9
1 Paratesah, kinna hiyan para kuratuluwi nongan kisa kili wawu iya mbulen iye iyata hu ndramira Yapan, ara pwi.
2 Paratesah, upahasaniy tehe ndriya wawu illeh para wawu pakasopwat, pwen upwai iya kili hu para kol namandran hape Masetoniya pe uhari ngala wawu iya aliy. Pe upwai iya kili hu tehe hayou kinna wawu ro ndron kol namandran hape Akaya, ara wawu lohonganiy para akayuk, pwen ndriyaleh tawawu, ara imbusi ndriya hu soyon itine para hu kayukyuk i.
3 Hapeko upwandrisa nali hu iye para kipwainganiy tehe yowu kanhari ngala wawu iya lohongai iye ko mwaihei pwi, hapeko tehe kunpwai, akoro rapapahan para akambusiy.
4 Paratesah, kapa hu ndramat para kol namandran hape Masetoniya hayah kasa sura yo, pe hu kanimei tehe wawu kanmwanye wawu mapu—ara andre kiyki masirai kisa kili yowu, hapeko wawu andre kawiri masirai namandran—pe yowu pwotisingi lohonga yowu sata wawu.
5 Pwen pe ulohonganiy tehe kurakamam kiya kili nali hu para hu kasa saisai kasa kili wawu kimu. Pwen andre hu kamwanye hu yukyuk namandran mepo wawu kantandrangan kinna aliy. Pwen hu yukyuk namandran ara, ara andre kiro mwoimwoi kiro mwonen kusa, pe andre kipwainganiy tehe wawuiki ara, paratesah, wawu namiliy para kayuk, pe tehe para karakekeyani wawu para kayuk, ara pwi.
Pwahanou para kayukyuk kipopo ko
6 Akalohonganiy tehe ndramat mepo ihisi peke anandrinai noye ko, ara andre kipo noye ko, pe yiy mepo ihisi peke anandrinai soyon, ara andre kipo soyon.
7 Pe hamou-hamou tawawu ara kiyki tesah kiyau ndriyan para kiykiy, pe mbuna kiyuk kiyau ndriyai mwomwan, ndre kiyuk kiro lohongai soyon. Paratesah, Ngindrai inamili yiy mepo kiyuk kiyapolo pwesai.
8 Pe tesah wawu namiliy, ara Ngindrai ilahiy para kiykiy kipopo ko kisa kili wawu, pwen andre lang masih sohoya wawu andre kipep o kiro, pe andre wawu kalahiy para kambusi hu mbulen masih hiyan.
9 Tehe pwayan kinpwai,
“Hu kantaingani hu yukyuk tahu ipopo ko iya kene kili hu mepo hu ndroisiy,
pe kultuw imwonen ata hu, ara andre kinto-kinto.”
10 Pe Ngindrai mepo ngara kihang peke anandrinai kiya kili ndramat para hasiya piyang, pe ndrina nohun para kaniyai i, ara andre kihang wawu melit soyon mepo wawu ndroisiy, pe andre kihang wawu hu melit soyon kirokaisowa wawu, ara andre kipopo ko. Pe andre kimbusi kultuw imwonen para yukyuk tawawu kiya namandran masih.
11 Pe andre kiyki menmena wawu kiya soyon kiyau sai masih, pe andre wawu kalahiy para kayukyuk kiya soyon lang masih, pwen andre hu ndramat soyon andre karawuloh kiya kili Ngindrai kiya hu yukyuk tawawu mepo wawu wiriy iyau kili yowu.
12 Paratesah, mbulen mepo wawu mbusiy, ara kinsopwat tesah hu ndramira Ngindrai hundroisiy o, ara pwi, hapeko imbusi hu ndramat soyon huwaiyaniy para hu karawuloh kiya kili Ngindrai.
13 Paratesah, mbulen para yukyuk ara ipwaingani tehe tesah wawu tandrangan iya aliy, ara wawu mbusiy. Pe hu ndramat soyon andre kahari ngala Ngindrai tehe tesah wawu pwai iya nongan hiyan ta Kristus, ara ndrokonan pe wawuro ndruwan. Pe iya hu yukyuk soyon mepo wawu tainganiy iya kili hu, pe iya kili hu ndramat masih i.
14 Pe ndriyahu masih andre hu kaikiy kisa kili wawu para hu katohun kisata wawu, paratesah, iya pahas namandran ta Ngindrai mepo kiniykiy pwen kinsa kili wawu.
15 Pwen tukarawuloh kiya kili Ngindrai, kiya yukyuk tan mepo worou kanlahiy para kapandrohonge kiya aliy, ara pwi.