13
Hu pwahanou iyahapwen
1 Pe mahapo, ara maporotisap ara nakusa saisai kusa kili wawu. Pe tehe nongan haiyan kinpwai, “Hu lohongai masih mepo ngara akapetpet kiya aliy, ara kipoo ndramat malmou ndre matimou hu kanimei.”
2 Pe kunpwahanou wawu pwen iro mwonen usa nime wawu maporolusap. Pe mahapo nakupwai paiwe yi, konan urupo mawen kili wawu. Pe kiro mwonen kumui kusa kili wawu yi, ara yihu mepo mamu kinna hukanmbusi pakut mwomwan, ara andre hu kanwop korahu mepo andre kuikiy kiya kili hu pwi, pe yihu hayah i.
3 Pe Ngindrai andre kipwainganiy ndrokonan tehe Kristus iripo wong iyau kili yo. Pe kiro mwonen kipwahanou wawu, ara kinho mbuyei pwi, hapeko pwoke tan, ara namandran ita mwalinga wawu.
4 Paratesah, ndrokonan tehe pwoke tan ara pwi, pwen hurapaingi yiy iho kei tondrih. Hapeko iyau pwoke ata Ngindrai, imbusi yiy iro mwalen. Pwen tehen tora ko, pwoke towu ara pwi kili yiy, hapeko iyau pwoke ata Ngindrai, andre yowu koro mwalen kili yiy, iya pwoke tan isa kili wawu.
5 Pe wawu katuluwani wawu mbukenan tehe wawu tora nondriya lohongai ndrisiyon tawawu mbukenan, ndre pwi? Pe akanohonou wawu mbukenan. Pe wawu yirowei tehe Kristus Yesu ara ita kili wawu, ndre pwi—matisan wawu konto tine pwokeyan kinna nohonou pwi.
6 Pe upwotisingi lohongo pe uyirowei tehe yowu rahatini yowu iya hu nohonou.
7 Pe yowu tohun iya kili Ngindrai tehe andre wawu kanmbusi melit handra mwomwan pwi—pe para hu ndramat kanimei tehe yowu topo tine pwokeyan iya nohonou, ara pwi. Hapeko para wawu kambusi tesah mepo imwonen, konan kapa yowu konto tine pwokeyan nondriya nohonou pwi.
8 Paratesah, yowu andre kanmbusi melit handra para kamwisnani nongan ndrokonan pwi, hapeko andre yowu karo tine kiya nongan ndrokonan.
9 Pe yowu pwes iro mwonen pwoke towu iya pwi. Hapeko wawu ma pwoke tawawu, pwen yowu tohun tehe lohonga wawu andre kiman tisingiy.
10 Pwen tunan aro ko, pe uratuluwi hu melit aro isa kili wawu iro mwonen urupo mawen kili wawu. Pe kiro mwonen kusa, ara andre kunwong tahakulan kisa kili wawu kiya pwoke nopwaran ato pwi—pe pwoke nopwaran iye ara Yapan kiniyki kinsa kili yo para kipwokeyani wawu para akamandra, pe para kipwalngani wawu, ara pwi.
Ndrokolololang ta Pol
11 Pe wawu nali pe pisu, nongno nakisahapwen ara. Kiya, akapwes! Pe akapwokeyani wawu hamou-hamou, para akoro mwonen o, pe lohonga wawu kiro handra ko, pe akoropolo ndriya wayis. Pe Ngindrai mepo ndriyan ngara kimbulihi ndramat, pe para ndriya wayis, ara andre kiro polo wawu.
12 Pe akapa ndrokololang kiya kili wawu hamou-hamou tawawu, kiyapolo tahunghung haiyan.
13 Pe hu yowe Ngindrai masih topo iye ara hupwanos ndrokololang tahu.
14 Pe yowu tohun tehe pahas ta Yapan Yesu Kristus, pe kultuw ata Ngindrai para ndriya ndramat kimbulihi ndramat, pe mbultere ata Mwoiwan Haiyan, ara kiro sura wawu masih. Ndrokonan!