Nongan Pol iratuluwiy iya kili hu
Kolossi
Nongan imu
Kolossi ara kol ngawan hakol ita kol namandran iya Esiya. Pe kinto mwanan kol ngawan Epesus pwi. Pol mbukenan kinmbultani hu ndramat para hukarokum kiro kol ngawan Kolossi, ara pwi, hapeko iro mwonen Pol iro Epesus, nimnim para aliy, ara tehe yiy ipwandrisa hu ndramat para hu kambusi mbulen para pohoweya nongan kiya hu kol hayah, para kol namandran iya ara, pe huya Kolossi yi.
Pol ihilong tehe hu ndramat hayah, ara yihu pakapakarawani lohongai ndrisiyon tahu Kolossi, pwen tehen torako, iratuluwi nongan iya kili hu, para kipwokeyani lohongai ndrisiyon tahu. Pe yiy ipa Kristus ara yiy payan para melit masih. Pe Kristus opu, ara ilahiy para kirakonihi rou, pe kinlahiy para sopwat torou kiyau sai hayah pwi. Yihu andre kaluwi worou kaya mawen kili Kristus o. Pe iyau kili Kristus opu, Ngindrai imangsani melit masih, pe iyau mbulen Kristus imbusiy, ara Ngindrai inamiliy para kirakonihi hu melit masih kamui kaya kili yiy. Pe Kristus ara iripo nondriyarou, pe worou turayah ndramat howen, pe turopo ndruwa kultuw ta Kristus mbukenan.
Pol iratuluwi nongan iye pe iykiy iya kili hilu ndramat malmou, pe hilu wiriy nongan ara iya Kolossi. Ndramat hamou imu, ara Tikikus, pe hamou ihomulan kili yiy, ara Onesimus, ndramat aro, ara Pol iwong soyon iyatan iya nongan mepo iratuluwiy iya kili Pilemon.
1
1 Yo Pol, yo aposel hamou ta Kristus Yesu iyau namiliwai pwokeyan ta Ngindrai, irakinimo pe urayah aposel hamou. Yo iyapolo nali worou Timoti,
2 yolu ratuluwi nongan isa kili wawu ndramira Ngindrai haiyan, pe nali yowu pe pisu yowu, mepo wawuiki lohongai ndrisiyon tawawu iya kili Kristus, mepo wawu tora kol ngawan Kolossi. Pahas pe ndriya wayis iyau kili Ngindrai Tamarou, ara kiro sura wawu.
Paul irawuloh pe itohun
3 Pe lang masih iro mwonen yowu ngara katohun kisata wawu, ara yowu ngara karawuloh kiya kili Ngindrai, yiy mepo Tama Yapan torou Yesu Kristus.
4 Paratesah, yowu kanhilong tehe wawuiki lohongai ndrisiyon tawawu iya kili Kristus Yesu, pe ndriya wawu ngara kimbulihi hu ndramira Ngindrai masih—
5 lohongai ndrisiyon pe kultuw para namiliwai tawawu iya melit mepo itapo isa, hu melit mepo Ngindrai kinrawuraniy pwen ata wawu, ita kol paingan yang. Pe wawu kanhilingiy pwen ita nongan ndrokonan para nongan hiyan,
6 mepo kinsa kili wawu. Pe iya harong tehen tora ko, kol pwan masih ara nongan hiyan iye ara kinsilihiy pwen, pe kinmandra, pe kinippwai. Pwen tehe kintayah pwen mwalinga wawu tandrohonga lang wawu hilingiy, pe wawu wiriy pe lohonga wawu ileu iya pahas ta Ngindrai, pe nongan ndrokonan masih para aliy.
7 Pe wawu kanwiri hinonou para aliy kinyau kili Epapras, yiy nali yowu hamou mepo para nere yowu imwonen, pe para poya mbulen tehe yolu. Pe yiy hamou tahu mepo iyki lohongan ndrisiyon iya kili Kristus, pe ngara kipo mbulyan, pe ngara kiwiri noku yowu pe kisa pohowe nongan hiyan kisa kili wawu.
8 Pe yiy ngara kitiyaniy kisa kili yowu yi kiya namiliwa wawu iya kili Mwoiwan Haiyan.
9 Pe tunan aro ko, pwen iro mwonen lang yowu hilong titiye tawawu, ara yowu konho ngoh para katohun tawawu pwi. Lang masih yowu ngara kawaiyaniy para kasok Ngindrai para kimbusi lohongai iman tawawu kihon kiya namiliwai pwokeyan atan, mepo iyau lohongai waison masih pe lohongai ileu mepo Mwoiwan Haiyan ngara kiykiy.
10 Pwen pe andre wawu kahaiyani tokuya wawu kiya hiyan kiya kili Yapan, mepo andre kiyki pwesai kiya kili yiy kiya sai masih. Pe akapwaingani hu kultuw mepo iyau hu mbulen hiyan, pe akamandra kiya lohongai iman ata Ngindrai.
