11
Pol iyasura hu aposel para pwandrandraman
1 Pe ulohonganiy para kuwong hape tehe ndramat lohongai waison kinto kili yiy pwi. Pwen hiyan para akatali yo kumbusiy!
2 Paratesah, umaimai anna wawu iya maimai ta Ngindrai. Pe upwatisingi nongan isa kili wawu tehe nambuyu wawu ara hamou opu, pe yiy ara Kristus, pwen andre kuiki wawu tehe pihin hamou mepo kinmatiliwani kamai mapu, mepo ngara kiro mwonen o, kiya kili yiy.
3 Hapeko unoh, pwen tehe Ewa mepo mwat para pwakeriu ipwasike yiy, pwen matisan lohonga wawu kinto mwonen pwi, pwen totohun tawawu mepo ngara kiro mwonen kili Kristus, ara wawu andre kataliy.
4 Paratesah, kapa ndramat hamou kisa kili wawu pe kipohowe Yesu hamou i, mepo kinna wule tehe Yesu yowu kanpohowei pwen kinsa kili wawu, ndre kapa akawiri mwoiwa melit handra kinnawule tehe Mwoiwan Haiyan mepo akanwiriy pwen, ndre nongan hiyan handra yi, mepo kinnawule tehe nongan hiyan akanwiriy pwen, ara ngara akasomwiy kileh o.
5 Hapeko ulohonganiy tehe yo kunpakeh kili aposel hamou tawawu mepo “hu aposel huhohin,” ara pwi.
6 Pe ndrokonan kultuwayi tehe ndramat hamou para pohoweya nongan ara hiyan pwi, hapeko lohongai iman ara iripo. Pe lang masih yowu ngara kapwainganiy kileu kisa kili wawu kiyau sai masih.
7 Pe iro mwonen upohowe nongan hiyan ta Ngindrai isa kili wawu, ara kunuiki kene para akasowani yo pwi, ara uikiy o mwaihei, pe uiki yo uya pwan para kusap ngala wawu. Pwen kultuw umbusiy ara, ara umbusi pakut mwomwan, ndre?
8 Pe upahana kili hu ndramat mepo hurokum huro hape, pe huro sowani yo para kupo mbulen ta wawu.
9 Pe tandrohongan uro sura wawu pe undroisiy, ara kuniyki nopwaran kinsa kili hamou ta wawu pwi, paratesah, hu nali mepo huyau kol namandran hape Masetoniya, ara husopwat yo iya tesah undroisiy iya aliy. Pe mbuwali para kuiki nopwaran kisa kili wawu kiya sai masih, pe andre kuro mbusiy toro manau.
10 Pe ndrokonan tehe nongan ndrokonan ata Kristus ara iripo kili yo, hamou ta hu para kol namandran Akaya masih ara andre kiniyki songot kisato para urupo sap ngolo iye, ara pwi.
11 Pe paratapeh pe umbusiy toro? Paratesah, ndriyo ara kinho mbulihi wawu pwi, ndre? Ngindrai ipahasaniy tehe ndriyo ngara kimbulihi wawu!
12 Pe tesah urupo mbusiy, ara andre kuro mbusiy manau, pwen andre kusingori tesah hu ndramat hayah hutora mbusiy. Pe tunan aro ko, pwen andre hu kansap ngalahu tehe mbulyahu, ara iyawule tehe torou, ara pwi.
13 Paratesah, hu ndramat tora, ara hu aposel para pwandrandraman, pe hu ndramat para pombulen pwasoyou, pe hu ndramat mepo ngara karapihiye hu, tehe yihu, ara aposel ata Kristus.
14 Pwen mwoiwo kinhin pwi, paratesah, Sinai mbukenan, ara irapihiye yiy tehe angelou hamou ta Ngindrai mangannganan.
15 Pe andre kiniyki mwoiwahin pwi, hu ndramat para poya mbulyan, ara ngara hu karapihiye hu mbukenan tehe hu ndramat para poya mbulen para kultuw imwonen. Pe konahu, ara andre kiho ndruwa kultuwayihu mepo hu ngara kambusiy.
Pol isomwani yiy iya hu nopwaran atan
16 Pe nakupwai paiwe yi: Hamou mbuna kipa ndre yo ara ndramat hamou lohongo pwi. Hapeko kapa wawu kalohonganiy tora, pwen hiyan para lohongai waison pwi, ara kiro kili yo, pe andre kusomwani yo hape kiya aliy.
