Nongan luhin Pita iratuluwiy
Pita
Nongan imu
Ndroiyi lohongai para nongan ratuluwiy aro, ara para kapwai kiyatahu Kristen para hu mbuna kahilingi nongna hu ndramat hayah para hinonou, mepo hu tora rikai, para pwalngani lohongai ndrisiyon pe kultuw hiyan tahu. Pe yihu kapwahaniti tisingi nongna hu aposel huikiy iya kili hu. Pe iya kultuw ara ko andre yihu kapahasani Ngindrai hiyan, pe Yesu Namandran Kristus. Yihu aposel, ara yihu nime Yesu iya mara hu mbukena hu, pe yihu kanhilong tehe Yesu kinhinuwani hu.
Yihu ndramat hayah ara hupwai pwen tehe Yesu ara andre kinimui paiwe pwi. Pe nongan ratuluwiy aro, ara ipa andre kimui paiwe. Ndrokonan para aliy, ara yiy andre kinsa kileh pwi, hapeko ndroiyi lohongai para aliy ara ipa, Ngindrai kinnamiliy para ndramat hamou kisongsin, ara pwi. Yiy inamiliy para hu ndramat masih ara yihu karapaiwani ndriyahu, pwen tehen torako, ara wasion o para hu ndramat, pe yiy ara hukoro longe manau (3.9).
1
1 Yo Simon Pita ndramat hamou para poya mbulen pe aposel hamou ta Yesu Kristus. Uratuluwi nongan iye iyau kultuw imwonen ta Ngindrai torou, pe ta Ndramat Para Sopwat Yesu Kristus isa kili wawu, mepo wawu pwotisingi lohonga wawu mepo mwayih masih tehe ta yowu ko.
2 Pahas pe ndriya wayis ta Ngindrai ara kihon kisa kili wawu kiyau lohongai iman ta Ngindrai, pe ta Yapan Yesu torou.
Ngindrai iyoh worou pe irakinimarou
3 Pe iyau pwoke ta Ngindrai mbukenan, yiy kiniyki melit masih mepo tundroisiy para taleh hiyan iyau lohongai iman atan. Pe Ngindrai iyoh worou iyau pwoke pe kultuw mwayih tan mbukenan.
4 Pe iyau hu kultuw mwayih tan mbukenan aro, yiy kintandrangan pe kiniyki hu melit mwayih masih, pe namandran iyau kili hu yukyuk aro. Pwen hu melit irandrangan iya aliy aro, ara wawu andre koro mwoimwoi pe andre akanamiliy para akanmbusi hu kultuw mwomwan pwi, mepo hu ndramat hukanpwotisingi lohongahu kinna kili Ngindrai pwi ngara kanamiliy para kambusiy, pe ngara kipwalngani ndriyahu. Pwen andre kultuwaye wawu ara andre kiro hiyan tehe ata Ngindrai.
5 Pe tehen torako, akanohonou pwokeyan para akaposura lohongai ndrisiyon tawawu kiyapolo kultuw hiyan iya lohongai iman; pe akapo sura lohongai iman pe kultuw hiyan;
6 pe akaposura lohongai iman, ara akaponokulani wawu. Pe akaposuran i, ara akarahatini wawu. Pe akarahatini pe akaposuran, ara kiyapolo kultuw para koro totohun.
7 pe akaposuran ara kultuw para totohun kiyapolo kultuw para koisirai, pe aposuran ara kultuw para koisirai kiyapolo kultuw para namiliwai.
8 Paratesah, kapa wawu kambusi hu kultuw hiyan aro pe kihon kiro kili wawu, ara andre kirakelehani wawu para akambusi melit hiyan, kiropo kiya ko, kiya lohongai iman ta Yapan Yesu Kristus torou.
9 Hapeko yiy mepo kintokuyani lohongai aro pwi, ara yiy tehe ndramat kinoho nimnim hiyan pwi pe maran iyoh. Pe koyu hu kintut tehe Ngindrai kinmbusi yiy kintayah howen iya hu pakut mwomwan tahu para mamu.
10 Pe tehen tora ko wawu nali pe pisu, akapwokeyani wawu tehe Ngindrai kiniyoh wawu pe kinrakinima wawu, paratesah, kapa akambusi hu melit aro, ara andre akanyos pwi.
11 Pe Ngindrai andre kirawulohani wawu kiyapolo ndriyan masih, para akaya nondriya kingtom mepo andre kinto-kinto ta Yapan torou pe Ndramat para Sopwat Yesu Kristus.
Nongna poropet iya Nongan Haiyan
12 Pe konan wawu kanpahasani hu nongan ara, pe wawu kantahatini wawu iya nongan ndrokonan mepo ita kili wawu, hapeko lang masih andre kuro rakelehani lohonga wawu kiya hu melit aro.
13 Pe upa ndre hiyan para kuro rakelehani lohonga wawu ma moro iripo leu manau.
14 Paratesah, upahasaniy tehe pakeh andre kutali nombuwe tehe Yapan torou Yesu Kristus kinpwainganiy kini leu kinsa kili yo.
15 Ndroiyin aro ko, urupo pombulen pwokeyan para kupa hu melit aro kisa kili wawu mahapo, pe kiya mulan para kuntali wawu, pwen andre akoro lohongani hu melit aro lang masih.
16 Pe iro mwonen yowu pwai isa kili wawu tehe Yapan Yesu Kristus torou andre kimui kiyapolo pwoke, ara yowu kanto ndruwa titiye mepo hamou imbusiy iya lohongan o mwaihei, ara pwi, hapeko iya mara yowu imwonen, yowu nime nonowa pwoke tan.
17 Yowu ro tandrohongan ara, pe Ngindrai Tamarou namandran ara ihaiyani yiy, pe ipwaingani pwoke iyau kili yiy, pe iro mwonen ara mbulukoyu hamou iwong iyau Nonowa Pwoke, ipa, “Iye ara Noru Kamai mepo nere imwonen, pe ndriyo ara imbulihi yiy pe upwes iyatan.”
18 Yowu mbukena yowu, ara yowu hilingi mbulukoyun iye iyau kol paingan yang iro mwonen yowu ro sura yiy iro ngondron haiyan.
19 Pe yowu pahasaniy i tehe hu nongan hu poropet hu ratuluwiy iyata Kristus, ara ndrokonan masih, pe hu nongan ara, ara ipwokeyani hu hinonou towu tehe andre kimui. Pe wawu kahilingi nokulani nongan aro, paratesah, tehe sui itayat ita kol lokuhan pe isopwat hu ndramat para hu karikai hiyan, pwen hu nongan aro, ara andre kisopwat wawu para andre akapahasani tesah ndrokonan. Pe ndrainga wawu kirapei kiya hu nongan aro, kipoo Kristus kimui pe kimbusi hu melit aro kileu kisa kili wawu tehe lang ita mbungahiy, pe piriya lang kiyat ndriya wawu.
20 Pe hiyan masih para lohonga wawu kileu tehe hu nongna hu poropet mepo wawu ngara kannimei ita Nongan Haiyan, ara kinyau lohonga hu mbukenan pwi.
21 Paratesah, nongna poropet, ara mbulndroiyin kinto namiliwai pwokeyan ta hu ndramat pwi, hapeko iyau kili Ngindrai, pe huro nondriya pwoke ta Mwoiwan Haiyan, pe ngara hu kapwai.