11 Pe yowu tohun tehe akoro pwoke kiya pwoke masih ta Ngindrai mepo pwokeyan masih, pwen pe andre wawu kawiri pwoke namandran, pe andre akoro nondriya pwesai, pe akoro wayis o.
12 Pe andre wawu karawuloh kiyapolo pwesai kiya kili Tamarou, yiy mepo imbusi wawu lahiy para akapo hu melit hiyan ta hu ndramat haiyan atan, mepo ita kingtom mepo ma ngannganan.
13 Paratesah, yiy kinsopwat worou tukansa mawen pwoke para kol lokuhan, pe iyki worou tuya nondriya kingtom ta Norun Kamai mepo neren imwonen,
14 yiy mepo irakonuhi worou tumui pe itali hu pakut mwomwan torou.
Noru Ngindrai Kamai mepo ihohin iya melit masih
15 Pe Norun Kamai ara mwensen tehe Ngindrai mepo tukonho nime yiy pwi, pe yiy ara ndrohan imu iya hu melit masih mepo Ngindrai imangsani hu.
16 Paratesah, iyau kili yiy opu, pwen Ngindrai imangsani hu melit masih husarayah: hu melit para kol paingan yang, pe hu melit para kol pwan, pe hu melit ngara kanimei, pe hu melit mepo konho nimei pwi, pe hu ndrohonoku pwanpwan ta hu king, ndre hu pwoke, ndre hu pwoke nopwaran, ndre hu pohon, hu melit masih ara, ara yiy imangsaniy hu huyau kili yiy, pe hu atan.
17 Hu melit masih mapu, yiy ara irum iro, pe yiy opu ipwahatini melit masih huppai huya harong.
18 Pe yiy ara payan tahu ndramat mepo hu ngara karokum, pe hu ndramat hu rokum ara, ara nombuwen, pe yiy ara ndroiyi melit masih, pe irayah tehe ndrohan mwalinga hu ndramat kanmat para itine kimat imu. Pwen nondriya melit masih kene, ara yiy mbukenan andre kihohin.
19 Paratesah, Ngindrai ara ipwes tehe kultuwayin masih, ara ihan iro kili yiy,
20 pwen iyau kili Kristus opu andre kirandropwe hu melit masih kaya kili yiy mbukenan, hu melit masih para kol pwan, ndre hu melit para kol paingan yang, para andre kiyki ndriya wayis kiyau ndreyen mepo imuw iho kei tondrih.
21 Pe mamu ara wawuro mawen kili Ngindrai, pe wawu rayah tehe hu ndramat hu mwisnani yiy iya lohonga wawu, paratesah, iya kultuw pwassin ata wawu.
22 Hapeko mahapo, ara kintandropwe wawu iya nombuwe Kristus irayah ndramat, pe imat, para kiyingani wawu tehe wawu haiyan iya mbulmaran, pe hape mwomwan kinto pwi, pe wawu tora mwoimwoi pe tora mwonen masih pe mwomwan mbuna kiro, pe wawu koro mwoimwoi kiya tasusut nongan ta hu ndramat—
23 pe kapa akoro rahatini lohongai ndrisiyon ta wawu kiro pwoke manau, pe lohonga wawu ara kinmeu kinna nongan hiyan iya melit itapo isa pwi. Pe nongan hiyan iye ko mepo akanhilingiy, pe kanpohowei pwen kinna kili hu ndramat masih para pahandra kol paingan yang, pe yo Pol urayah ndramat hamou para poya mbulya nongan ara.
Pol ipombulya hu ndramat hurokum
24 Pe yo mahapo, ara upwes para kukuni nopwaran kiya nombuwe kisata wawu. Paratesah, yo ukuni nopwaran iya harong o tehe Kristus ikuni iya nombuwen, pe nombuwen ara hu ndramat mepo hurokum.
25 Pwen yo kuntayah ndramat para poya mbulya hu ndramat hurokum, pe Ngindrai irakinimo para kupohowe nongnan masih kisa kili wawu—
26 pe nongan kokohe mepo iro kohon kili hu hasap iyau hasap mamu kanna, hapeko mahapo, ara kinsa yelan ngawan kinna kili hu ndramira Yapan haiyan.
27 Pe Ngindrai irakinima hu para lohongan, ara andre hu kapwaingani nongan para nganngana hu melit hiyan para nongan ndrokonan kokohe iye para kiya ngawan kili hu Ndramira Lah. Pe nongan ara, ara Kristus mepo ita kili wawu, pe wawu andre kawiri nonowa pwoke para melit hiyan mepo itapo isa.
28 Yiy mepo yowu topo pohowe nongnan, pe yowu topo pwahanou pe topo hinuwani hu ndramat masih iyapolo lohongai waison masih, pwen pe hu ndramat masih lohongahu andre kiman, pe andre yowu kaiki hu kaya kili Kristus.
29 Pwen urupo mbungas pwokeyan iya, iya pwoke mepo Kristus iyki pe iripo pombulen kili yo.