Nongan sahin Pita iratuluwiy
Pita
Nongan imu
Pita iratuluwi nongan iye iya ara para kipwokeyani lohongani ndrisiyon tahu Kristen mepo hukuni nopwaran namandran. Pe iwong ipa, hu Kristen ara lohongahu kimui kiya nongan hiyan ata Yesu Kristus. Yesu ara kinmat pe kintine paiwe, pe kintandrangan tehe andre kimui paiwe. Pe yihu kalohongani nongan kintandrangan kinna aliy pe yihu kalonge yiy kimui kisa.
Ndrokonan tehe yihu Kristen, ara hu kuni nopwaran, hapeko melit irayah ara, ara para kihinonou lohongai ndrisiyon tahu. Pwen pe yihu kapwokeyani lohongai ndrisiyon tahu kipoo Kristus kimui kisa yiy, pe kiro mwonen lang ara, andre yihu kawiri kenehu hiyan.
1
1 Yo Pita, yo ara aposel hamou ta Yesu Kristus.
Yo uratuluwi nongan iye isa kili wawu mepo Ngindrai kintakinima wawu pwen, pe wawu kanmasumbuwe tora kene kol mepo Pontus, pe Kalatiya, pe Kapatosiya, pe Esiya, pe Pitiniya.
2 Pe Ngindrai Tamarou ara kintakinima wawu iya lohongai hiyan atan mepo iya mbulya Mwoiwan Haiyan mepo imbusi worou turayah haiyan iya ndreyen mepo imuw. Pe andre tukoro hilingi Yesu Kristus.
Pahas pe ndriya wayis ara kipep kiro kili wawu.
Kahari ngala Ngindrai kiya melit mepo melit mepo mwalen itapo isa
3 Pe tukahari ngala Ngindrai, yiy ara Tama Yapan torou Yesu Kristus! Pe iyau koisirai tan namandran iya, yiy kinmbusi worou turayah howen, tehe tinarou imwalahiy isa torou, iya taleh mepo para melit hiyan itapo isa, iyau kili Yesu Kristus mepo itine kimat,
4 pe lohongarou iya lomwes mepo kinratto ita mepo kinlahiy para kiya mwomwan pwi, andre kiro howen, pe lahayan iya. Lomwes iye ara atawawu ita kol paingan yang.
5 Pe iyau lohongai ndrisiyon tawawu, pwen Ngindrai kinrahakowa wawu iyau pwoke tan, kipoo lenge sopwat hiyan mepo itapo isa, ara kiro mwoimwoi pe Ngindrai kiyinganiy kiro mwonen lang kiya hapwen.
6 Pe iyau hu melit masih aro, konan mahapo andre akarang, pe andre wawu kakuni nopwaran handra-handra, ara wawu kapwes namandran iya, paratesah, andre kinto ndrangan niwen pwi.
7 Pwen pe tunan ara, ara kipwainganiy tehe lohongai ndrisiyon tawawu ara imwonen—pe hiyan masih iramwaitini pat kolt mepo andre kihipwen konan katimwiy kiya mwan para kirayah howen—pe hiyan para aliy ara andre Ngindrai kihari ngala wawu, pe kiyki nganngana pwoke, pe kihaiyani wawu kiro mwonen Yesu Kristus kiyingani yiy mbukenan.
8 Pe konan wawu kannime yiy pwi, ndriya wawu imbulihi yiy, pe konan mahapo wawu kannime yiy pwi, wawu pwotisingi lohonga wawu iya kili yiy, pe wawu pep iya pwesai namandran mepo wawu kanlahiy para kanratiyaniy pwi.
9 Paratesah, ipwaingani lohongai ndrisiyon tawawu, pwen wawu tora wiri sopwat hiyan para namiliwa wawu.
10 Pe sopwat hiyan iye, ara hu poropet mepo hu wong iya pahas mepo andre kisa kili wawu, pe hu kahi nokulaniy iyapolo pwokere hiyan iya.
