2
1 Pwen tora ko, wawu mbukena wawu koro mawen kultuw masih pwassin, pe kultuw masih para pwandrandraman, kultuw masih para pwasoyou, kultuw masih para maimai, pe kultuw masih handra-handra para tasusut nongan mwomwan kiya kili hu ndramat hayah.
2 Pwen tehe hu mbunah malaman koyuhu ngara kisapak para kiyin sus hiyan, pwen wawu yi, ara akanamiliy para akawiri nongna Ngindrai. Pe andre wawu kamandra kiya sopwat hiyan ta Ngindrai.
3 Pe mahapo wawu kanpahasaniy tehe Yapan, ara ngara kipo hiyan kisa kili wawu.
Pat mepo Mwalen pe hu ndramat Ngindrai kinrakinima hu
4 Pe tehe wawu kansa kili yiy mepo Pat mwalen—hu ndramat mbuwali hu tan, hapeko Ngindrai kintakiniman pe yiy ara mwayih masih iya mbulmaran—
5 pe wawu yi, ara wawu tehe hu pat mwalen, mepo soye wawu rayah seu hawum para mwoiwa wawu para kirayah haiyan, pe wawu kapo mbulen tehe hu pris para wawu kambusi hu yukyuk ipwaingani totohun ta wawu. Pe yukyuk ara andre kimwonen o kiya kili Ngindrai kiyau kili Yesu Kristus.
6 Paratesah, ita Nongan Haiyan ara ipa:
“Akanimei, uiki pat sih ita Sayon, pat mepo kunrakiniman pe mwayih masih pe para puliya seu,
pe yiy mepo kipwotisingi lohongan kiya kili pat ara, ara andre kinmasi pwi.”
7 Pe wawu mepo wawu pwotisingi lohonga wawu, pat iye ara mwayih masih iya kili wawu. Hapeko yihu mepo hu kanpwotisingi lohongahu pwi,
“Pat mepo yihu ndramat para puliya seu hu lowaniy,
ara kintayah pat para sotuna seu.”
8 Pe Nongan Haiyan handra yi ipa,
“Yiy ara pat sih mepo andre kirakokowi tokuya hu ndramat,
pe pat mepo andre kimbusi hu kayos.”
Pe andre kimbusi hu karakoko, paratesah, hu konho ndruwa nongan pwi—pe Ngindrai irakinima hu yi para hu kambusiy tehen tora.
9 Hapeko wawu ara hasap mepo Ngindrai kinrakinima wawu pwen tehe wawu ndramiran, pe wawu ara hu pris ta King Ngindrai, pe wawu ara kol namandran masih haiyan hakol, pe wawu ara atan imwonen mepo andre wawu kapohowe melit hiyan masih ngara kimbusiy. Yiy mepo iyoh wawuro kol lokuhan pe wawu sa nganan mepo hiyan masih.
10 Pe mamu ara wawuro tehe hu ndramat o mwaihei o, hapeko mahapo ara akantayah ndramira Ngindrai; pe mamu ara wawu kanwiri koisirai tan pwi, hapeko mahapo ara wawu kanwiri koisirai tan.
Kultuwayi wawu ara kiro mwonen kili hu mepo hu kowu ta Yapan
11 Wawu kowase pe nere imwonen, urakamam isa kili wawu tehe hu ndramat para mawen hu mepo pwane hu pwi, para wawu koro mawen hu namiliwai para pakut mwomwan mepo ngara kipo pahun kiya namiliwa wawu.
12 Pe tokuya wawu ara kiro hiyan kiya mwalinga hu ndramat hu kowu ta Yapan, pe konan hu karasusut nongan tehe wawu ngara kambusi mwomwan, andre hu kanime kultuwaye wawu hiyan kiro mwonen lang Ngindrai kimui kisa kiltou, pwen andre hu kahari ngalan.
13 Pe tunan Yapan opu, akaiki wawu mbukenan akaya pwan, para wawu kaya pahandra hu ndramat pwoke nopwaran ita kili hu, ndre kiya kili king mepo ita mu pe pwoke nopwaran ita kili yiy,
14 ndre kiya kili hu poho kapman mepo king ipwandrisa hu, para hu kaiki kora yihu mepo hu mbusi mwomwan, pe kahari ngala hu mepo hu mbusi kultuw imwonen.
15 Paratesah, namiliwai pwokeyan ta Ngindrai ara para wawu kambusi kultuw hiyan, pwen andre wawu kaiki pohomum kiya kili hu ndramat mepo payahu pwi, pe lohongai waison kili hu pwi.
16 Pe mipwan tawawu ara kiro tehe hu ndramat hutora mwoimwoi, hapeko wawu mbuna kapandre wawu tora mwoimwoi pe wawu kandrutuhi kultuw pwassin tawawu, ara pwi, akaro tehe hu ndramat para pwandrendres ta Ngindrai.
17 Pe hu ndramat masih, ara wawu kahaiyani hu kiya hiyan, pe wawu kanamili hu mepo hu pwotisingi lohongahu iya kili Ngindrai, pe wawu koro pahandra nohowai ta Ngindrai, pe wawu karanuhuyani king.
18 Pe wawu ndramat para pwandrendres mepo wawu tora pahandra nohowai ta Ngindrai, ara akaiki wawu mbukenan kaya pwan pahandra hu namandran tawawu. Pe mbuna akaiki wawu kaya pwan pahandra hu mepo hu waison o, ara pwi, hapeko akaiki wawu kiya pahandra hu mepo kultuwayi hu ngandrahan i.
19 Paratesah, Ngindrai andre kipwes, kapa ndramat hamou kiro lohongani yiy pe kikuni nopwaran mepo atan para kikuniy pwi.
20 Hapeko kapa wawu kambusi kultuw mwomwan pe hu kamwiri wawu kaliy, pe wawuro tine pwokeyan, ara ita mwonen. Hapeko kapa akakuni nopwaran kiya melit hiyan wawu mbusiy, pe wawuro tine pwokeyan iya aliy, ara Ngindrai andre kipwes.
21 Tunan aro ko, Ngindrai kiniyoh wawu pwen, paratesah, Kristus ikuni nopwaran atawawu, pe imbusiy para wawu koro ndruwa kultuwayin pe karikai kiya tokuyan.
22 Pe “Yiy kinmbusi pakut mwomwan pwi,
pe kinho pwasoyou pwi.”
23 Pe iro mwonen hu rasusut nongan mwomwan iya kili yiy, ara kintasusut ana hu pwi, pe iro mwonen ikuni ngandran, ara kinwong para andre kimbusi mwomwan kiya kili hu pwi. Hapeko ipwotisingi lohongan iya kili Ngindrai mepo tamwanye tan ara imwonen.
24 Pe “yiy mbukenan, ara ikuni hu pakut mwomwan torou” iya nombuwen iho kei tondrih, para andre tukatali hu pakut mwomwan torou pe tukarikai kiya kultuw imwonen. Pe “iyau hu neken mepo kinwiriy, pwen kinsopwoyani wawu.”
25 Paratesah, “wawu ara tehe hu sipsip mepo husongsin,” hapeko mahapo ara wawu kanmui akansa kili Ndramat para Pwokereya Sipsip pe Ndramat para Memere namiliwa wawu.