2
Hu ndramat para hinuwani nongan pwasoyou pe kultuwayi hu mepo pwalngengei
1 Hapeko mamu kinna i, ara hu poropet para pwandrandraman huro mwalinga hu ndramira Ngindrai pe huro wong pwasoyou iya ngala Ngindrai. Pe tehen tora ko, hu ndramat para hinuwani nongan pwasoyou andre hu koro mwalinga wawu. Pe andre hu kasa kokohe ko pe hu kahinuwani hu ndramat kiya nongan para kipwalngani hu. Pe yihu andre hu kapa hukowu ta Yapan Namandran tahu mepo kinrakonuhi hu iya hu pakut mwomwan tahu. Pe hu mbukenahu andre hu kambusiy, pe kindrou pwi ko Ngindrai andre kipwalngani hu.
2 Pe hu ndramat soyon andre hu koro ndruwa hu kultuw pwasin para nombuwe hu. Pe andre kimbusi hu ndramat kapwasimiri nongan para pohosai ndrokonan.
3 Pe yihu ndramat para hinuwani nongan aro, ara andre hu kahamwolou, pe andre hu katiyani titiye kiya lohongahu mbukenan para kipwasike wawu para andre hu kapo melit hiyan kiyau aliy. Ngindrai kiniyki korahu ita mwoimwoi pwen mamu kinna, pe andre kimbusiy, pe ndramat mepo andre kipwalngani hu, ara ita poyoi.
4 Paratesah, mamu kinna hu angelou hu mbusi pakut mwomwan, pe mwomwan hu mbusiy ara, ara Ngindrai kinpa pwi kinna aliy pwi, hapeko ipwandrisa hu iya ngat mbulun pwi, pe iyki hu hutora kou lokuhan para hukoro aliy kipoo kirahihini lang para tamwanye.
5 Pe wawu pahasaniy, mamu kinna hu ndramat konto pahandra nohowai ta Ngindrai pwi, pwen korahu ndramat hu konho totohun pwi, ara Ngindrai isumuluwani hu iya non. Hapeko isopwat Nowah pe hu ndramat andrtimou i, pe tandrohongan ara, ara Nowah iro pohowe nongan para kultuw imwonen.
6 Pe kapa Ngindrai kiniyki kora kol namandran malkol Sotom pe Komorrah, pe itimwiy isongut iya palam, pwen ipwainganiy toro para andre kimbusiy kiya harong o kiya kili hu ndramat mepo hu konho totohun pwi;
7 pe kapa Ngindrai kinsopwat Lot, yiy ndramat hamou kultuwayin imwonen, mepo kinhopwes kinna kultuw pwassin para nombuwe ndramat pwi, pe para ndrihisani nongan para pwahanou;
8 (Paratesah, ndramat mepo kultuwayin imwonen ara, ara iro mwalinga hu ndramat mwomwan ara, pe lang masih ngara hu karatti hingorowan iya melit mwomwan mepo ngara hukambusiy, pe kihilingi hu nongan pwassin hu ngara kapwai, pe ndriyan ngara kiporu)—
9 pe kapa Yapan ngara kimbusiy toro, pwen ilahi para kisopwat hu ndramat mepo hu ngara katotohun para kasa mawen hu nopwaran. Pe hu ndramat mepo kultuwayi hu kinmwonen pwi, ara andre kiroiki korahu kipoo kirahihini lenge tamwanye.
10 Pe ndrokonan tehe Yapan andre kiyki kora hu mepo huho ndruwa kultuwayi nombuwe hu pwassin, pe hu ngara kandrihisani pwoke nopwaran ta Ngindrai. Pe yihu ara pwokeya hu iya, pe hu ngara karambubungas pe hu konho noh para kapwasimiri hu angelou pwi.
11 Pe konan hu angelou pwoke tahu ara pwokeyan iya, ara yihu konho pwasimiri hu angelou mepo Ngindrai irasse hu, iro mwonen huro tine nongan iro mbulmara Yapan, ara pwi.
