6
1 Pe yowu ara tehe ndramat para poya mbulya Ngindrai tehe wawu ko, pwen yowu rakamam isa kili wawu para wawu mbuna kawiri pahas ta Ngindrai kiya mwaihei o.
2 Paratesah, Ngindrai ipa,
“Nondriya lenge namiliwo pwokeyan, ara uhilingi wawu. Pe nondriya lang para sopwat hiyan, ara usopwat wawu.”
Pe upwai isa kili wawu, tehe mahapo, ara lenge namiliwai pwokeyan ta Ngindrai, pe mahapo, ara lang para sopwat hiyan.
Hu nopwaran Pol iya aliy
3 Pe yowu kansingori saya hamou ta wawu pwi, pwen pe andre hu ndramat kankahi mwomwan handra kiya mbulya yowu, ara pwi.
4 Hapeko yowu paingani yowu mbukenen tehe ndramat para poya mbulya Ngindrai iya hu pohosai masih: yowu rahatini yowu pwokeyan nondriya hu nopwaran, pe nondriya hu nopwaran, pe hu ngandran, pe hu mwomwan,
5 pe hu rayi yowu, pe huiki yowu iya kou, yowu ya mbulmara hu ndramat para tambumbuwat, yowu ngot iya mbulen, pe ping ara yowu konho matin hiyan pwi, pe ngara yowu kamundrui.
6 Pe iyau kultuw howen, pe iya lohongai ileu, pe kultuw pahalan mepo iyau kili Mwoiwan Haiyan, ndriya yowu ngara kimbulihi hu hayah.
7 Pe yowu ngara kawong nongan ndrokonan ara iyau pwoke ta Ngindrai, pe iyapolo kultuw imwonen tehe hu menmena pahun iro nima yowu mot pe kamou,
8 pe konan hu ndramat karanuhuyani yowu, ndre kanranuhuyani yowu pwi, pe hupwataranani yowu, pe konan kultuwayi yowu hiyan, hapeko yihupa yowu ndramat para pwandrandraman.
9 Pe hu pahasani yowu, ara tehe hu kanpahasaniy yowu pwi, pe konan yowuro mwalen, hapeko tehe hu ndramat kanmat, hu mwiriyani yowu, hapeko yihu kanitingundru yowu kanmat pwi.
10 Pe yowuiki koisariy, hapeko lang masih yowu ngara kapwes, pe yowu ndroisiy, hapeko yowu mbusiy pe hu soyon ara menamena hu ihon. Yowu ndroisiy, hapeko menmena yowu soyon.
11 Wawu ndramira Korin, yowu wong ngawan isa kili wawu, pe yowuiki ndriya yowu masih isa kili wawu.
12 Pe yowuiki ndriya yowu isa kili wawu, hapeko wawu kaniyki yowu kisa kili wawu pwi.
13 Pe uwong ngawan isa kili wawu tehe wawu ara noru—pe wawu kaiki ndriya wawu masih i.
Pwahanou iya lohongai para totohun iya kili ngindrai pwasoyou
14 Pe wawu mbuna akasusuye kiyasura hu ndramat hu kanpwotisingi lohongahu pwi. Paratesah, kultuw imwonen pe kultuw pwassin ara kinho susuye kinna wule pwi. Pe lokuhan kinho susuye kinnapolo ngana lang pwi.
15 Pe tehen tapeh, Kristus pe Sinai ara andre hilu kasusuye kiya harong, ndre pwi? Pe ndramat ipwotisingi lohongan, pe ndramat kinpwotisingi lohongan pwi, ara andre lohonga hilu kiro wule handra ko, ndre pwi?
16 Pe tehen tapeh, yumwa totohun namandran ta Ngindrai pe tahu ngindrai pwasoyou ara andre kiyawule hawum o, ndre pwi? Paratesah, worou ara yumwa totohun namandran ata Ngindrai mwalen. Pe tehe Ngindrai kinpwai kinpa:
“Andre kuro sura hu, pe andre kurikai mwalinga hu,
pe andre kurayah Ngindrai tahu, pe yihu andre karayah hu ndramiro.”
17 Pe tehen torako, Yapan ipa, “Akatali hu akasa mawen
pe akoro mawen kili hu.
Pe melit pwassin ara nima wawu mbuna kiya aliy,
pwen andre kuwiri wawu kasa kili yo.”
18 Pe Yapan Pwokeyan iya ipa, “Andre kurayah Tama wawu hamou,
pe wawu andre karayah hu noru kamai pe pihin.”