11 Pe hu poropet huseyeh tehe sehe lang imwonen ndre sehe nopwaran andre kirayah, pe kimbusi nongna Mwoiwan Haiyan ata Kristus ita kili hu mepo iro pwainganiy iya kili hu. Pe iro mwonen iro wong imu iya kili hu iya hu nopwaran mepo Kristus andre kiya nondriyan, pe kiyamulan hu nganngana pwoke tan karayah.
12 Pe Ngindrai iyingani hu melit aro iya kili hu poropet, pe hu kanpo mbulen para hiyan ata hu mbukenan pwi. Hapeko para hiyan tawawu iro mwonen hu wong iya hu melit mepo mahapo kanpwai kinsa kili wawu, iyau kili yihu mepo hu pohowe nongan hiyan isa kili wawu iyau kili Mwoiwan Haiyan mepo iyau kol paingan yang. Pe hu melit aro, ara hu angelou hu namiliy imwonen para hu kanimei.
Wawu koro haiyan
13 Pwen tehen tora ko, lohonga wawu ara kiro hinehes, pe lohonga wawu kileu kiya melit masih hiyan tawawu itapo isa mepo Ngindrai andre kihang wawu, kiro mwonen Yesu Kristus kisa yingani yiy kiro lengen nakisa.
14 Pe wawu karo tehe noru Ngindrai mepo ngara koho ndruwa nongan, pwen wawu mbuna koho ndruwa hu namiliwai pwassin para nombuwe wawu para mamu, mepo mapu wawu kanpahasani Ngindrai pe wawu ro mbusiy.
15 Hapeko Ngindrai mepo iyoh wawu ara yiy haiyan, pwen wawu yi, ara akaro haiyan kiya melit masih wawu kambusiy.
16 Paratesah, pwayan kinpwai pwen kinpa: ‘Akaro haiyan, paratesah, yo ara haiyan.’
17 Pe kapa akayoh yiy Tama wawu mepo ngara kiramwanye tesah wawu ngara kambusiy ara kinho hire pwi, pwen mipwan tawawu kiro kol pwan iye, ara andre kinto ndrangan niwen pwi, pe akoro pahandra nohowai tan.
18 Paratesah, wawu pahasaniy tehe Ngindrai kinrakonuhi wawu iya hu mipwan tawawu mepo mwaihei o, pe iyau kili hu tumbu wawu, ara kinna hu melit mepo andre kihipwen tehe pat siliwa, ndre pat kolt, ara pwi.
19 Hapeko iyau ndreye Kristus mepo mwayih masih, pe yiy noru sipsip hamou mepo neken ndre mwomwan handra kinto kili yiy pwi, ara isowani worou.
20 Pe Ngindrai kintakinima Kristus pwen ma kol pwan kinmangsaniy mapu, hapeko kinyinganiy kinsa kili wawu para hiyan tawawu nondriya hu lang kinsa hapwen mahapo.
21 Pe iyau kili yiy opu, wawu pwotisingi lohonga wawu iya kili Ngindrai mepo ihingini yiy itine kimat, pe kinhari ngalan. Pwen tora ko, wawuiki lohongai ndrisiyon tawawu iya melit hiyan itapo isa kili Ngindrai.
22 Pe mahapo wawu kanmbusi wawu mbukena wawu kantayah howen para wawuho ndruwa nongan ndrokonan, pe ndriya wawu imbulihi hamou-hamou tawawu, pwen wawu kanamili wawu hamou-hamou kiya ndriya wawu masih.
23 Paratesah, wawu kantapaiwani ndriya wawu, pe akanwiriy kinyau mbuwa kei mepo ngara kimang, ara pwi, hapeko iyau mbuwa kei mepo kinho mang pwi, mepo iyau nongna Ngindrai para taleh, mepo andre kinto-kinto.
24 Paratesah,
“Hu ndramat masih ara tehe ndromwindriu, pe nonowahu, ara tehe hu nonou para piyang.
Pe ndromwindriu ngara kimang,
pe hu nonou ngara hu kalon,
25 hapeko nongna Yapan, ara andre kinto-kinto.”
Pe nongan aro, ara kanpohowei kinsa kili wawu.