3
Lenge Yapan
1 Wawu kowase mepo nere imwonen, iye ara nongno luhin uratuluwiy isa kili wawu. Pe uratuluwi nongan malhin kene, ara para kirakelehani lohonga wawu para kiro mwonen pe akoro lohongani hu melit masih aro.
2 Pe unamiliy para akalohongani hu nongan hu poropet haiyan hu kanpwai mamu kinna, pe nongan para pwahanou mepo Yapan Ndramat para Sopwat iyki nongan iyau kili hu aposel tawawu.
3 Melit namandran lohonga wawu kileu kiya aliy, ara tehe lang nakiya hapwen, hu ndramat ngara hu koro ndruwa namiliwa nombuwe hu pwassin ara hu mbukena hu, ara andre hu kasarayah pe hu kapwasimiri wawu.
4 Pe andre hu kasok hu kapa, “Yesu itandrangan tehe andre kimui paiwe yi, ndre? Pe yiy aleheh? Pe iro mwonen hu tumburou hu humat isa matnen mahapo, melit masih ara, ara iripo ndron toro ko tandrohongan kol pwan irayah.”
5 Pe hundrihisani lohongai ndrokonan tehe koluw kinna, iyau nongna Ngindrai opu, imangsani kol pwan, pe kol paingan yang. Pe kol pwan, ara irayah iyau ndran, pe ndran opu, kol pwan irayah iyau aliy.
6 Pe iyau kili hu ndran iye ko, non irah, pe ipwalngani kol pwan iya aliy.
7 Pe iyau nongna Ngindrai ara kopu, ipwahatini hu kol paingan yang pe kol pwan, para mwan andre kitimwiy. Pe ipwahatiniy iripo para kiro longe lenge tamwanye ta hu ndramat hu kukonho totohun pwi, pe Ngindrai andre kipwalngani hu.
8 Hapeko wawu kowase mepo nere imwonen, lohonga wawu mbuna kimayit melit handra aro: Tehe iya kili Yapan, ara lang sih ara tehe hayou masopou, pe hayou masopou ara tehe lang sih o.
9 Pe Yapan ara ngara kihimbuh o para kimbusi tesah irandrangan iya aliy, ara pwi, tehe hu hayah ngara kalohonganiy. Pwi, kultuwayin ara waison o isa kili wawu, pe mbuwalin para hamou kisongsin, hapeko ndramat masih hu karapaiwani ndriyahu pe hu katali hu pakut mwomwan.
10 Hapeko lenge Yapan ara andre kisa tehe ndramat para pahana. Kiro mwonen lang ara, hu kol paingan yang andre hu kammun kiyapolo ngaliyai namandran kiro yang, pe melit masih hutora yang ara Ngindrai andre kitimwiy pe kipwalngani hu. Kiro mwonen lang ara, melit masih iripo kol pwan andre kisa yelan pe Ngindrai andre kipwalngani hu.
11 Kapa melit masih Ngindrai andre kipwalnganiy kiyau sai toro, pwen akaponokulani tokuya wawu. Pe wawu koro haiyan pe akaiki wawu masih kiya kili Ngindrai.
12 Pe akambusi kultuw aro para akoro longe Ngindrai kihileh kisa pakeh. Lang ara hu kol paingan yang ara Ngindrai andre kipwalnganiy kiya mwan, pe ngandraha mwan andre kirangandrihi hu melit masih para kol paingan yang pe kirayah tehe ndran.
13 Hapeko worou tutopo longani tesah Ngindrai kintandranga worou kinna aliy, iya kol paingan yang hakol howen, pe kol pwan hakol howen, mepo kultuw imwonen opu andre kiro aliy.
14 Pwen tehen tora ko, wawu kowase mepo nere imwonen, akahatini wawu pe wawu koro longe lengen, ara akambusi kultuw mepo hiyan pe akoro mwonen kiya mara Ngindrai, pe ndriya wawu kiro wayis sura yiy.
15 Pe Yapan torou iripo hinokule, pe kinsa kileh pwi, ara iyki lang para hu ndramat karapaiwani ndriyahu, pwen andre kisopwat. Pe nali worou Pol mepo tunamili yiy, ara iratuluwi nongan iya harong o tehe mahapo urupo pwai. Pe iratuluwi hu nongan, ara iyapolo lohongai waison mepo Ngindrai iykiy iya kili yiy.
16 Pe hu nongnan masih iratuluwiy ara iyawule handra ko. Pe iwong iya hu lohongai masih aro, pe hu nongnan ara ngandrahan iya para lohongai ndramat para kileu kiya aliy. Pe hu mepo ngara kandrihisani nongan, pe lohongai kinmayum pwi, ara huratiyani iyapolo pwasosou. Pwen tehe hu ngara kasuluyani kiya hu Nongan Haiyan hayah i. Pe hu mbusiy tora, pwen hupwalngani hu mbukenan.
17 Pe tehen tora ko, wawu kowase mepo nere imwonen, wawu kanwiri pwahanou, pwen pe akoro hinehes pe mbuna akoho ndruwa mwomwan tahu mepo hu ndrihisani nongan para pwahanou, pe akatali ndrohonoku wawu hiyan.
18 Hapeko akamandra kiya pahas pe lohongai hiyan ata Yapan pe Ndramat para Sopwat Yesu Kristus torou.
Pe tukahari ngalan mahapo pe lang masih! Ndrokonan.