2
1 Pwen pe ulohonganiy tehe mbuna kusa saisai kusa kili wawu, pwen andre kunposura nopwaran kisa kili wawu pwi.
2 Paratesah, kapa kumbusi ndriya wawu kimwa, pwen hiyeh iripo ndron para kimbusi yo kupwes, hamou pwi hapeko wawu ko mepo umbusi ndriya wawu imwa ara.
3 Pe nongan kuntatuluwiy kinsa kili wawu, ara ndroiyin toro, kapa kusa kili wawu, ara hu mepo hu mbusi ndriyo ipwes, ara mbuwali para kumbusi ndriya hu kiporu. Pe upwokeyani lohongo isa kili wawu masih, tehe wawu masih andre kapwes kisapolo yo.
4 Paratesah, nongan kuntatuluwiy kinsa kili wawu, ara mandruimoro pe ndriyo iporu namandran iya, pe nongan aro, ara para kimbusi lohonga wawu kimwa, ara pwi, hapeko para wawu kapahasaniy ndriyo imbuluhi wawu tapeh.
Akatali mwomwan ta hu ndramat mepo hu mbusi mwomwan isa kili wawu
5 Pe kapa hamou kimbusi ndriya hu ndramat hayah kiporu, ara kinmbusiy kinsa kili yo pwi, iya nimnim handra, ara kinmbusi ndriyo iporu pwi, hapeko imbusi ndriya wawu masih iporu. Pe kunnamiliy para kuwong pwokeyan kiya aliy pwi.
6 Nopwaran mepo wawu soyon wawuikiy iya kili yiy, ara hiyan ilahi yiy.
7 Pwen tunan ara ko, hiyan para akatali mwomwan tan, pe akapwokeyani yiy, pe ndriyan andre kinporu pwi, pe welen andre kinimai pwi.
8 Pwen tehen torako, urakamam isa kili wawu tehe akambusi yiy kipahasaniy tehe ndriya wawu ara imbulihi yiy.
9 Pe ndroyin handra yi nongan kunratuluwi kinsa kili wawu, ara para kunimei tehe wawu lahiy para akoro tine pwokeyan kiya hu nohonou, pe para akoro ndruwa hu pwahanou to, ndre pwi.
10 Pe kapa akatali mwomwan ta ndramat hamou, ara yo andre kutali mwomwan tan i. Pe tesah mepo kuntali pwen—pe tesah mwomwan ita ndron para akataliy—ara uwiri noku wawu pe kuntaliy pwen iya mbulmara Kristus,
11 umbusiy tehen tora para Sinai andre kinramwaitini rou pwi, paratesah, hu kultuwayin, ara tupahas iya aliy.
Hu ndramat para pohoweya Tapaniu Howen
12 Pe iro mwonen uya kol namandran Trowas para kupwohowe nongan hiyan ta Kristus, ara unimei tehe Yapan kintepe sai hasai kinsa kili yo,
13 pe lohongo kinikuw pwi, paratesah, kunkahi nali Titus kinto ariya pwi. Pwen upwai para kanime hu kamulan, pe utali hu pe uya kol namandran hape Masetoniya.
14 Hapeko urawuloh iya kili Ngindrai, yiy mepo lang masih ngara kiluwani tou tehe hu ndram pe tehe hu ndramat huro kou, pe turamwatini pahun, ara tuppai iya kili Kristus. Pe imbusi rou tupohowe nongan para lohongai iman ta Kristus, pe nongan ara isilihi kol masih tehe ngonoho melit sih layin.
15 Paratesah, iya kili Kristus, worou ara tehe melit ngonohon layin mepo iyki pwesai iya kili Ngindrai mwalinga hu mepo Ngindrai kinsopwat hu, pe hu mepo andre kipwalngani hu yi.
16 Pe iya kili hu mepo Ngindrai andre kipwalngani hu, ara worou tehe ngonoho pwala para kimat mepo isuwi hu, pe iya kili hu mepo Ngindrai andre kisopwat hu, ara worou tehe melit ngonohon layin para taleh iya kili hu. Pwen hiyeh ndrokonan ilahiy para kimbusi mbulen aro?
17 Hapeko worou ara tehe hu ndramat soyon mepo ngara hu kaya payumwa wum pe kannimmanga singayai, pe kapohowe nongna Ngindrai, ara pwi. Hapeko lohongai worou mbusiy, ara iyau kili Kristus opu, pe worou tuwong iya mbulmara Ngindrai, tehe worou ndramat para poya mbulya Ngindrai pe yiy ipwandrisa worou.