8
Mbultani yukyuk ta hu ndramira Yapan
1 Pwen mahapo wawu nali pe pisu, yowu namiliy para wawu kapahasani pahas mepo Ngindrai kiniykiy kinna kili hu mepo hu ngara karokum para kol namandran hape Masetoniya.
2 Pe huya nondriya hu nopwaran handra-handra, hapeko hu kannime mwomwan huya aliy, ara pwi, paratesah, Ngindrai imbusi hu hupwes namandran iya. Pe konan hundroisiy masih, hapeko huiki hu yukyuk ara hu popo ko.
3 Paratesah, yo andre kupohowei kiya ngawan, tehe hu kaniyki tesah hulahi kaikiy o, ara pwi, hapeko huposuran i. Pe humbusiy iya namiliwai pwokeyan ta hu mbukenan.
4 Pe hu rakamam isa kili yowu ihou pe ihou, iyapolo koisirai para yowu kasusuye para kasopwat hu ndramira Yapan.
5 Pe hu mbusiy ara iramwaitini lohonga yowu; Yihuiki hu mbukenan imu na iya kili Yapan, pwen huiki ndriya hu yi isa kili yowu para kambusi namiliwai pwokeyan ta Ngindrai.
6 Pwen pe yowu pwatisingiy iya kili Titus mepo isopwat wawu mamu, para kimui kisa kili wawu, pe kipwokeyani wawu pe kimbusi mbulen para pahas para yukyuk aro kiya hapwen.
7 Pwen melit masih wawu mbusiy ara hiyan—pe iya lohongai ndrisiyon tawawu, pe iya nongna wawu, pe iya lohongai iman tawawu, pe ndriya wawu ileh pe imbuluhi yowu masih—pe unamili pahas para kultuw para pahas para yukyuk iye, ara akoro mbusiy manau.
8 Pwen pe kunpwandrandrahani wawu pwi, hapeko nakunohonou wawu kiya kili hu hayah, para kuyirowei tehe ndriya wawu ngara kimbulihi hu ndramat hayah, ndre pwi.
9 Paratesah, wawu pahasani pahas ata Yapan torou Yesu Kristus, tehe konan menmenan soyon, hapeko tunan wawu, pwen imbusi yiy mbukenan tehe indroisiy. Pwen imbusi yiy tehe menmenan pwi, para kimbusi wawu menmena wawu kihon.
10 Pwen iye ara pwahanou to isa kili wawu iya lohongai aro. Hayou kinna, ara wawu ro mu iya kultuw para yukyuk, hapeko ara ko pwi, wawu namiliy i para akoro mbusiy.
11 Pwen mahapo, mbulen ara wawu kambusiy kipoo kiya hapwen, pe andre kiyingani weleso tawawu tehe wawu kanpomwanye, pe andre akambusiy, ara kiyau tesah imira kili wawu.
12 Paratesah, kapa weleso para yukyuk ara ita, ara Ngindrai ipwes iya aliy, pe wawu kayuk, ara kiro ndruwa tesah imira kili wawu, pe mbuna kiro ndruwa tesah mepo kinto kili yiy pwi.
13 Lohonga yowu, ara para wawu kakuni nopwaran para yukyuk, pe hu hayah koro mwoimwoi o, ara pwi, hapeko para akambusi kultuw ara kiyawule ko.
14 Pwen melit soyon tawawu para lang mahapo, ara andre kisopwat hu kiya tesah mepo hu ndroisiy, pwen kapa kamulan menmena hu kiya soyon pe wawu kandroisiy, ara andre hu kasopwat wawu yi. Pwen lohonga wawu, ara andre kiyawule ko.
15 Tehe pwayan kinpwai kinpa, “Yiy mepo irawurani melit soyon, ara atan soyon pwi, pe yiy mepo irawuraniy tan noye ko, ara atan noye ko pwi yi.”
Pol ipwandrisa Titus para kiya wiri yukyuk
16 Pe urawuloh iya kili Ngindrai mepo iyki ndriyai iya kili Titus para kisa kili wawu para kisopwat wawu, pe ndriyai ara, ara tehe iripo kili yo ko.
17 Paratesah, Titus kintawulohani soksok towu ko, ara pwi, hapeko yiy mbukenan ndriyan illeh para kisa sopwat wawu.
18 Pe andre yowu kapwandrisa nali yowu hamou kiya polo Titus kisa. Hu ndramat hurokum hutora masih, ara huhari ngalan para mbulyan mepo ngara kimbusiy para pohoweya nongan hiyan.
19 Pe parasura nongan iye yi, ara hu mepo hurokum hutora masih, ara hu kantakiniman para kisusuye sura yowu, pe kikuni yukyuk kiya Yerusalem. Pwen mbulen yowu mbusiy, ara para kipwainganiy tehe ndriya yowu ileh para kasopwat, pe andre kihari ngala Yapan mbukenan.
20 Pe yowu mbusiy para kipenani yowu, para ndramat hamou mbuna kikokou kiya mbulen para yukyuk namandran iye.
21 Paratesah, yowu topo wiri ngandran para kambusi tesah mepo imwonen iya mbulmara Yapan, hapeko kinna mbulmara Yapan o, ara pwi, iya mbulmara hu ndramat i.
22 Pe yowu pwandrisa nali yowu hamou i iya surahu, yiy mepo yowu nohonou yiy iya sai soyon pe ipwainganiy tehe ilahiy para kisopwat. Yiy mahapo ara ilahiy, paratesah, iwiri pwoke namandran iyau kili wawu, pwen ndriyan illeh para kisopwat.
23 Pe Titus, ara ndramat hamou para susuyo, pe kipombulen mwalinga wawu. Pe hu nali yowu hu mepo hupwotisingi lohongahu, ara hu wiri poho hu ndramat hutora rokum, pe hu ngara kahari ngala Kristus.
24 Pwen tehen torako akapwaingani namiliwa wawu kiya kili hu ndramat aripo, pe akapwaingani tehe ndriya wawu imbulihi hu ndramat, pe tunan yowu sikiye ngala wawu, pwen andre hu mepo hurokum hutora masih, ara andre hu kanimei.