12
Hu taltan pe ngandran mepo tehe nah issi Pol
1 Yo andre kuro somwani yo manau, konan hapesah hiyan kinyau aliy pwi, yo andre kuro pohowe hu taltan pe hu nongan kokohon mepo Yapan kinpwaingani kinsa kili yo.
2 Pe upahasani ndramat hamou ta Kristus, ara hayou songui pe haahiu kinna, ara Ngindrai iwiri yiy iya paingan masih iya kol paingan yang. Pe iyau iyasura nombuwen, ndre nombuwen pwi—ara tono pwi, Ngindrai opu ipahasaniy.
3 Pe upahasaniy tehe ndramat aro ko, ara iyau iyasura nombuwen, ndre kinto nombuwen pwi, ara tono pwi—hapeko Ngindrai opu ipahasaniy—
4 pe tehe kunpwai, Ngindrai iwiri yiy iya kol lahayan iya ita kol paingan yang, pe kinhilingi hu nongan haiyan mepo kinlahi para ndramat karatiyaniy pe kileu kiya nongna ndramat pwi.
5 Pwen andre kusomwani ngala ndramat tora—hapeko andre kunsap ngolo mbukeno, ara pwi. Pe andre kusomwani ngolo, ara kiya hu melit mepo imbusi pwoke to iya pwi.
6 Pe kapa kunamiliy para kusomwani yo mbukeno, pwen andre kunwong tehe ndramat lohongai waison kili yiy pwi, ara pwi, paratesah, andre kuwong ndrokonan. Hapeko andre kunohonou para kunwong soyon pwi, pwen andre hu ndramat kansikiye yo kiya tesah hu kanimei umbusiy, ndre kiya tesah kunpwai, ara pwi.
7 Paratesah, iya hu nongan kokohon namandran pe ihohin iya aro, mepo andre kinhipwen pwi, pwen urupo wiri ngandran tehe nah issi nombuwe. Pe ndramat hamou para sapiya nongna Sinai, ara iyki ngandran isa kili yo, pwen tehen torako andre kunhitohai para kusomwani yo pwi.
8 Pe urakamam iya kili Yapan maporotisap, para kirapiyani ngandran ara kiya mawen kili yo.
9 Hapeko ipwai isato ipa, “Pahas to ara ilahiy masih, paratesah, pwoke to ipombulen mwayih iya, iro mwonen pwoke tam iya pwi.” Pwen tehen tora ko, andre kurosomwani yo tehe yo ara pwoke pwi, pwen andre pwoke ta Kristus kiro ndrito.
10 Pe tunan ara ko, iya ngala Kristus opu, upwes tehe umbuyei, pe hu ndramat hu pwasimiri yo, pe ukuni hu nopwaran, pe uya nondriya hu mwomwan. Paratesah, kiro mwonen pwoke to kiya pwi, andre kuwiri pwoke toro.
Pol koyun iti hu para kol Korin
11 Pe wawu mbusi yo, pe yo mbukeno urayah tehe ndramat hamou lohongai waison kinto kili yo pwi. Pe wawupa hiyan isato konan yo ara mwaihei o, paratesah, “hu aposel huhohin” ara kunpakeh kili hu pwi.
12 Pe ndrokonan tehe uro tine pwokeyan mwalinga wawu, pe uro pwaingani hu kinima melit tehe yo ara aposel hamou ndrokonan iyau hu kaipisa pwoke, pe hu kinima pwoke, pe hu ndraikiya pwoke.
13 Pwen melit handra mepo ukose para kumbusiy kisa kili wawu, ara kunmbusiy pwi, hapeko umbusiy iya kili hu ndramat hurokum huro hape yi. Pe kunuiki nopwaran kinsa kili wawu pwi, para kuropo singayai kiyau kili wawu, ara pwi. Pwen akatali mwomwan to iya kultuw umbusiy aro.
14 Pwen mahapo ara maporotisap ara, urupo lohonge para nakusa saisai kusa kili wawu, pe mbuna kuiki nopwaran kisa kili wawu. Paratesah, tesah unamiliy kili wawu, ara singayai tawawu kunamili pwi. Pe iya hapwen para aliy, ara hu noruhu andre hu kanrato ta tamahu pe tinahu pwi, hapeko yihu andre karato ata noru hu.
15 Pe andre kupwes kapa kuiki topwe melit to para kusopwat wawu, pe yo mbukeno yi. Pe kapa kunamili wawu pwokeyan, ara andre wawu kanamili yo hape ko, ndre?
16 Pe wawu pwai ngawan tehe kuniyki nopwaran kinsa kili wawu pwi, hapeko hamou andre kipa upakarawani wawu hiyan iya pe uyungurani wawu, pe upo hiyan kili wawu.
17 Hapeko tehen tapeh? Uwiri hiyan iyau kili hu kamai mepo kunpwandrisa hu kansa kili wawu ara, ndre?
18 Pe urakamam iya kili Titus para kiya kili wawu, pe upwandrisa nali rou hamou mepo ipwotisingi lohongan iyasura yiy. Pwen wawupa Titus kinwiri hiyan kinyau kili wawu pwi, ndre? Yiy pe yo kene, ara lohonga yolu pe tokuya yolu iya kili Mwoiwan Haiyan, ara iyawule ko, ndre pwi?
19 Matisan wawu pa ndre melit masih yowu mbusiy, ara yowu penani yowu mbukenan iya mbulmara wawu. Pwi! Kristus iwong iyau kili yowu pe yowu wong iro mbulmara Ngindrai, pwen wawu kowase para nere yowu imwonen, melit masih yowu mbusiy, ara para kipwokeyani wawu ko.
20 Paratesah, unoh tehe kiro mwonen kusa kili wawu, ara andre kunime wawu konto mwonen tehe wawu ngara koro pwi, pe wawu yi andre akanimei tehe yo kunto tehe wawu ngara kapahasaniy, ara pwi. Pe unoh matisan kusa nime akanmasilpat, pe kultuw maimai, pe ndrina lokuh pe mwolou, pe nongan para pwatarananiy, pe pwahalte, pe para sikiye ndramat, pe tasumbuwe.
21 Pe unoh tehe matisan kusa paiwe, Ngindrai to andre kiykiy yo kuya pwan mbulmara wawu, pe andre kurangsi hu soyon mepo hu mbusi pakut mwomwan mamu kinna, pe hu kantapaiwani ndriyahu kinna hu kultuw pwassin pwi, pe para memeng, pe hu kultuw para pilah mepo hu ngara kanamiliy para kambusiy, ara pwi.