3
Tokuya wawu ara kiro tehe ta yihu ndramat hutora mwalen kili Kristus
1 Pe Ngindrai kinhingini wawu akantine kimat pwen sura Kristus, pwen akaiki ndriya wawu kiya hu melit para paingan mepo ita hape aleheh Kristus ita mipwan aliy, iyapwen te nima Ngindrai mot.
2 Pe wawu kaiki lohonga wawu kiya hu melit para paingan, pe mbuna akaikiy kiya hu melit para kol pwan.
3 Paratesah, wawu kanmat, pe mahapo ara mwoiwa wawu ita kohon sura Kristus ita kili Ngindrai.
4 Pe kiro mwonen Kristus mepo yiy taleh tawawu kisarayah, pwen wawu yi andre kasarayah kiyapolo yiy kiya sura nonowa pwoke tan.
5 Pwen tehen tora ko, hu kultuwayi wawu mepo para nombuwe wawu para kol pwan, ara akapa pwi kiya aliy pe kimat, tehe kultuw para memeng, pe kultuw pwassin, pe kultuw para namiliwai para pilah, kultuw para ndriya ndramat kitine kileh para kambusi kultuw mwomwan, pe hu hingorou pwassin pe mwolou. Pe mwolou ara tehe ngara katotohun kiya kili ngindrai pwasoyou.
6 Paratesah, tunan hu melit aro ko, pwen ndrinalokuh ata Ngindrai andre kisa.
7 Pe wawu ngara karikai kiya hu sai aro, kultuwayi wawu mepo wawu ro aliy mamu.
8 Hapeko mahapo, ara wawu mbukena wawu akatali hu kultuw toro kene, tehe ndrinalokuh, ndrangsai, kultuw pwassin, hingas, rasusut nongan, pe kultuw para pipiye nongan pwalan mepo iyau hu ngusu wawu.
9 Pe wawu mbuna kapwasike hamou-hamou tawawu, paratesah, hu kultuw saken ta wawu, ara wawu kantali hu,
10 pe wawu kanrikai kinna kultuw howen, pe Ngindrai iyki lohongai iman paiwe para kapahasani Ndramat Imangsani wawu para mwense wawu kirayah tehe yiy opu.
11 Pwen pe, hu Ndramira Lah ndre hu Yutah, ndre ndramat sosondrih sangi hu ndre ndramat kansosondrih kinnata hu pwi, ndre ndramat para mawen, ndre hu ndramat lohoga hu pwi, ndre hu ndramat hutora mwoimwoi, ndre hu ndramat para pwandrendres, hapeko Kristus opu ara ita melit masih pe iripo kili worou masih.
12 Pwen tora ko, wawu tehe hu ndramat mepo Ngindrai kinrakinima wawu pwen, pe wawu ara haiyan pe ndriyan inamili wawu pe wawu ara neren imwonen, pwen pe wawu kasungoiwe wawu mbukenan kiya koisirai, pe kultuw pahalan, pe kultuw para akaiki wawu kasa pwan, pe kultuw waison, pe kultuw para akoro wayis o.
13 Pe wawu kapo hiyan kiya kili hamou-hamou, pe wawu karapiyani mwomwan ta hamou-hamou kapa hamou kirati hingorowa hamou. Pe akarapiyani mwomwan tehe Yapan kinrapiyaniy tawawu.
14 Pe mwalinga hu melit masih aro, ara kultuw para namiliwai, ara iho hin masih, pe wawu kasungoiwe wawu kiya aliy, mepo ngara kirawurani hu melit masih kaharong pe koro ndriya sih imwonen.
15 Pe ndriya wayis ata Kristus ara kiye mu kiro ndriya wawu, paratesah, wawu hamou-hamou ara para nombuwen hamou opu, Ngindrai iyoh wawu para akoro ndriya wayis. Pwen pe wawu karawuloh.
16 Pe nongna Kristus kipep kiro ndriya wawu pe wawu kahinuwani hamou-hamou kiya lohongai waison masih. Pe wawu kapowaliy kiya hu waliy handra-handra, pe hu waliy para puk para waliy, pe hu waliy mepo iyau kili Mwoiwan Haiyan, pe akarawuloh kiyau ndriya wawu kiya kili Ngindrai, pe akapa waliy.
17 Pe sehe melit mepo wawu mbusiy iya nongan ndre iya kultuw, ara wawu kambusiy masih kiya ngala Yapan Yesu, pe iyau kili Kristus opu, pwen akarawuloh kiya kili Ngindrai Tamarou.
Hu pwahanou ta hu ndrai sih mepo hu Kristen
18 Pe wawu pihin, ara wawu kaiki wawu mbukenan kaya pahandra hu kamai tawawu. Kultuw ara, ara imwonen iya mbulmara Yapan.
19 Pe wawu kamai, ara wawu kanamili hu pihin tawawu, pe kultuwayi wawu ara kiwayis kiya kili hu.
20 Pe wawu mbunah, ara wawu kahalingi tama wawuhu pe tina wawuhu kiya hu melit masih, paratesah, akambusiy toro, pwen andre kiyki pwesai kiya kili Yapan.
21 Pe wawu tamahu mbunah, ara wawu mbuna akawong kiyapolo ndrina lokuh kiya kili noru wawu hu, matisan kimbusi ndriya hu kimwa.
22 Pe wawu ndramat para pwandrendres, ara wawu koro ndruwa nongna hu namandran tawawu para kol pwan kiya hu melit masih wawu kambusiy. Pe wawu mbuna kaluwi lohongahu kiro mwonen hu koro nimnim kisa tawawu ko, hapeko wawu kambusiy kiyapolo ndriya wawu pe akoro pahandra nohowai ta Yapan.
23 Pe tesah wawu kambusiy, ara wawu kambusiy kiya polo ndriya wawu masih, tehe wawu pombulen iya kili Yapan pe kinna kili hu ndramat mepo hu namandran ta wawu, ara pwi.
24 Pe wawu kapahasaniy tehe andre wawu kawiri melit handra mwayih kiyau kili Yapan tehe kene wawu. Pe wawu tora mbusi mbulya Yapan Kristus
25 Pe ndramat mepo imbusi mwomwan, ara andre kikuni koran kiya hu mwomwan tan, paratesah, Ngindrai ara kinho hire pwi.