakamam para mipwan tawawu kiyki pwesai kiya kili Ngindrai. Paratesah, yiy iyoh wawu para andre akaya nondriya kingtom tan mepo ma nganngana pwoke tan.
13 Pe lang masih yowu i ngara karawuloh kiya kili Ngindrai, paratesah, iro mwonen wawu wiri nongna Ngindrai mepo wawu hilingiy iyau kili yowu, ara wawu kanwiriy tehe ara nongan kinyau kili ndramat hamou ara, pwi, hapeko wawu wiriy tehe ara nongna Ngindrai. Pe nongan ara, ara ita pombulen kili wawu mepo wawu pwotisingi lohonga wawu.
14 Paratesah, wawu nali pe pisu wawu koho ndruwa kultuwayi hu ndramira Ngindrai husa rokum para kol Yutiyah mepo hutora kili Kristus Yesu. Pe wawu ya nondriya nopwaran iyau kili hu ndramira wawu imwonen, iya harong o pwen tehe wawu ngara karokum pe kaya nondriya nopwaran kili hu para Yutah.
15 Yihu mepo hu kanitingundru Yapan Yesu, pe hu poropet, pe yihu yi, ara hu rasses yowu ya ngawan. Pe yihu ndrihisani nongna Ngindrai pe hu ngara kamwisnani hu ndramat masih.
16 Pe hu singori yowu para yowu mbuna kapohowe nongan kiya kili hu Ndramira Lah para Ngindrai kisopwat hu. Pe iyau sai aro ko, hu pakut mwomwan ta hu, ara kinho mwak pwi, pe ndrina lokuh ta Ngindrai kinna kili hu pwen.
Pol ilohonge para kiya nime hu para Tesalonaika
17 Hapeko wawu nali pe pisu, tandrohongan yowu ro mawen kili wawu hape, ara (yowu ro mawen iya nombuwe yowu, hapeko mwoiwa yowu, ara pwi), kunuwe yowu ara imun tawawu, pe yowu lohonganiy pwokeyan para yowu kasa nime wawu.
18 Paratesah, yowu namiliy para kasa nime wawu—pe yo Pol ara uro nohonou para kusa kili wawu ken iho ken—hapeko Sinai isingori saya yowu.
19 Paratesah, melit mepo itapo isa, ara iyki pwesai isa kili yowu, pe yowu sikiye yowu iya kasapai tehe kene yowu iro mbulmara Yapan Yesu torou kiro mwonen kisa.
20 Pe ndrokonan para aliy, wawu mbusi yowu pe yowu sikiye yowu pe yowu pwes.