7
1 Pwen tehen tora ko wawu kowase para nere imwonen, Ngindrai kintandrangan pwen kinna hu melit aro kinsa kiltou. Pwen worou mbukenan tukatali hu kultuw mwomwan masih mepo ngara kipwalngani nombuwerou pe mwoiwarou, pe tukoro haiyan masih, pe tukoro pahandra nohowai ta Ngindrai.
Pol ipwes iyatahu ndramat mepo hu rokum hu rapaiwani ndriya hu
2 Pe akaiki ndriya wawu kisa kili yowu. Yowu kanmbusi mwomwan kinsa kili hamou tawawu pwi, pe yowu kanpwalngani hamou pwi, pe yowu kanpakarawani hamou pwi.
3 Kunpwai toro para kipwasimiri wawu, ara pwi, yo kunpwai mamu pwen tehe wawu ara topo ndriya yowu lang masih, konan yowu koro mwalen ndre kamat kiyapolo wawu.
4 Tunan wawu, pe upwotisingi lohongo namandran isa kili wawu, pe usomwani wawu namandran iya. Wawu pwokeyani yo namandran, pe konan tuya nondriya hu nopwaran masih, wawu mbusi yo upwes namandran iya.
5 Paratesah, tandrohongan yowusa kol namandran hape Masetoniya, ara yowu kaningoh pwi, hapeko yowuya nondriya nopwaran iyau sai masih—pe yowuya nondriya ngandran iyau kili hu ndramat pe yowu hingorowe nohowai.
6 Hapeko Ngindrai ngara kipomene hu mepo ndriya hu ngara kiporu, pwen ipomene yowu iro mwonen Titus isa kili yowu.
7 Pe yowu wiri pwoke iro mwonen isa, pe ariya ko pwi, hapeko wawu pomene Titus. Pe ipwai sata yowu tehe wawu ro longe yo ko, pe lohonga wawu ara itti yo, pe wawu lolohonge soyon isato pwen pe ndriyo, ara ipwes namandran iya tehe mamu pwi.
8 Pe konan kapa kumbusi ndriya wawu kiporu kiya nongan mepo urapayaniy isa kili wawu, ara kunlolohonge soyon kinna aliy pwi, pe konan lohongo imui iya aliy—unimei tehe nongno uratuluwiy, ara iratti wawu, hapeko kinto ndranga niwen pwi—
9 hapeko mahapo ara upwes, paratesah, ndriya wawu iporu, hapeko tunan ndriya poru tawawu, pwen iliwani wawu para akarapaiwani ndriya wawu. Paratesah, ndriya wawu iporu, ara iro ndruwa lohonga Ngindrai, pwen pe iyau kili yowu, wawu kankuni nopwaran kinna sai handra-handra pwi.
10 Paratesah, ndriya poru iyau kili Ngindrai, ara andre kimbusi rou tukarapaiwani ndriya tou, pe Ngindrai andre kiluwani rou kiya sopwat hiyan torou, pe andre tukanlohongani hu pakut mwomwan torou pwi. Hapeko ndriya poru para kol pwan, ara ngara kiyki kimat.
11 Paratesah, akanime tesah Ngindrai kinmbusiy iyau ndriya poru tawawu ara, pe imbusi ndriya wawu illeh, pe imbusi ndriya wawu illeh tehe wawu konto nondriya mwomwan pwi! Pe ndrangsai para kultuw mwomwan, ara irakelehani wawu iya hu hingorou para kultuw para totohun, pe iyki ndriya leh tehe Ngindrai andre kiyki kora mwomwan torou. Pe iya lohongai masih, ara iyinganiy tehe wawu kanmbusi mwomwan handra pwi.
12 Pe konan kunratuluwi kinsa kili wawu, ara para kisa kili ndramat mepo imbusi mwomwan, ara pwi, ndre kiya kili yiy mepo mwomwan iro kili yiy, ara pwi, hapeko iya mbulmara Ngindrai, andre wawu mbukenan wawu kanimei tehe wawuiki wawu masih isa kili yowu.
13 Pwen hu kultuw masih aro, ara kinpwokeyani yowu ko, ara pwi.
Pe pwesai ta Titus ara imbusi yowu pwes, paratesah, wawu masih wawu sopwat mwoiwan para kipwoke.
14 Pe mamu ara upwai iyata Titus tehe usomwani wawu, paratesah, wawu kaniyki masirai kinsa kili yo pwi. Hu melit masih yowu pwai isa kili wawu ara ndrokonan, pwen yowu somwani wawu. Pe iyingani iya kili Titus tehe ara ndrokonan i.
15 Pwen pe Titus ara koyun isikirani wawu pe ilohongani wawu tisingiy, tehe isa ara wawu masih hilingi nongnan, pe wawu rawulohani yiy, pe wawu wiri yiy iyapolo nohowai.
16 Pwen upwes pe upwotisingi lohongo tehe andre wawu kambusi kultuw hiyan opu.