3
1 Nongan yowu pwai iye matisan wawu pa ndre yowu pakasap ngala yowu mbukenan paiwe yi, ndre? Ndre yowu tehe yihu ndramat hayah mepo andre karatuluwi nongan para kisa kili yowu, ndre kiyau kili wawu para kipwaingani yowu kiya kili hu hayah, ndre?
2 Pe wawu mbukena wawu, ara nongan yowu kanratuluwiy pwen iripo ndriya yowu, wawu ara tehe nongan mepo ndramat masih andre kapohowei, pe andre kapahasaniy.
3 Wawu yinganiy tehe wawu ara nongan handra iyau kili Kristus, wawu pwaingani mbulya Ngindrai yowu mbusiy. Pe nongan iye ara kanratuluwiy kinna pene hapesah pwi, hapeko ratuluwiy iyasura Mwoiwa Ngindrai mwalen, pe kinto kili hu pat mepo hu ndramat sahiy pwi, hapeko ita ndriya hu ndramat.
4 Pwen yowu rahatini lohonga yowu iya melit masih aro, paratesah, yowu pwotisingi lohonga yowu iya mbulmara Ngindrai iyau kili Kristus.
5 Pe yowu mbukenan ara kanlahiy para kambusi melit handra, ara pwi, hapeko Ngindrai opu imbusi yowu lahiy.
6 Yiy imbusi yowu lahiy masih para kambusi mbulen para tapaniu handra howen—tapaniu mepo ratuluwiy, ara pwi, hapeko iyau kili Mwoiwan Haiyan. Paratesah, tapaniu saken mepo ratuluwiy, ara andre kitingundru ndramat, hapeko tapaniu howen, ara Mwoiwan Haiyan andre kiyki taleh.
Nonowa pwoke namandran iya para tapaniu howen
7 Pe Nongan para pwahanou saken mepo kanratuluwiy kinna pat, ara manonowan, pe iluwani hu ndramat iya kimat, pwen pe hu ndramira Yisrayel ara hu kanlahaiy para kanimnim kiya mbulmara Mose, ara pwi, paratesah, iya nonowa pwoke mepo kamulan andre kiyong.
8 Pwen ngana pwoke iya mbulen ata Mwoiwan Haiyan, ara nganan iramwaitiniy masih, ndre pwi?
9 Pe kapa mbulen para nongan para pwahanou saken iyki kora ndramat ara manonowa pwoke tan, pwen mbulen mepo imbusi kultuwayi ndramat iro mwonen, ara andre nonowa pwoke para aliy, ara andre kiramwaitiniy masih.
10 Paratesah, ndrokonan para aliy, ara nonowa pwoke para mbulen para mamu, ara nakisau, pe nonowa pwoke para aliy, ara kinna wule kinna nonowa pwoke howen, ara pwi.
11 Pe kapa tesah mepo andre kihipwen kisa kiya polo nonowa pwoke tan, pwen nonowa pwoke mepo andre kinto-kinto, ara andre kiramwaitiniy masih!
12 Pwen tehen torako, yowu topo pwotisingi lohonga yowu iya melit hiyan itapo isa, pe lohonga yowu, ara ipwoke namandran iya aliy.
13 Pe worou ara tehe Mose, mepo ikulani mbulmaran iya koyau hasai, pwen pe hu ndramira Yisrayel ara hu kanlahiy para kannime nonowa pwoke mepo andre kihipwen iro kili yiy, ara pwi.
14 Hapeko lohonga hu Yisrayel ara indrap, paratesah, iro tandrohongan lang ara pe isa matne lang mahapo, koyau iya harong ara ko, ara ita kulani marahu manau, iro mwonen hu ngara kapohowe tapaniu saken. Pe hu kanrapiyaniy mapu, paratesah, Kristus opu, ilahiy para kirapiyaniy.
15 Pe iro tandrohonga lang ara isa matne mahapo, iro mwonen hu ngara kanime nongan para pwahanou ta Mose, ara pwen tehe koyau hasai ita kulani lohonga hu ndron.
16 Hapeko kapa hamou lohongan kipwotisingi Yapan, pwen Ngindrai andre kitali koyau ara kiya mawen kili yiy.
17 Pwen Yapan ara Mwoiwan Haiyan, pe kapa hape aleheh Mwoiwan Haiyan ata Yapan ara kiro aliy, ara ndramat ara ita mwoimwoi.
18 Pe worou masih mepo koyau kinkulani mbulmararou pwi, ara tupwainganiy nonowa pwoke ta Yapan. Pe nonowa pwoke ara ko, Ngindrai imbusi rou tupiy pe mwense rou irayah tehe yiy, iyapolo nonowa pwoke mepo andre kiya namandran kiro sih kiya sih, mepo iyau kili Yapan mepo Mwoiwan Haiyan.