Pol iratuluwi nongan imu iya kili
Hu Tesalonaika
Nongan imu
Kol ngawan Tesalonaika ara kol namandran para kol namandran iya Masetoniya. Pe iro mwonen Pol itali Pilipai, yiy iya Tesalonaika pe imbultani hu ndramat hurokum huro kol ngawan ara (anime Aposel 17:1-9). Hapeko iro mwonen hu Yutah hunimei tehe hu ndramat soyon huho ndruwa nongna Pol, pe hurayah Kristen, ara hundrangis iyata Pol, pe humbusiy para kitali kol Tesalonaika. Pe iyamulan Pol iya iro kol ngawan Korin, pe ndramat para susuye iya mbulen polo yiy Timoti, ara isa pe tiyaniy iya kili Pol iya hu melit masih mepo kanrayah iya kili hu Kristen para Tesalonaika.
Pe iro mwonen Pol ihilong titiye ta Timoti, pwen Pol, iyapolo Silas pe Timoti ara huratuluwi nongan iye para kipwokeyani lohongai ndrisiyon tahu Kristen para Tesalonaika. Pe hu ndramat soyon lohongahu iman, ara hupa ndre nongan Pol iratuluwiy aro, ara nongan imu ata Pol ita puk Paipel. Pe iripo nondriya nongan Pol iratuluwiy iye, ara yiy ipwes iya lohongai ndrisiyon, pe kultuw hiyan tahu Kristen hutora Tesalonaika.
Pe nimnim para aliy, ara tehe yihu Kristen aro, ara lohonga hu kinileu pwi tehe Kristus andre kimui tehen tapeh. Pe yihu pakapahasaniy tehe yihu ndramat hu kanmat pwen, pe kiro mwonen Kristus ara kinmui mapu, ara yihu andre kawiri taleh mepo andre kinto-kinto, ndre pwi? Pe Kristus, ara andre kisa sehe lang imwonen? Pwen Pol isomwi hu soksok tahu, pe ipwai iya kili hu para yihu koho ndruwa kultuw hiyan, pe hukoro hinehes kiyata Yapan para kisa.
1
1 Nongan iyau kili Pol, Silas pe Timoti, isa kili wawu yowe Ngindrai tora rokum para kol ngawan Tesalonaika, wawu ata Ngindrai Tamarou pe Yapan Yesu Kristus toro:
Pahas pe ndriya wayis kiro kili wawu.
Pol irawuloh iya lohongai ndrisiyon tahu para Tesalonaika
2 Pe lang masih yowu ngara karawuloh kiya kili Ngindrai kisa tawawu masih, pe yowu ngara kawaiyaniy para katohun pe kapohowe ngala wawu.
3 Pe yowu ngara kalohonganiy pe katohun kiya mbulmara Ngindrai Tamarou kiya mbulen wawu mbusiy iyau lohongai ndrisiyon tawawu, pe namiliwai para korotine pwokeyan kiya mbulen, kiya melit itapo isa iyau kili Yapan Yesu Kristus torou.
4 Paratesah, wawu nali pe pisu yowu mepo Ngindrai kinnamili wawu pwen, yowu pahasaniy tehe Ngindrai kintakinima wawu.
5 Paratesah, nongan hiyan towu isa kili wawu, ara kinsa kinna hu nongan o, ara pwi, hapeko isa iyapolo pwoke, pe iyapolo Mwoiwan Haiyan pe lohongai pwokeyan. Pe tunan wawu ko, wawu pahasani yowuro mwalinga wawu tapeh.
6 Pe wawu ro nohonou kultuwaye yowu pe ata Yapan, pe wawu rawulohani nongan iro nondriya nopwaran namandran iyapolo pwesai mepo Mwoiwan Haiyan kiniykiy.
7 Pwen pe kultuwaye wawu hiyan ara, ara wawu pwainganiy iya kili hu masih hu pwotisingi lohongahu para kol namandran hape Masetoniya pe kol Akaiya.
8 Pe nongna Yapan ara nolan ingau kili wawu, pe kinna kol Masetoniya pe kol Akaiya ko, ara pwi, hapeko lohongai ndrisiyon tawawu iya kili Ngindrai, ara titiye para aliy kinsilihi masih kene. Pwen torako yowu kanlahiy para yowu kaposura nongan handra kiya aliy, ara pwi yi.
9 Paratesah, yihu mbukena hu, ara hutiyani wawu rawulahani yowu tapeh. Pe hu tiyaniy tehe wawu tali totohun iya kili hu kerewek tapeh, pe wawu totohun iya kili Ngindrai, pe wawu rayah ndramat para pwandrendres ta Ngindrai mwalen pe ndrokonan.
10 Pe wawu tora longe Noru Ngindrai Kamai para kol paingan yang mepo Ngindrai ihingini yiy itine kimat—norun mepo Yesu, yiy mepo isopwat worou iya ndrina lokuh ta Ngindrai mepo itapo isa.