5
Yowu topo longe nombuwe yowu howen
1 Paratesah, yowu pahasaniy tehe kapa yopai turopo aliy iripo kol pwan ara Ngindrai kipwalnganiy, pwen suwe yowu hawum ara andre kiyau kili Ngindrai. Seu, mepo andre kinto-kinto, ita kol paingan, yang, mepo kanpuliy kinyau nima ndramat, ara pwi.
2 Pe maturopo ndron nombuwerou para kol pwan, pe tutopo rang, ara worou namiliy para kakohi worou kiya yopai para kol paingan yang,
3 paratesah, kapa tukakohi rou kiya aliy, ara andre tukonto tehe ndramat mwayen pwi, ara pwi.
4 Pe maturopo ndron yopai para kol pwan iye, tukuni nopwaran pe turang malirou, paratesah, tukannamiliy para tukankohi rou pwi, ara pwi, hapeko tunamiliy para nombuwerou para kol paingan yang kikohi rou, pwen nombuwerou mepo andre kimat, ara andre kiwiri taleh.
5 Pe Ngindrai ara yiy mbukenan imwanye rou para tukambusi melit aro. Pe yiy iyki Mwoiwan Haiyan irayah tehe kene rou para hu melit hiyan torou mepo andre kisa.
6 Pwen tehen tora ko, lang masih yowu topo tine pwokeyan, pe yowu pahasaniy tehe yowu topo ndron nombuwe yowu para kol pwan, pwen yowu topo mawen ndron kili Yapan.
7 Paratesah, yowu topo mwalen, ara iyau lohongai ndrisiyon towu, pe kinna tesah yowu topo nimei, ara pwi.
8 Pe nakupwai tehe, yowu pwokeyani lohonga yowu pe yowu namiliy para katali nombuwe yowu para kol pwan, pe kaya kol mepo itapolo Yapan.
9 Pwen tehen tora ko, konan yowu topo nombuwe yowu para kol pwan iye, ndre koro mawen nombuwe yowu iye, ndroiyi lohonga yowu, ara para yowu kapwesani yiy.
10 Paratesah, worou masih andre korotine mbulmara ndrohonoku pwan-pwan para king ta Kristus. Pe worou hamou-hamou andre kawiri kenerou kiya hu melit tumbusiy, tandrohonga turondron nombuwerou, hu melit hiyan ndre hu mwomwan.
Mbulen para takonuh
11 Pe yowu pahasani nohowai ta Yapan ara tesah, pe yowu pombulen pwokeyan para kanohonou, para kaluwi lohongahu ndramat hayah i. Ngindrai ipahasaniy tehe yowu pwai ndrokonan, pe upahasaniy tehe lohonga wawu ileu iya aliy i.
12 Yowu kanmbusi nongan iye paiwe para kiluwi lohonga wawu pe wawu kapa yowu ndramat hiyan, ara pwi, hapeko yowuiki lohonge para wawu kapwes sata yowu pe akasikiye yowu, pwen andre wawu kalahiy para akasomwi hu mepo ngara kasikiye hu kiya tesah hu ngara kanimei, pe kinna tesah mepo ita ndriya ndramat, ara pwi.
13 Pwen kapa lohonga yowu pwi, tehe hu hayah ngara kapwai, pwen ara para kihari ngala Ngindrai, pe kapa lohonga yowu iripo mwonen, ara para hiyan tawawu.
14 Paratesah, Ngindrai inamili yowu pe imbusi ndriya yowu ileh, paratesah yowu pahasaniy tehe ndramat hamou opu imat sata worou masih, pwen tehen tora ko, hu ndramat masih hu kanmat.
15 Pe Kristus imat ara para kirakonuhi hu ndramat masih, pwen hu mepo hu topo mwalen, ara hu mbuna karo tahu mbukenan, hapeko hu karo pe kalohonganiy tehe kinmat iyatahu pe kinsa itine paiwe.
16 Pwen pe kiro mahapo kiya, ara andre yowu kanpire ndramat kiya lohongai para kol pwan, ara pwi, konan kapa mamu yowu nime Kristus iyau sai aro, hapeko mahapo, ara yowu konho mbusiy tehen tora pwi.
17 Pwen tunan aro ko, yiy mepo ita kili Kristus, ara yiy ndramat hamou howen, kultuw para mamu, ara kintali yiy, pe kultuw howen kinwiri nokun.
18 Pe melit masih aro ara iyau kili Ngindrai, yiy mbukenan kinkonuh tou iyau kili Kristus, pe kiniyki mbulen para takonuh kinsa kiltou.
19 Pe Ngindrai irakonuhi hu ndramat para kol pwan iya kili yiy mbukenan, ara iyau kili Kristus, pe kinnime hu pakut mwomwan tahu pwi. Pe kiniyki nongan para takonuh kinsa kili tou.
20 Pwen tehen torako, yowuya poho Kristus para katiyani nongnan. Yowu mbusiy toro, ara tehe Ngindrai mbukenan irakamam isa kili yowu. Pe yowu wiri lohonga Kristus pe yowu wong isa kili wawu, para akarakonuh kiya kili Ngindrai.
21 Ngindrai imbusi Kristus mbukenan, yiy mepo pakut mwomwan kinto kili yiy pwi, para kirayah yukyuk para pakut mwomwan torou, pwen kili yiy opu, andre tukarayah ndramat kultuwayerou imwonen kiya kili Ngindrai.