Nongan sahin Yohanes iratuluwiy
1 Yohanes
Nongan imu
Nongan ratuluwiy iye ara ndroiyin malndra. Yiy inamily para kisopwat hu Kristen para hukoro ndriya sih polo Ngindrai Tamarou, pe Norun Kamai Yesu Kristus. Pe mbuwalin para yihu ndramat tora lokuhan ara mbuna hu kapwaske hu, pe kapakarawani hu pe hu katali Ngindrai.
Hu “ndramat para lokuhan” aro, ara ngara hu kapa, hu melit iripo kol pwan iye ara hiyan pwi. Pe Yesu ara yiy Noru Ngindrai, pwen pe yiy ara andre kirayah ndramat ndrokonan, pe kippai kiyapolo hu melit para kol pwan tehe worou ndramat topo mbusiy. Pe yihupa, ndramat mepo pakiro hiyan kiyapolo Ngindrai, ara mbuna kilohonge kiya hu melit para kol pwan. Pe kultuw imwonen pe kultuw para namili hu ndramat hayah, ara yi, ara hu melit para kol pwan o mwaihei. Pwen pe lohonga wawu mbuna kimwa para akoro ndruwa hu kultuw tehen tora.
Yohanes ara kinamiliy para hu Kristen kahilingi hu nongan tehen tora, ara pwi. Pe ipa, Yesu ara kintayah ndramat ndrokonan, pe hu ndramat mepo huiki lohongahu ndrisiyon iya kili Yesu, ara yihu kanamili Ngindrai tisingiy pe yihu kanamili hu ndramat hayah tisingiy i.
1
Nongan para taleh
1 Nongan para taleh ara para koluw-koluw mamu kinna ma melit masih mapu kantayah, pe yowu kanhilingiy, pe yowu kannimei kinna mara yowu, pe mara yowu kinnime yiy, pe nima yowu kinnahatek kinna kili yiy—Nongan para taleh ara ko, yowu topo pohowei.
2 Pe taleh ara, ara kinsa yelan, pe yowu kannimei, pe yowu topo tiyaniy, pe yowu pohowe nongan para taleh mepo andre kinto-kinto, kisa kili wawu mepo iro kili Tamarou pe kinsa yelan kinsa kili worou.
3 Pe yowu, ara yowu pohowe tesah mepo yowu kannimei pe kanhilingiy, pwen pe andre wawu yi kambultere wawu kasa sura yowu. Pe mbultere torou, ara iyapolo Tamarou, pe iyapolo Norun Yesu Kristus.
4 Pwen yowu ratuluwi nongan aro, ara para kimbusi worou kapep kiya pwesai.
Karikai nondriya nganan
5 Pwen nongan aro, ara yowu kanhilingiy iyau kili Yesu Kristus, pe yowu pohowei isa kili wawu: Pe Ngindrai, ara nganan, pe lokuhan kinto kili yiy pwi masih.
6 Pwen kapa tukapa worou ngara kambultere para totohun kiya kili Ngindrai, hapeko ngara koro tokuyani kultuw para lokuhan manau, pwen ara tupwasoyou pe tukantokuyani nongan ndrokonan pwi.
7 Hapeko kapa tukarikai kiya nganan, tehe yiy, ara ita nondriya nganan, ara tumbultere iyawule sura hamou-hamou, pe ndreye Norun Yesu, ara imbusi worou turayah howen iya hu pakut mwomwan torou masih.
8 Pe kapa tukapa pakut mwomwan kinto kili tou pwi, ara tupwaske rou mbukenan, pwen nongan ndrokonan, ara kinto kili tou pwi.
9 Pe kapa tukapohopoh kiya hu pakut mwomwan torou kiya kii Ngindrai, pwen Ngindrai, ara lohongan ndrisiyon pe kultuw tan para tamwanye, ara imwonen, pe ilahiy kitali hu pakut mwomwan torou, pe kimbusi worou karayah howen kiya hu kultuw kanmwonen pwi.
10 Pe kapa tukapwai kapa, tukonho mbusi pakut mwomwan pwi, pwen tumbusi Ngindrai irayah tehe ndramat hamou para pwasoyou, pe nongnan, ara kinto kiltou pwi.