4
1 Pe ara urakamam isa kili wou iro mbulmara Ngindrai pe Kristus Yesu mepo andre kapwokeyani nongno. Pe iya kili yiy mepo andre kirayah ndramat para tamwanye tahu ndramat kanmat, pe hu ndramat mwalen, pe yiy andre kiro mu kiro kingtom tan:
2 Pe lang masih ara aro hinehes kapa lenge melit ndre lengen pwi para apohowe nongan, pe apwahanou hu ndramat, pe amwanyehu, pe apomate hu, pe apwokeyani hu para hukoro mbusi tesah hiyan—pe ahinuwani hu kiya nongna Ngindrai, pe lang masih ara aro wayis o.
3 Paratesah, lang itapo isa, ara hu ndramat andre kannamiliy para kahalingi hinonou ndrokonan pwi, hapeko andre hu koho ndruwa namiliwahu mbukenan. Pe andre hu karawurani hu ndramat soyon para hinuwani nongan, para kawong kiya nongan mepo andre hukanamiliy para kahalingiy.
4 Pe andre hu kandrihisaniy para kahalingi nongan ndrokonan, pe kaiki ndraingahu kiya hu pweheriy.
5 Hapeko wou Timoti, nondriya hu nopwaran masih, ara aponokulani lohongam, kiro mwonen aya pe hu ngandran, pe awayis o amin, pe apohowe nongan kiya kili hu ndramat mepo hu kanhilingiy mapu. Pe mbulen masih Ngindrai iykiy isa kili wou, ara ambusiy topwei.
6 Paratesah, uiki mwoiwo tehe yukyuk sih, pe lenge para andre kutali kol pwan, ara kinsa pakeh.
7 Pe kunpombulen hiyan iya mbulyo tehe upo pahun, pe ngapilai to, ara kinsa hapwen ara. Pe upwahatini lohongai ndrisiyon to.
8 Pe kene para uramwaitini pahun, ara ita sohe yo ita kol paingan, kene ara, ara kasapai para kultuw imwonen. Pe Yapan kultuwayin imwonen para tamwanye, ara andre kiyki kene kiro mwonen lenge tamwanye, pe andre kiniykiy kinsa kili yo ko ara pwi, hapeko andre kiyki kene hu masih i mepo hu namiliy para hu kanime yiy kimui.
Hu nongna Timoti
9 Pe anohonou pwokeyan para asa kili yo kileh,
10 Pe upwai toro, ara paratesah, Temas inamili kultuw para kol pwan pe kintali yo pe kinna kol Tesalonaika. Pe Kresens kinna kol Kalatiya, pe Titus kinna kol Talmatiya.
11 Pe Luk opu ara iripo sura yo. Pe asa awiri Mak kisa polo wou pe walu kasa. Paratesah, yiy ara isopwat yo hiyan iya, iya mbulyo.
12 Pe upwandrisa Tikikus kinna kol Epesus.
13 Pe kiro mwonen nasa, ara awiri tamburuho mepo utaliy itandron kili Karpus ita kol Trowas. Pe awiri hu puk maiye ato, hu puk mepo mangsaniy iyau kapilo sipsip.
14 Pe Aleksantar mepo ngara kimbusi melit kiya paras, ara iyki ngandran namandran isa kili yo. Pe kamulan Yapan andre kiyki koran kiya kili yiy kiya tesah kinmbusiy.
15 Pe wou i ara aro hinehes para apenani wou kiya tan, paratesah, ngara kirakokowani nongna rou pwokeyan.
16 Pe lang imu mepo uro tine nongan para kupenani yo mbukeno, ara hamou kinto para kisopwat yo pwi, hapeko hu ndramat masih hutali yo. Pe utohun tehe Ngindrai andre kitali mwomwan tahu.
17 Hapeko Yapan iro tine polo yoy, pe iyki pwoke isa kili yo para kiyau kili yo kopu, nongna Ngindrai andre kapohowei kiya kili hu Ndramira Lah masih, pe andre hu kahalingiy. Pe Ngindrai iwiri yo usa mawen poho layon.
18 Pe Yapan andre kisopwat yo kiya hu kultuw mwomwan masih ta sinai mepo pakipwalngani yo, pe andre kiwiri yo pe kipwokerani yo kuro hiyan kiya kingtom tan ita kol paingan yang. Pe tukahari ngalan kinto pe kinto. Ndrokonan.
Nongan iya hapwen
19 Pe apa ndrokololang to kiya kili Prisilla, pe Akwila, pe hu ndraisih ta Onesiporus.
20 Pe Erastus ara ita ndron kol ngawan Korin, pe Tropimus imwa pe utali yiy ita ndron kol ngawan Miletus.
21 Pe nowou mapu kinsa, ara anohnou para apwokeyani wou pe asa kileh.
Pe Yupulus, pe Putens, pe Linus, pe Klautiya, pe hu nalitou hu pe pisutou hu masih, ara hupa ndrokololang isa kili wou.
22 Pe Yapan kiro sura mwoiwam. Pe pahas tan kiro sura wawu masih.