4
1 Pe wawu namandran para poho mbulen, ara akambusi kultuw imwonen pe kiya harong o kiya kili hu ndramat para pwandrendres tawawu, paratesah, wawu pahasaniy tehe Namandran hamou tawawu yi, ara ita kol paingan yang.
Susura pwahanou
2 Wawu mbukena wawu mbuna akahatohai para akatohun. Pe kiro mwonen akatohun, ara akaro hinehes pe karawuloh.
3 Pe akatohun kisata towu yi, tehe Ngindrai andre kitepe sai hasai para yowu kapohowe nongan hiyan mepo nongan ndrokonan kokohe ata Kristus, paratesah, urupo kou mahapo ara iya aliy.
4 Pe akatohun kisato tehe andre kupohowe nongan hiyan kileu tehe Ngindrai inamiliy para kumbusiy.
5 Pe akaponokulani tokuya wawu kiyapolo lohongai waison kiya kili hu mepo hu kanpwotisingi lohongahu pwi, nondriya melit masih, ara akapwainganiy tehe wawu ara wawu pwotisingi lohonga wawu.
6 Pe nongna wawu, ara lang masih kipep kiya pahas, pe kimbusi hu kapwes pe kiluwi lohongahu, pwen andre akapahasani tesah hiyan para akasomwi soksok ta hu ndramat masih.
Nongna Pol iya hapwen
7 Pe Tikikus ara andre kinese ndrainga wawu kiya mbulen masih umbusiy. Yiy ara nali mepo nere imwonen, pe yiy ara ndramat hamou para poya mbulya Yapan pe lohongan ndrisiyon para pohoweya nongan, pe ndramat para poya mbulya Yapan tehe yo ko.
8 Yo upwandrisa yiy isa kili wawu para akapahasani hu nopwaran yowu topopo iya nondriyan tapeh, pe andre kipwokeyani ndriya wawu.
9 Pe andre kisa kiyapolo Onesimus, nali yowu mepo nere yowu imwonen, mepo lohongan ndrisiyon, pe yiy ara hamou tawawu. Pe andre hilu katiyani melit masih iripo rayah iye.
10 Aristarkus ara iripo kou sura yo, pe ipa ndrokolang isa kili wawu, pe Mak tehen aliy i, mepo nali Parnapas. (Wawu kanwiri hu nongan iya tan, pe kapa kisa kili wawu, ara akarawulohani yiy.)
11 Pe Yesu hu pohowe yiy Yustus, ara ipa ndrokololang tan isa kili wawu yi. Pe hu Yutah matimou aro kopu, ara para sura yo, pe hutopo mwalinga hu ndramat para poya mbulen para kingtom ta Ngindrai, pe hu pomene yo hiyan iya.
12 Pe Epapras mepo yiy hamou tawawu, pe yiy ndramat hamou para poya mbulya Kristus Yesu, ara ipa ndrokololang isa kili wawu. Pe lang masih ngara kitohun pwokeyan kisa tawawu, tehe andre akarahatini wawu, pe lohonga wawu kiman pe kipwoke kiya namiliwai pwokeyan masih ta Ngindrai.
13 Pe ulahiy para kutiyani titiye para mbulyan pwokeyan imbusiy iya kili hu ndramat para kol Layotisiya pe Hiyerapolis.
14 Pe Luk mepo nere worou imwonen, pe yiy ara ndrokta, hilu Temas, ara hilpwanos ndrokololang tahilu.
15 Pe akapa ndrokololang to kiya kili nali pe pisu hu para kol Layotisiya, pe kiya kili Nimpa, pe hu mepo hurokum hutora suwe pihin ara.
16 Pe kiya mulan para nongan uratuluwiy aro, ara wawu kapohowei kihipwen, pwen akarapayaniy kiya kili hu mepo hurokum para kol Layotisiya, para yihu yi, andre kapohowei. Pe wawu yi, ara nongan uratuluwiy iya kol Layotisiya, ara wawu kapohowei yi.
17 Pe akapwai kiya kili Arkippus akapa: “Tehe mbulen mepo akanwiriy iyau kili Yapan, ara akambusiy kiyahapwen.
18 Yo Pol, uratuluwi nongan iye iya nimo mbukeno, tehe ndrokololang to isa kili wawu. Pe koyu wawu mbuna kimayit tehe urupo kou. Pahas ta Ngindrai kiropolo wawu.