Nongan luhin Pol iratuluwiy iya kili
Hu Korin
Nongan imu
Hu ndramat hayah hurokum para kol ngawan Korin ara ipwataranani Pol, pe aro ara imbusi Pol indrangis. Yiy pakiramwanyani nongan kiyapolo hu para Korin, pwen pe iratuluwi nongan aro, para andre kipwes paiwe kiyapolo hu.
Nongan imu mepo Pol iratuluwiy, ara iwong tahakulan mamu kinna iya kili hu para Korin. Pe yiy ara mbuwalin masih para kipa nongan aro, hapeko yihu tandroindroi pe hupwataranani yiy, pwen tehen torako, iwong tahakulan iya kili hu. Pe yihu hilingi nongnan pe humwaniyani kultuwayi hu, pwen pe ipwes namandran iya.
Iro tandrohongan ara, yihu Kristen para kol namandran hape Yutiyah ara mwomwan iro kili hu, pe Pol iro mbultani singayai para kikuniy pe kiyahang hu. Pwen tehen torako, ita sapta 8 pe 9, Pol iwong nongan para kirakelehani ndriya hu para Korin para hu kayuk singayai kiya mbulen aro.
Pe nongan iyahapwen masih mepo Pol iratuluwiy, ara iwong iyatahu aposel hayah i para pwandrandraman, ara husa pe huro Korin pe huroiki ngala Pol iya pwan, pe huro pwasimiri mbulen para Aposel, ata Pol.
1
1 Iyau namiliwai pwokeyan ta Ngindrai, yo Pol aposel hamou ata Kristus Yesu uratuluwi nongan iye iyapolo Timoti mepo nali worou.
Nongan iye isa kili wawu ata Ngindrai mepo wawu rokum, pe wawu tora kol Korin, iyapolo hu ndramira Ngindrai haiyan masih hutora kol Akaiya masih.
2 Pahas pe ndriya wayis iyau kili Ngindrai Tamarou pe Yapan Yesu Kristus isa kili wawu.
Karawuloh kiya kili Ngindrai mepo ngara kipomene ndramat
3 Pe tukahari ngala Ngindrai pe Tamarou Yapan Yesu Kristus, yiy mepo Tamarou mepo koyun ngara kisikirani rou pe ngara kipomenerou lang masih,
4 pe yiy mepo nondriya hu nopwaran masih torou, ngara kipomene worou, pwen andre worou kapomene yihu mepo ngara hu kaya nondriya nopwaran, pe worou mbukenan andre kapomene hu kiya pwokere mepo iyau kili Ngindrai.
5 Paratesah, pwen tehe hu nopwaran soyon Kristus ikuniy, pwen worou i tukuniy, pwen pe Ngindrai andre kipomenerou hiyan kiyau kili Kristus.
6 Pwen kapa yowu kaya nondriya nopwaran, ara para kiyki sopwat hiyan pe para Ngindrai andre kipomene wawu. Pe andre kiyki wawu para karo wayis o, pe akoro tine pwokeyan kiya hu nopwaran mepo iyaharong o tehe yowu ngara kakuniy.
7 Pe lohonga yowu iya melit hiyan itapo isa, ara ipwoke, paratesah, yowu pahasaniy tehe wawu ngara kaya nondriya hu nopwaran tehe yowu iya aliy, pwen Ngindrai andre kipwomene wawu, tehe ngara kipwomene yowu yi.
8 Pe wawu nali pe pisu, yowu namiliy para karakelehani lohonga wawu iya hu nopwaran yowu ngara kaya nondriyan, iro nondriya kol namandran hape Esiya. Yowuya nondriya nopwaran namandran, mepo iramwaitini yowu para kakuniy, pe yowu lohonganiy tehe andre yowu kamat kiya aliy.
9 Ndrokonan para aliy yowu hingorowei iya ndriya yowu, ara yowu hingorowe hingorou para kimat. Hapeko melit aro irayah ara para yowu mbuna karo ndruwa lohonga yowu mbukenan, hapeko lohonga Ngindrai mepo kihingini hu ndramat katine kimat.
