16
Hu mbulte singayai tahu ndramira Ngindrai
1 Kiya iya lohongai para singayai mepo wawu mbultaniy para kisopwat hu ndramira Ngindrai: Wawu koro ndruwa lohongai mepo kunpwai kinna kili hu mepo hu rokum para kol Kalatiya.
2 Lang sih kimu para sandre masih, ara hamou-hamou tawawu kirato singayai hape kiro mawen, mepo ngara Ngindrai ngara kitoholi wawu iya aliy, ara akapo suran. Pwen kiro mwonen kusa, ara andre wawu kanmbultani singayai pwi.
3 Pe kiro mwonen kusa rayah, ara andre kuratuluwi hu nongan para kipwainganiy tehe wawu rakinima hu, pe wawu pwandrisa hu para yihu kawiri yukyuk kiya Yerusalem.
4 Pe kapa kulohonganiy tehe ara hiyan para yo kuya yi, pwen andre hu kasusuye sura yo pe kaya.
Lohonga Pol mbukenan
5 Pe andre kuya pwen te kol namandran hape Masetoniya kimu na, kiyamulan andre kusa kili wawu—paratesah, andre kuya yau Masetoniya.
6 Pe matisan kuro sura wawu hape na, ndre kuro sura wawu nondriya lenge nowou, pwen andre wawu kasopwat yo kiro nondriya tokuyo para hape aleheh kuya aliy.
7 Paratesah, unamiliy para kusa nime wawu, pe mbuwali para kusa pe kunto ndrangan niwen pwi, ulohonganiy para kusa saisai pe kurosura wawu hape na, kapa ara Yapan kisomwiy.
8 Hapeko andre kuro kol ngawan Epesus kipoo kiya manne lang para Pentekos,
9 paratesah, Ngindrai ara kintipe sai hasai namandran para mbulen kinsa kili yo, konan hu ndramat soyon ngara hu kalowani yo.
10 Pe kiro mwonen Timoti kisa kili wawu, ara wawu kapwokere yiy kiya hiyan pe mbuna kinoh, kiro mwonen kiro sura wawu, paratesah, ngara kimbusi mbulya Yapan tehe yo ko.
11 Pe hamou tawawu mbuna kinime yiy tehe yiy mwaihei o. Wawu kapwandrisa yiy kiyau kiya polo ndriya wayis, pwen pe andre kimui kisa kili yo. Lohongo iti yiy tehe andre kisa kiya sura nalin hu.
12 Pe nongna nali worou Apollos ara toro: Upwatisingiy para kisa kili wawu kiyasura hu nali wawu. Pe yiy kinhingorowei hiyan para kiya mahapo pwi. Hapeko andre kiya kapa sai kitte kiyatan.
13 Pe wawu koro hinehes, pe akapwotisingi lohongai ndrisiyon tawawu, pe akarahatini wawu, pe akoro tine pwokeyan.
14 Pe nondriya melit masih wawu kambusiy, ara ndriya wawu kimbulihi wawu pe akambusiy.
15 Wawu pahasani tehe hu ndrai sih ata Stepanas, ara yihu rayah yowe Ngindrai imu iya kili hu para kol namandran hape Akaya. Pe huiki hu masih iya mbulen ta hu ndramat haiyan ta Yapan. Pwen urakamam isa kili wawu nali pe pisu,
16 para akaiki wawu kaya pwan pahandra hu tehe hu pohon, pe akasusuye kiyasura hu kiya mbulen iye, pe akapo mbulen pwokeyan kiya aliy.
17 Pe upwes iro mwonen Stepanas, Potunatus, pe Akaikus ara husa rayah, paratesah, tesah wawu ndroisiy, ara hu sopwat wawu iya aliy.
18 Paratesah, hu mbusi mwoiwo ipwes pe lohonga wawu yi ikuw. Hu kamai tehen tora, ara hiyan para koro nimnim kiyata hu.
Nongan iya hapwen
19 Pe hu mepo hurokum hutora kol namandran hape Esiya, ara hu pwanos ndrokololang isa kili wawu. Akwila pe Prisilla hilupa ndrololang tahilu isa kili wawu iya ngala Yapan, pe hu mepo ngara karokum kaya harong kaya suwe hilu yi.
20 Pe hu nali wawu pe pisu wawu masih hu topo aripo, ara hu pwanos ndrokololang isa kili wawu yi. Pe hamou-hamou tawawu kipa ndrokololang kiyapolo tahunghung haiyan.
21 Pe Yo Pol, ara uratuluwi nongan para ndrokololang iye, iya nimo mbukeno.
22 O Yapan asa, kapa ndramat hamou ndriyan kinmbulihi Yapan pwi—pwen andre Ngindrai kiten anan!
23 Pahas ta Yapan Yesu ara kiro sura wawu.
24 Pe iyau kili Yesu Kristus, ndriyo ara imbuluhi wawu masih. Ndrokonan.