5
Pwahanou iya kili hu pohon pe hu ndramat hurokum pe hu sipsip ta Ngindrai
1 Pe uratuluwi nongan isa kili wawu pohon ta hu ndramat hurokum hu tora mwalinga wawu, urakamam isa kili wawu tehe pohon hamou i, pe ngara kupwokeyani nongan para nopwaran ata Kristus. Pe yo yi andre kuwiri pwoke para ngana Ngindrai mepo andre kiyinganiy.
2 Wawu karayah hu ndramat para pwokereya hu sipsip ta Ngindrai mepo hu tora pahandra pwokere tawawu, pe wawu kapwokerani hu—wawu mbuna kambusiy tehe ara mbulya wawu ara pwi, hapeko ara namiliwai pwokeyan tawawu tehe Ngindrai inamili wawu para wawu kambusiy. Pe wawu mbuna kambusiy para akapo hiyan kiyau aliy, ara pwi, hapeko akambusiy ara tehe mbulya wawu mepo wawu namiliy.
3 Pe wawu mbuna kambusi wawu tehe wawu namandran tahu, mepo hutora pahandra pwokere ta wawu, hapeko wawu kapwaingani kultuwaye wawu hiyan kiya kili hu, pwen andre hu koro ndruwan.
4 Pwen kiro mwonen Ndramat Ihohin para Pwokereya sipsip kisarayah, ara andre wawu kawiri kene wawu mepo kasapai ta king mangannganan mepo andre kinyong pe kinna mwomwan pwi.
5 Pe tehen tora ko, wawu mepo wihou, ara wawu koro pahandra hu mepo hu pohon tawawu.
Pe wawu masih kaiki wawu mbukenan kaya pahandra wawu hamou-hamou, paratesah, Nongan Haiyan ara ipa toro: “Hu mepo ngara hu kapo ngalahu, ara Ngindrai mbuwalin tahu, pe hu mepo hu konhopo ngala hu pwi, ara ngara kipwaingani namiliwan pwokeyan kiya kili hu.”
6 Pe tehen tora ko, wawu kaiki wawu mbukenan kaya pwan pahandra pwoke ta Ngindrai, pwen andre kihari ngala wawu kirahihini lengen imwonen.
7 Pe hu nopwaran tawawu masih, ara wawu kaikiy kiya kili yiy, paratesah, yiy ngara kipwokere wawu.
8 Pe wawu koro hinehes pe lohonga wawu kileu, ndramat ngara kimwisnani wawu mepo sinai, ara ita ngun tehe layon pe ita rikai iya isa, pe ita ten hamou para kiyni yiy.
9 Pe wawu karahatini lohongai ndrisiyon tawawu, pe wawu kandrihisani yiy, paratesah, wawu kapahasaniy tehe wawu ko ara wawu kanna nondriya hu nopwaran iye pwi, hu nali wawu mepo hu pwotisingi lohongahu hutora kol pwan masih, ara huya nondriya nopwaran iya harong o.
10 Hapeko kiya mulan para nopwaran wawu kuniy, mepo ndranga niwen pwi, Ngindrai para pahas masih, mepo kiniyoh wawu para wawu kawiri ngana pwoke ta Kristus mepo andre kinto-kinto, mepo iyau kili Kristus, ara yiy mbukenan andre kiwiri wawu kamui. Pe andre kimbusi wawu koro tine pwokeyan, pe andre wawu karahatini wawu.
11 Pe pwoke ara atan pe andre kinto pe kinto. Ndrokonan.
Hu nongan iyahapwen
12 Pe iyapolo sopwat ta Silas pe yiy nali hamou mepo lohongan ndrisiyon, kunratuluwi nongan mulai iye. Pe upwokeyani wawu pe upwokeyani titiye para pahas ndrokonan ta Ngindrai iye isa kili wawu. Pe wawu koro tine pwokeyan kiya aliy.
13 Pe hu mepo hupwotisingi lohongahu para hurokum hutora Papilon,
mepo Ngindrai kinrakinima hu iyapolo wawu yi, ara hupwanos ndrokololang tahu, pe noru Mak tehen aliy i.
14 Pe wawu kapa ndrokololang kiya kili hamou-hamou kiyapolo rahunghung para namiliwai.
Ndriya wayis kiya kili wawu masih mepo wawu tora kili Kristus.