17 Pe nongan urupo wong iya aliy iye, ara kinyau namiliwa Yapan pwi, ara urupo pwasosohou pe urupo somwani yo mbukeno.
18 Pwen tehe hu ndramat soyon hutora somwani ngalahu tehe hu ndramat para kol pwan ngara kambusiy, pwen yo andre kusomwani yo yi.
19 Paratesah, wawu ara lohongai waison iya ara ita, pwen tehen torako wawu ngara kapwes para kasomwi hu mepo lohongai waison kinto kili hu pwi.
20 Paratesah, ndrokonan tehe wawu namiliy para akarayah ndramat para pwandrendres ta ndramat hayah, pe hupo hiyan iyau tesah wawu ngara kawiriy, pe hu pakarawani wawu, pe huiki hu hurohin sata wawu, ndre hu husuli wawu iya mbulmara wawu.
21 Pwen pe umasi pe upwai ngawan isa kili wawu tehe pwoke towu, ara pwi para yowu kambusi hu melit tora. Hapeko kapa ndramat hamou kipwoke para kisomwani yiy kiya hapesah—ara urupo wong tehe ndramat lohongan pwi, pe andre kupwokeyani yo pe kupo ngolo kiya aliy.
22 Pe yihu para Hipuruw, ndre? Pwen yo ara tehen aliy yi. Pe yihu para Yisrayel, ndre? Pwen yo ara tehen aliy yi. Pe yihu ndraye Apraham, ndre? Pwen yo ara tehen aliy yi.
23 Pe yihu ndramat para poya mbulya Kristus, ndre? (Pwen yo, ara lohongo kinmeu pe urupo wong tehen toro). Hapeko yo, ara ndramat hamou para poya mbulen mepo uramwaitini hu. Pe kunpombulen pwokeyan, pe kunna nondriya kou maporosahayeh pwen, pe hu kanmwiriyani yo iya mwomwan maporosahayeh pwen, pe maporosahayeh i, ara pakeh kumat.
24 Pe maporoyimisap ara hu Yutah hu lomwasi yo, pe ndromwoyan, ara tingui pe androsih.
25 Pe maporotoyoh humwahi yo iya wasiu. Pe porosih, ara hu solpwa yo iya pat, pe maporotoyoh, ara ndroi para ndras iyuh iyasura yo. Pe porosih, ara uro tangangai ndras lang sih pe ping sih.
26 Pe lang soyon ngara kurikai, ara ngara kingandrah para kusingondrti hu ndran, pe ngara kuya nondriya mwomwan kili hu ndramat para pahana, pe uya nondriya mwomwan kili hu ndramiro imwonen mepo hu Yutah, pe uya nondriya mwomwan kili hu Ndramira Lah; pe uya nondriya mwomwan iro kol namandran, pe uya nondriya mwomwan iro kol ndrohoyin, pe uya nondriya mwomwan uro ndras, pe uya nondriya mwomwan kili hu mepo hu rapihiyehu tehe hu pwotisingi lohongahu.
27 Pe ngara kupombulen pwokeyan pe kungandrah, pe lang soyon ara kunho matin pwi. Pe lang soyon, ara ngara kumundrui pe koyu ngara kisapak, pe lang soyon, ara kunho namnam pwi, pe koiwe pwi pe ngara kuwulen.
28 Pe hu melit aro ko pwi, lang masih ngara kulohongani hu ndramat masih mepo hurokum pe ngara kukuni nopwaran tahu.
29 Pe kiro mwonen hu ndramat hayah kambuyei, ara yo ngara kumbuyei i. Pe ndramat hamou hu ndramat hayah ngara kaluwani yiy kiya pakut mwomwan, ara ngara kundrangis.
30 Pe kapa nakusomwani yo, ara andre kusomwani yo kiya hu melit mepo ipwaingani tehe umbuyei iya aliy.
31 Pe Ngindrai Tama Yapan Yesu torou, mepo andre kahari ngalan kinto-kinto, ara ipahasaniy tehe kunpwasoyou pwi.
32 Pe tandrohonga uro kol namandran Tamaskus, ara pohon para kapman mepo iro pahandra King Aretas, ara iyki hu ndram para memere hu huro pohomara karam namandran para hu kambultuwe tahatini yo.
33 Hapeko hu ndruyani yo uya pwan nondriya ndrop sahat, iyau marasip sih sese kou para kol namandran ara, pwen uwop pahandra pwoke tan tehen tora.