10
Pol ipenani mbulyan
1 Pwen yo Pol iyau kultuw waison ta Kristus, uiki yo uya pwan, pe nakuwong kisa kili wawu—pe kiro mwonen tukanime worou, ara pwokeyo pwi, hapeko iro mwonen uro mawen kili wawu, ara nongno tahakulan!
2 Pe urakamam isa kili wawu tehe kiro mwonen kusa, ara andre kunpwokeyani yo pe kutandrokomat kisa kili wawu tehe ulohonganiy ngara kumbusiy kiya kili hu ndramat hayah, ara pwi. Pe hu ngara kapa ndre yowu topo mbusiy, ara iyau hu lohonga ndramat para kol pwan iye.
3 Paratesah, konan tutopo kol pwan, hapeko pahun yowu ngara kambusiy, ara tehe ta hu ndramat para kol pwan pwi.
4 Hu melit para pahun yowu ngara kapopahun kiyasuran, ara para kol pwan pwi, hapeko mapwoke ta Ngindrai mepo ilahiy para kipwalngani hu pwoke pwokeyan pe hu lohongai pwasoyou.
5 Pe yowu pwalngani topwe hu lohongai para kalowani nongna Ngindrai, pe pwandrandraman mepo ngara kiya hin, pe ipopahun iya lohongai iman ta Ngindrai. Pe hu lohongai masih ta hu ndramat, ara yowuikiy hu iya kou para kambusiy hu koho ndruwa lohonga Kristus.
6 Pe yowu andre kaiki kora mwomwan masih ta hu mepo hu ngara kandrihisani nongan, kiro mwonen wawu koro ndruwa nongna Ngindrai masih.
7 Pe wawu ngara kanimnim kiya hu melit para ngawan. Kapa ndramat hamou kipa yiy ara ata Kristus, pwen kiyirowei paiwe na, tehe yowu ara ata Kristus, iyawule ko tehe yihu yi.
8 Pwen pe kapa kuhari ngala yowu kiya pwoke nopwaran Yapan kiniykiy kinsa kili yowu, para kisopwat mwoiwa wawu kimandra, pe kinpwalngani wawu pwi, ara andre kunmasi kinna aliy pwi.
9 Pe mbuwali para kunohonou para kumbusi wawu kanoh kiya nongno uratuluwiy isa kili wawu.
10 Paratesah, hayah tawawu ara hupa, “Nongna Pol iratuluwiy, ara nopwaran pe isa iyapolo pwoke, hapeko yiy mbukenan isarayah isa kili tou, ara nongnan ngara kipohowei, ara pwoke para aliy, ara mwaihei o.”
11 Hu ndramat tora, ara hu kayirowei tehe nongna yowu mepo yowu ratuluwiy isa kili wawu tapeh iro mwonen yowuro mawen, ara andre yowu kapwainganiy kiya hu kultuwaye yowu kiro mwonen yowu korosura wawu.
12 Pe mbuwali yowu para karanonoye yowu kiyapolo hu hayah mepo hu mbukenan ngara kasomwani hu mbukenan ara pwi. Pe iro mwonen hunimwaniye hu mbukenan iya kili hu mbukenan, pe hu ranonoye hu mbukenan, iyapolo hu mbukenan, ara lohongai waison kili hu pwi.
13 Pe andre yowu kansomwani yowu kiramwaitini hu melit yowu kanlahiy para kambusiy pwi, ara pwi. Hapeko andre yowu kasomwani yowu kiro ndruwa mbulen Ngindrai kiniyki yowu topo pombulen iya aliy. Pe mbulen mepo Ngindrai ikiy isa kili yowu, ara wawu topo aliy i.
14 Pe andre yowu kansomwani yowu kinramwaitini mbulya yowu pwi, matisan tunan ara yowu kansa kili wawu pwi. Hapeko nongan hiyan ata Kristus ara isa tusuye isa kili wawu.
15 Pe yowu konho somwani yowu kiramwaitini hu hayah iya hu mbulen hu kanmbusiy pwen, ara pwi. Lohonga yowu iya melit itapo isa, ara tehe lohongai ndrisiyon tawawu ara kiro manau pe kimandra, pe ndrohonga yowu para mbuliya yowu mwalinga wawu, ara ndrokomatnet para aliy ara Ngindrai andre kimbusiy kiya namandran.
16 Pwen andre yowu kalahiy para kaya hu kol hayah hutora mawen hape kili wawu, pe kaya pohowe nongan hiyan i. Pe mbuwali yowu para kasomwani yowu kiya mbulya ndramat hamou mepo kinmbulyaniy, mepo ita pwen kili kolo ndramat hamou.
17 Hapeko, “Ndramat mepo nakisomwani yiy, ara kisomwani Yapan kiya tesah imbusiy.”
18 Paratesah, kiro mwonen ndramat hamou kisap ngalan mbukenan, ara Ngindrai andre kinsomwi yiy pwi. Hapeko yihu mepo Yapan mbukenan isomwi hu.