2
1 Pe yo unamiliy para wawu kapahasaniy tehe yo, ara ngara kupo mbulen pwokeyan para kusopwat wawu pe hu ndramat mepo hutora kol ngawan Layotisiya, pe hu masih mepo hu kanpahasani yo mapu.
2 Pe ndroiyin, ara para kupwokeyani mwoiwa wawu, pe para akoro ndriya sih pe akanamili wawu, pe andre akapep kiya hu lomwes, pe lohonga wawu andre kileu masih. Pe andre hu kapahasani nongan kokohe ata Ngindrai mepo ngalan ara Kristus.
3 Pe iyau kili yiy opu, pwen hu melit masih mwayih mepo hutora kohon para lohongai waison, pe lohongai iman, ara hutora kili yiy.
4 Yo upwai toro isa kili wawu para hamou mbuna kisa, pe kipakarawani wawu kiya hu hinonou pwasoyou para wawu karakokowai.
5 Paratesah, konan kunto sura wawu kinna nombuwe pwi, hapeko mwoiwo, ara uta sura wawu, pe upwes para kunime wawu kapo mbulen kimwonen. Pe upwes tehe wawu tora tine pwokeyan iya lohongai ndrisiyon tawawu iya kili Kristus.
Taleh ipep iyau kili Kristus
6 Pwen tehen tora ko, wawu kanwiri Kristus Yesu tehe Yapan tawawu, pwen wawu koro rikai sura yiy,
7 pe akarahatini wawu tehe kei ngondron isin iya pwan pe imandra, pe akoro tine pwokeyan kiya lohongai ndrisiyon tawawu, tehe akanwiri hinonou pwen kinna aliy. Pe akoro rawuloh kiya kili Ngindrai.
8 Pwen tora ko, mara wawu kiro, hamou mbuna kisa pe kipakarawani wawu kiya hu lohongai waison ta ndramat, pe kipwai kisata wawu kiya tesah para akapwotisingi lohonga wawu kiya aliy, mepo iyau hinonou para lohongani para kowase ndramat, pe mbulndroiyi kultuwaye hu mwomwoyou topo kol pwan, pe kinyau kili Kristus pwi.
9 Paratesah, kultuwaye Ngindrai masih, ara ipep iro kili Kristus pe isa iya nombuwe ndramat,
10 pe iyau kili Kristus opu, Ngindrai iyki taleh ipep isa kili wawu. Pe Kristus ara payan para pwoke masih, pe pwoke nopwaran masih.
11 Pe iyau kili yiy opu, kansosondrih sangi wawu iya sosondrih handra mepo kinyau nima ndramat pwi. Pe kultuwaye nombuwe wawu mepo iro mu isata wawu, ara Ngindrai kintapiyaniy iro mwonen Kristus isosondrih isata wawu.
12 Pe iro mwonen wawu wiri paptais, ara wawu kantoni hu kultuw ara pwen sura yiy, pe akansa tine sura yiy iya lohongai ndrisiyon tawawu iya mbulen ta Ngindrai, mepo kinhingini Kristus kintine kimat.
13 Pe wawu mat iya hu pakut mwomwan tawawu, pe iro mwonen kansosondrih kinsata wawu pwi, pe Ngindrai imbusi wawuro mwalen kili Kristus. Pe yiy irapiyani hu pakut mwomwan masih torou.
14 Pe Ngindrai irapiyani hu rasusut nongan mepo iyki nopwaran isa kiltou, para tukonto ndruwa nongan para pwahanou pwi, pe iyki korarou, pe irapiyaniy topwei pe irapaingiy iya kei tondrih.
15 Pe hu pwoke nopwaran masih, pe hu pwoke ta hu payit, ara Ngindrai kinpwalngani topwei. Pe Ngindrai kinramwaitini hu pwoke nopwaran masih, pe hu pwoke ta hu pohon, pe irehe hu huro yelan iho kei tondrih, para kiyki masirai kiya kili hu.
Koro mwoimwoi hu pwahanou para lohonga ndramat
16 Pwen tehen tora ko, hamou mbuna kirasusut nongan kisa kili wawu kiya tesah wawu ngara kayan, ndre tesah wawu ngara kayin, ndre kiya lang sih haiyan namandran, ndre kiya totohun pe para kasolowani Walah sih Mambulen, ndre lang Sapat sih.
17 Hu melit aro ara sumwoiwa hu melit mepo andre kisa kamulan, pe hu melit ndrokonan, ara ita kili Kristus.
18 Pe hamou mbuna kisa pe kipwasike wawu para kiyki wawu kaya pwan kiya totohun kiya kili hu angelou, pe hu kambusi wawu tehe ngala wawu pwi. Hu ndramat tehen tora, ara ngara hu kawong kiya lohonga ndramat iya tesah hu kannimei. Pe ngara hu koro ndruwa lohonga ndramat para pwan o mwaihei.
19 Pe hu ndramat tora, ara hu kantali Kristus mepo yiy ara payan, pe iyau kili yiy opu, nombuwen hamou mwanye ara ippai iyawule sura yiy. Pe hu weye ndramat pe mongo ndramat huppai iya harong, pe hu mandra tehe Ngindrai imbusi hu para hu kamandra.
20 Pe wawu kanmat kinna polo Kristus kinna hu pwoke para hu pakut mwomwan para kol pwan, pe iya pwoke para hu mwomwoyou, pwen paratapeh pe wawu mbusiy tehe wawu para kol pwan manau? Wawu tora ndruwa hu pwahanou para aliy manau, ndre?
21 Pe “Wawu mbuna kambultuwei! Pe mbuna kahingorowe kanan! Pe nima wawu mbuna kiyahatek kiya aliy!”
22 Hu nongan para pwahanou masih mepo iwong toro, ara andre kihipwen, pe iyau hinonou ta hu ndramat mepo hu pwandrandrahani hu ndramat pe hu hinonou ta hu.
23 Pwen hu nongan para pwahanou toro, ara pakimbusiy tehe lohongai waison iro aliy, pe imbusi i para lohonga ndramat kitine para katotohun, pe para kiyki ndramat kiya pwan, pe kiyki nopwaran kiya nombuwe ndramat. Hapeko hu nongan para pwahanou tehen tora, ara kinlahiy para kisopwat, para kirapiyani hu namiliwai pwassin para nombuwe ndramat pwi.