3
1 Pe wawu pihin mepo yesowai, ara akaiki wawu mbukenan akaya pwan pahandra hu nambuyu wawu hu, pwen kapa hamou ta hu kamai ara kanpwotisingi lohongan kinna nongan pwi, pe kapa hu pihin kanpa handra nongan pwi, pwen kultuwaye hu pihin ta hu ko, ara andre kiluwi lohongahu.
2 Paratesah, andre hu kanime wawu kiyau kultuwayi wawu hiyan pe kultuw para koro howen.
3 Pe lahaya wawu ara mbuna kiyau nosa wawu para nombuwe wawu, hu melit tehe wawu kariyi kompaya wawu, pe hu nosa wawu tehe hu pat kolt, pe wawu kasuluye wawu kiya hu koyau lahayan iya.
4 Hapeko lahaya wawu ara kiyau melit kokohon para ndriya ndramat, mepo kinlahiy para kihipwen pwi. Pe mwoiwa wawu ara kiro wayis pe kiro mwoimwoi. Kultuw aro ara mwayih masih iya mbulmara Ngindrai.
5 Paratesah, sai aro ko, ara hu pihin haiyan para mamu mepo huiki lohongahu iya melit itapo isa ita kili Ngindrai, ara hu ngara kambusiy hu lahaya hu mbukenan toro. Pe hu ngara kaiki hu mbukenan kaya pahandra hu kamai tahu.
6 Pwen tehe Sarah mepo ngara kihilingi nongna Apraham pe ngara kiyoh yiy yapan atan. Pe wawu ara hu norun pihin, pe wawu ngara kambusi kultuw imwonen pe wawu mbuna kaiki wawu kiya pahandra nohowai.
7 Pe hu kamai ara tehen aliy i, lohonga wawu kileu kiya kili hu pihin tawawu, pe wawu kahaiyani hu pe wawu koro harong. Pe konan pwoke tahu tehen tawawu pwi, hapeko wawu ara iya harong o iya yukyuk mwayih para taleh. Pwen hapesah andre kiniyki songot kisata wawu para akatohun, ara pwi.
Nopwaran wawu kakuniy kiya melit hiyan
8 Pe nongan iya hapwen, ara wawu masih, lohonga wawu kiro handra ko. Pe ndriya wawu kitti wawu hamou-hamou tehe wawu ndrai sih, pe ndriya wawu kisikirani wawu hamou-hamou pe wawu kaiki wawu kaya pwan.
9 Pe wawu mbuna kaposoiwi kultuw pwasin ata hamou-hamou, ndre karasusut kiya kisa, hapeko wawu kaposoiwi mwomwan kiya lomwes. Paratesah, Ngindrai iyoh wawu para wawu kambusiy toro, pwen andre wawu kawiri lomwes.
10 Paratesah,
“Yiy mepo kinamiliy para mipwan tan kiro hiyan, pe kipwes kiro hu lang hiyan,
ara mbuna kiwong hu pwassi nongan pe hu nongan para pwasoyou.
11 Pe yihu ara katali hu kultuw pwassin pe hu kambusi kultuw hiyan;
pe yihu katen ndriya wayis kiya ndriya hu masih, pe yihu kapwokeyaniy para kiro.
12 Paratesah, mara Yapan ara ita kili hu mepo hu mbusi kultuw imwonen,
pe ngara kiyki ndraingan kiya kili hu kapa hu katohun,
hapeko hu mepo hu ngara kambusi kultuw pwassin, ara ngara kiyki ndruwan kiyatahu.”
13 Hiyeh andre kimbusi mwomwan kisa kili wou kapa apo mbulen pwokeyan para ambusi kultuw hiyan?
14 Hapeko Ngindrai andre kitoholi wawu kapa wawu kakuni nopwaran kiya kultuw imwonen. “Pe kapa hu kapanohowani wawu, ara wawu mbuna kanoh, pe ndriya wawu mbuna kiporu.”
15 Hapeko wawu kanohowani Kristus kiro ndriya wawu tehe Yapan tawawu. Pe lang masih wawu koro hinehes para andre kasomwi hu ndramat masih kapa hu kasoksok wawu, pe wawu katiyani lohonga wawu kiya melit mepo itapo isa ita kili wawu. Hapeko wawu kambusiy kiyapolo kultuw waison pe haiye.
16 Pe lohonga wawu ara kiro leu, pwen pe hu mepo hu wong mwomwan anna wawu iya kultuw hiyan tawawu iya kili Kristus, ara andre hu kamasi kiya rasusut nongan mepo hu piye.
17 Paratesah, hiyan masih kapa ara namiliwai pwokeyan ta Ngindrai para wawu kakuni nopwaran kiya melit hiyan wawu mbusiy, pe kinna melit mwomwan mepo wawu mbusiy pwi.
18 Paratesah, Kristus i, ara ikuni nopwaran porosih o iya hu pakut mwomwan, pe kultuwayin ara imwonen, pe imat iya kultuwaye hu ndramat kinmwonen pwi para kiwiri wawu kaya kili Ngindrai. Pe imat iya nombuwen, hapeko mwoiwan ara iwiri taleh pe isa tine.
19 Pe iyamulan para Ngindrai ihingini yiy isa mwalen, pwen iya pe iya pohowe nongan iya kili mwoiwahu ndramat mepo huro kou—
20 Pe yihu masih para koluw mepo hu kono hilingi nongan pwi, pe Ngindrai iro longe iyapolo kultuw waison nondriya hu lang ta Nowah iro puli ndroi. Pe nondriya ndroi ara, ara hu ndramat noye ko Ngindrai isopwat hu iya non, hu anandrolumou o.
21 Pe ndran ara ipwaingani paptais mepo mahapo isopwat wawu yi—pe kinsungani kas iro nombuwe wawu pwi, hapeko iyki lomwes para lohongai ileu iya kili Ngindrai. Pe isopwat wawu iyau Yesu Kristus itine.
22 Pe yiy ara kinna kol paingan yang pe imira nima Ngindrai mot—pe hu angelou, pe hu pwoke nopwaran, pe hu pwoke, ara hutora pahandran.