4
Mipwan tawawu kiro kili Ngindrai
1 Pe tehen tora ko, Kristus ara iwiri ngandran iya nombuwen, pwen wawu mbukenan i ara wawu karahatini wawu para koro ndruwa kultuw ara. Paratesah, yiy mepo kiwiri ngandran kiya nombuwen, ara pakut mwomwan kintali yiy.
2 Pwen tehen tora ko, hu konto ndruwa kultuw para kol pwan mepo namiliwai para nombuwe hu lang masih, ara pwi, hapeko huro ndruwa namiliwai pwokeyan ta Ngindrai.
3 Paratesah, mamu ara wawuiki wawu iya hu melit mepo hu ndramira lah ngara kambusiy—wawu popilah, pe wawuro pahandra namiliwai para nombuwe wawu, pe wawu ngara kayin ndran ngahan. Pe wawu ya hu mbultere mepo kinmwonen pwi, pe wawu yin ndran ngahan pe wawu mbui, pe wawu totohun iya kili hu kerewek.
4 Pwen iye ko mwoiwa hu ihin tehe wawu kansusuye sura hu iya hu kultuw mwomwan mepo pwalngengei pwi, pe hu pwasimiri wawu iya aliy.
5 Hapeko yihu andre koro tine mbulmara nongan kili Ngindrai mepo kinmwanye yiy para kiramwaniyani hu ndramat kanmat, pe hu topo mwalen.
6 Pe tunan aro ko, nongan hiyan ara kanpohowei kinaa kili hu mepo hu kanmat, pwen andre Ngindrai kiramwanye hu kiho ndruwa lohongai ta ndramat, hapeko andre hu koro mwalen kili Ngindrai kiya Mwoiwan Haiyan.
7 Pe melit masih mepo iripo kol pwan ara pakeh andre kahapwen, pwen pe lohonga wawu kileu pe akaro hinehes, pe andre akatohun kimwonen o kiya kili Ngindrai.
8 Pe melit ihohin masih, ara akanamili wawu hamou-hamou kiyapolo ndriya wawu masih, paratesah, kultuw para namiliwai, ara ngara kikulani hu pakut mwomwan soyon.
9 Pe wawu kaponokule hamou-hamou kiya suwe wawu, pe mbuna wawu kawong soyon.
10 Pe wawu hamou-hamou, ara sehe yukyuk Ngindrai kiniykiy kinsa kili wawu, ara wawu kapombulen kiya aliy kiya kili hu hayah. Pe akambusiy kiyau lohongai ndrisiyon tawawu tehe hu ndramat para poya mbulya pahas ta Ngindrai kiyau sai handra-handra.
11 Pe kapa sehe ndramat mepo kiwong, ara hu kawong tehe hu ndramat mepo hu ngara kawong nongna Ngindrai. Pe kapa hamou kipombulen, ara kimbusiy kiyapolo pwoke mepo Ngindrai iykiy iya kili yiy, pwen pe iyau melit masih, andre hu ndramat kahari ngala Ngindrai kiyau kili Yesu Kristus. Pe kahari ngalan pe pwoke ara atan kinto pe kinto. Ndrokonan.
Ngandran ta ndramat mepo yiy yowe Yapan
12 Pwen wawu kowase mepo nere imwonen, mwoiwa wawu mbuna kihin kiya nopwaran mepo andre wawu kakuniy para kinohonou wawu. Pe wawu mbuna kanimei tehe ara melit handra masih, mepo ita rayah kili wawu.
13 Hapeko wawu kapwes tehe nopwaran wawu ya nondriyan, ara tehe yowe Kristus, pwen pe wawu andre kapwes namandran iya kiro mwonen Kristus kiyingani ngana pwoke tan.
14 Pe kapa hu ndramat kapwasimiri wawu kiya ngala Kristus, ara lomwes ita kili wawu, paratesah, ngana pwoke ta Mwoiwan Haiyan pe ta Ngindrai ara ita ndrita wawu.
15 Pe kapa wawu kakuni nopwaran, ara tehe ta ndramat hamou ngara kirut ngundru hu ndramat, ndre tehe ta ndramat para pahana, ndre para kultuw handra mwomwan, ndre tehe ta ndramat mepo ngara kisohonge yiy kiya mwomwan ta hamou, ara pwi.
16 Hapeko kapa akuni nopwaran tehe ndramira Kristus hamou, ara mbuna akamasi, akahari ngala Ngindrai, paratesah, ngalan ita kili wou.
17 Paratesah, lang para tamwanye ara kinsa, pe andre kirayah kiro kili hu ndramira Ngindrai kimu, pe kapa kirayah kiltou kimu, pwen tamwanye ta hu ndramat hu konho hilingi nongna Ngindrai pwi, ara andre kiya mwomwan masih.
18 Pe kapa hu ndramat kultuwaye hu imwonen ara ingandrah para hu kawiri sopwat kiyau kili Ngindrai,
pwen hu ndramat mepo hu mwisnani Ngindrai pe pakut ta hu mwomwan,
ara andre kiya ngandrahan masih kiya kili hu.
19 Pwen pe yihu ndramat hu kuni nopwaran, paratesah, ara namiliwai pwokeyan ta Ngindrai, ara hu kaiki hu mbukenan kiya nima Ngindrai mepo imangsani hu, pe hu koro mbusiy melit hiyan.