10 Pe kinsopwat yowusa mawen hu nopwaran mepo andre yowu kamat kiya aliy, pe andre kisopwat yowu paiwe yi. Pwen yowuiki lohonga yowu iya kili yiy iya melit hiyan itapo isa, tehe andre kiro sopwat yowu manau,
11 pwen tehe wawu sopwat yowu para wawu tohun isa towu. Pwen hu ndramat soyon andre karawuloh, paratesah, namiliwai pwokeyan ta Ngindrai mepo namandran, ara imbusi yiy isomwi hu soyon mepo hu tohun para yowu koro hiyan.
Pol irapaiwani lohongan para tokuyan
12 Pe andre yowu kasap ngala yowu toro: Lohonga yowu ipwokeyani titiye towu tehe kultuwayi yowu mbukenan, ara imwonen iya kili hu ndramat para kol pwan. Pe susuye towu isa kili wawu iya kultuw haiyan, pe tokuya yowu ara iyau kili Ngindrai. Pe yowu kanmbusiy toro iya lohongai waison para kol pwan, ara pwi, hapeko iyau pahas ta Ngindrai.
13 Paratesah, nongan yowu ratuluwiy isa kili wawu, ara para wawu kakowu para kapohowei ndre lohonga wawu andre kinileu kinna aliy pwi, ara pwi. Pe uohonganiy tehe lohonga wawu andre kileu kiya aliy.
14 tehe lohonga wawu kinileu hape kinna aliy, pwen lohonga wawu andre kileu masih pe wawu kasap ngala yowu, pe yowu yi andre kasap ngala wawu kiro mwonen lenge Yapan Yesu kimui.
15 Paratesah, upwotisingi lohongo iya melit aro, pe ulohonge para kusa saisai kusa kili wawu kimu, pwen andre hiyan para aliy, ara andre akawiri maporolusap.
16 Yo ulohonganiy para kusa saisai kusa kili wawu kiro mwonen nakuya kol namandran hape Masetoniya, pe kuro Masetoniya kumui, ara kusa kili wawu yi, pwen andre kuro kili wawu pe wawu kapwandrisa yo kuya kol namandran Yutiyah.
17 Pe iro mwonen ulohonganiy tehen toro, ara kunmbusiy o mwaihei pwi. Pe hu lohongo ulohonganiy ara umbusiy iya lohongo para kol pwan, pwen tora ko andre kupa, “Pwi ara pwi”pe “Ehe ara ehe” porosih o, ndre?
18 Hapeko ndrokonan tehe Ngindrai ara andre kimbusi tesah ipwai para kimbusiy, pwen nongna yowu isa kili wawu ara “Ehe” ndre “Pwi” ara pwi.
19 Paratesah, Noru Ngindrai Kamai mepo Yesu Kristus, yo pe Silas pe Timoti yowu kanpohowe yiy kinsa kili wawu, ara yiy “Ehe” ndre “Pwi” ara pwi, hapeko iya kili yiy, nongan masih yowu pohowei ara “Ehe” kopu.
20 Paratesah, konan Ngindrai kintandrangan soyon pwen, masih ara “Ehe” iya kili Kristus. Pe iyau kili yiy opu, “Ndrokonan” ara yowu kanpwai para kahari ngala Ngindrai.
21 Pe Ngindrai opu imbusiy pe yowu pe wawu kene topo tine pwokeyan iya kili Kristus. Pe yiy ara kintakinima rou,
22 pe kintakinima rou kantayah tan mbukenan, pe iyki Mwoiwan Haiyan isa ndriyarou ara tehe kene rou hiyan, para tukapahas kiya tesah, mepo kintandrangan kinna aliy para tesah andre kisa.
23 Pwen uyoh iya kili Ngindrai mepo ipahasani yo—pe andre kisopwat wawu koro hiyan, pe andre kunlohonge para kunmui kunsa Korin, ara pwi.
24 Pe kunpa yowu ara tehe yapane wawu iya lohongai ndrisiyon tawawu, ara pwi, hapeko yowu pombulen sura wawu iyapolo pwesai. Paratesah, lohongai ndrisiyon tawawu imbusi wawu tora tine pwokeyan.