12 Hapeko hu ndramat aro, ara hu pwasisiman iya hu melit mepo lohongahu kinileu kinna aliy pwi. Yihu ara tehe hu kan lohongahu pwi, hu kan puyap mepo tinahu imwalahiy iyatahu mepo hu ndramat andre kalohi hu pe kapwalngani hu. Pe tehe hu kan mepo andre katingundru hu.
13 Ngindrai andre kipo soiwi nopwaran kiya kili hu, mepo huiki nopwaran. Hu ndramat para hinuwani nongan pwasoyou aro, ara hupa andre hiyan para hukapwes para kambusi namiliwa nombuwe hu pe kayan anandrinai, pe kayin ndran tunguyan kiro ping o, ara pwi, hapeko lang i. Pe iyki pwesai iya kili hu mbukenan para hu kappai sura wawu pe hu kanamnam. Hu mbusiy toro, para kimbusi ngala hu kiya mwomwan kiya kultuwayi hu.
14 Pe hukonho lohongani lohongai hiyan pwi, hapeko mara hu, ara ipep pilah o, pe hukonho ngoh para hu kambusi pakut mwomwan pwi. Pe hu pakarawani hu ndramat mepo hukanpwotisingi lohongahu kinna kili Kristus pwi, pe hu luwani hu para hu kambusi pakut mwomwan, pe hu ndrokotina kultuw mwolou. Pe hu melit mwomwan masih hu ngara kambusiy ara, ara imbusi Ngindrai kiniten anahu.
15 Yihu kantali sai imwonen pe hu kansongsin hutora ndruwa saya Palaam noru Peyor mepo inamili singayai para kimbusi kultuw pwassin.
16 Hapeko tongkiy ipomate yiy iya mwomwan tan mepo imbusiy—kan hamou mepo kinho wong pwi—pe iwong tehe ndramat hamou para poropet ara kintali ngou tan.
17 Yihu ndramat aro, ara tehe hu ndramwiying mepo hu kansapak, pe tehe hu kokom mepo nohai ngara kihiliy iya. Ngindrai kinmwaniyani nokuhu pwen ita kol lokuhan lokuhan masih.
18 Paratesah, hu ngara kawong kiya hu nongan para kasikiye hu, pe hu nongan para pwasosohou o mwaihei. Pe hu mbusi hu kultuw mwomwan iya nombuwehu, para suhuhuri lohongahu ndramat mepo mahapo ko husa mawen hu kultuw mwomwan ara, para hu mbuna karikai kiya kultuw imwonen.
19 Pe hu tandrangan iya kili hu tehe andre hukoro mwoimwoi, hapeko yihu mbukenahu, ara hutora pwandrendres para hu kultuw mepo andre kipwalngani hu–—paratesah, sehe melit irayah namandran tahu, ara hurayah pwandrendres para melit ara.
20 Pe kapa hu ndramat ara hu kansapahasani Yapan torou pe Ndramat para Sopwat Yesu Kristus, pe husa mawen hu kultuw mwomwan para kol pwan. Pe hu kanramwaitini hu kultuw ara pwi, pwen kapa hu kamui hukaya kultuw tahu para mamu, pe hu kamwisnani Kristus, ara andre hu kaya pwalngengei o mwaihei iramwaitini kultuwayi hu para mamu.
21 Hiyan masih para hu mbuna kapahasani sai para kultuw imwonen, paratesah, hu pahasaniy pe iyamulan huiki ndruwa hu iya pwahanou haiyan ta Ngindrai mepo ihinuwani hu iya aliy.
22 Hu melit kantayah aro, ara hu lohongai waison ndrokonan, “Mwiy hamou kilomut ara andre kimui kiya lomuran pe kiyniy,”pe, “Puw hamou mepo kinnu, ara andre kimui kiya pwipwiy pe kiluhuhui kiya pwan.”