4
Nopwaran mepo ngara kimbusi ndramat pwoke pwi, pe taleh para titine para kamulan
1 Pe ehen torako, iya koisirai ata Ngindrai opu, pwen iyki mbulen iye isa kili yowu, pe wele yowu ara kinimai pwi.
2 Hapeko yowuiki ndruwa yowu iya kultuw kokohon pe hu kultuw mwomwan mepo ngara kiyki masirai mepo hu ndramat ngara kambusiy; ndre yowu konho rikai iya kultuw para pwasoyou, ara pwi. Pe tehen torako, yowu konho sulyani nongna Ngindrai pwi yi. Yowu pohowe nongan ndrokonan iya ngawan, para hu ndramat masih kayirowe kultuwayi yowu, ara imwonen iya mbulmara Ngindrai.
3 Pe kapa nongan hiyan yowu topo pohowei ara yowu kulaniy, pwen yowu kulaniy, ara iya kili yihu ndramat mepo andre hu kasongsin.
4 Pe ngindraye hasap para mahapo iye mepo Sinai, ara kinyohi marahu ndramat mepo hu kanpwotisingi lohongahu pwi, pwen pe hu kanlahiy para kanime ngana pwoke para nongan hiyan ta Kristus, ara pwi, yiy mepo mwensen tehe Ngindrai.
5 Paratesah, yowu kanpohowe nongna yowu mbukenan, ara pwi, hapeko yowu pohowe nongna Yesu Kristus mepo yiy Yapan, pe iya ngala Yesu, yowu mbukenan rayah tehe hu ndramat para poya mbulya wawu.
6 Paratesah, Ngindrai mbukenan ara mamu kinpa, “Lang kilenganiy kiyau lokuhan kisa,” pe kinmbusi nganan kinlenganiy iro ndriya worou, para kiyki ngana pwoke para lohongai iman ta Ngindrai kisa kili yowu, pe ipwainganiy ara iro mbulmara Kristus.
7 Hapeko yowu ara mamenmena yowu hiyan para mwoiwa yowu ita nondriya hu kohoi mepo penehu iya pwan nakak, para kipwainganiy tehe pwoke ihohin para koro mu iye, ara iyau kili Ngindrai pe kinyau kili yowu pwi.
8 Hu nopwaran handra-handra ilokomwani yowu iyau haroh-haroh, hapeko kintaluluwi yowu pwi, pe yowu ngara kahindrundru, hapeko yowu konhotohai pwi,
9 pe hu ndramat ngara karandroyani yowu, hapeko Ngindrai kinho tali yowu pwi. Pe hu ngara kalosani yowu kayapwan, hapeko kinho pwalngani yowu pwi.
10 Pe lang masih yowu ngara kakuni kimat ta Yesu kiro nombuwe yowu, pwen andre taleh ta Yesu, ara andre kipwainganiy kiya ngawan kiya nombuwe yowu.
11 Paratesah, yowu mepo yowu topo mwalen, ara lang masih yowu ngara kaya nondriya mwomwan para kamat kiya ngala Yesu, pwen pe taleh tan, ara andre kipwainganiy kiya ngawan kiya nombuwe yowu mepo andre kinmat pwi.
12 Pwen tunan ara ko, yowu topo pombulen para kamat kiya aliy, hapeko taleh, ara itapo mbulen kili wawu.
13 Pe pwayan kinpwai pwen toro: “Upwotisingi lohongo, pwen tehen tora ko uwong.” Pe nondriya mwoiwa lohongai ndrisiyon ara kopu, yowu pwotisingi lohonga yowu, pwen tehen tora ko, yowu topo pohowe nongan i.
14 Paratesah, yowu pahasaniy tehe Ngindrai mepo kinhingini Yapan Yesu kintine kimat, ara andre kihingini worou katine kiya polo Yesu, pe kiyingani yowu kiyapolo wawu kiya kili yiy mbukenan.
15 Melit masih iye, ara para hiyan tawawu. Pwen pahas mepo andre kisalti hu ndramat soyon-soyon iya, ara andre kimbusi hu pe hu karawuloh namandran iya, pe hu kahari ngala Ngindrai.
16 Pwen tunan aro ko, wele yowu kinimai pwi, konan iripo pwonomwili nombuwe yowu, hapeko mwoiwa yowu, ara lang sih tehe sih, Ngindrai ngara kimbusiy kirayah howen.
17 Paratesah, hu nopwaran mendreheh pe iho mwak o, mepo yowu topopo iya nondriyan, ara andre kinto ndrangan niwen pwi, hu nopwaran aro, ara iripoiki nonowa pwoke mepo andre kinto-kinto isa kili yowu.
18 Pwen pe mara yowu kinna melit mepo topo nimei, ara pwi, hapeko mara yowu ara itapo iya melit mepo konho nimei pwi. Paratesah, melit yowu topo nimei, ara andre kinto ndrangan niwen pwi, hapeko melit mepo konho nimei pwi, ara andre kinto-kinto.