15
Kristus itine kimat
1 Pe mahapo wawu nali pe pisu, nakurakelehani lohonga wawu kiya nongan hiyan kunpohowei kinsa kili wawu, mepo wawu kanwiriy, pe wawu tora tine pwokeyan iya aliy.
2 Pe iyau nongan hiyan iye kopu, pwen Ngindrai kinsopwat wawu, kapa wawu kapwotisingi nongan mepo kunpohowei pwen kinsa kili wawu. Kapa pwi, lohonga wawu mepo wawu kanpwotisingiy, ara mwaihei o.
3 Paratesah, tesah kunwiriy, ara uikiy isa kili wawu tehe melit mwayih masih: tehe Kristus kinmat, ara iya hu pakut mwomwan torou iho ndruwa hu Nongan Haiyan kanpwai,
4 pe kanroni yiy, pe kinsatine kimat iro mwonen lang royoh, tehe hu Nongan Haiyan kanpwai kanpa,
5 pe Kristus iyarayah iya kili Pita, pwen iya kili hu Songui pe Lumou.
6 Pe iya mulan para aliy, ara iyarayah iya kili hu nalirou pe pisurou hu mepo huramwaitini mayimingat (500) mepo hupwotisingi lohongahu porosih o. Soyon ta hu ara hutopo mwalen ndron, pe hu hayah, ara hu kanmat.
7 Pwen iyarayah iya kili Yamis, pwen iya kili hu aposel masih i.
8 Pe iya ndruwan ta hu masih ara, ara isarayah isa kili yo yi. Pe yo ara pwen tehe tino imwalahiy isato kinto mwonen lenge pwi.
9 Paratesah, yo ara uho mulan masih pe kolso pwi iyata hu aposel, pe kunmwonen para kapohowe yo aposel hamou pwi, paratesah, yo ara upwalngani hu mepo hu ngara karokum ata Ngindrai.
10 Hapeko iya pahas ta Ngindrai, yo urayah yo tesah mahapo. Pe pahas tan isa kili yo ara kinrayah melit o mwaihei pwi. Pwi yoh, yo upombulen pwokeyan iya, iya kili hu masih—hapeko ara yo pwi, ara pahas ta Ngindrai mepo iripo kili yo.
11 Pwen pe konan umbusiy ndre hu humbusiy, nongan iye ko yowu pohowei, pe nongan iye ko ara tesah wawu kanpwotisingi lohonga wawu kinna aliy.
Lohongai para titine ta hu ndramat kanmat
12 Hapeko kapa kanpohowe nongan pwen tehe Kristus ara imat pe Ngindrai kinhingini yiy kintine, pwen pe tehen tapeh pe hayah tawawu torapa hu ndramat kanmat andre kantine paiwe pwi?
13 Pe kapa hu ndramat andre kantine kimat pwi, pwen Kristus, ara Ngindrai kinhingini yiy kintine kimat pwi yi.
14 Pe kapa Kristus Ngindrai kihingini yiy kinsatine pwi, pwen pe nongan yowu topo pohowei ara melit mwaihei o. Pe lohongai ndrisiyon tawawu, ara tehen aliy i.
15 Pe kapa tora, ipwainganiy tehe yowu rayah hu ndramat para pwandrandraman para pwokeyani nongna Ngindrai, paratesah, yowu tiyani titiye ta Ngindrai kinhingini Kristus kinsa tine kimat. Hapeko kapa Ngindrai kinhingini yiy pwi, pwen ndrokonan para aliy, ara hu ndramat kanmat andre hu kantine pwi.
16 Paratesah, kapa hu ndramat kantine kimat pwi, pwen Kristus ara Ngindrai kinhingini yiy kintine kimat pwi yi.
17 Pe kapa Ngindrai kinhingi Kristus kinsa tine pwi, pwen lohongai ndrisiyon tawawu, ara melit o mwaihei; pe hu pakut mwomwan tawawu ara ita ndron i.
18 Pe kapa tora, pwen yihu ndramat mepo hu kanmat, pe hu pwotisingi lohongahu iya kili Kristus, ara andre hu kahapwen o mwaihei.
19 Pe kapa ara para mipwan torou iye, pe lohongarou iya melit hiyan itapo isa ita kili Kristus, pwen hu ndramat masih andre koyu hu kisikirani worou.
20 Hapeko Kristus, ara ndrokonan tehe Ngindrai kinhingini yiy kinsa tine kimat tehe yukyuk sih imu, iya kili yihu mepo kanmat pwen.
21 Paratesah, iyau kili ndramat hamou opu, kimat isa, pwen iyau kili ndramat hamou opu yi, titine kimat isa.
22 Paratesah, iyau kili Atam opu hu ndramat masih humat, pwen iyau kili Kristus opu, hu ndramat masih andre kasa mwalen.
23 Hapeko Kristus mepo tehe yukyuk sih imu, kiro mwonen kimui kisa, ara hu masih hamou-hamou atan mbukenan, ara andre hu kasa tine kimat paiwe.
24 Pwen kiro mwonen lang kiya hapwen, Kristus andre kipwalngani hu pohon para mwomwoyou masih, pe hu pwoke nopwaran, pe andre kiyki kingtom kiya kili Ngindrai mepo Taman.
25 Paratesah, Kristus andre kiro mu ndron tehe king kiro kol pwan, kipoo kimbusi hu masih mepo hu mwisnani yiy kaya pahandra pwelekan.
26 Pe Kristus andre kipwalngani kimat, kiyahapwen para hu melit masih.
27 Paratesah, nongan haiyan ipwai ipa, Ngindrai kiniyki “melit masih ita pahandra ndrikan.” Pe kapa nongan kipa, “melit masih” ara ita pahandran, ara ileu tehe Ngindrai mbukenan ara kinto pahandra Kristus pwi, Ngindrai mepo yiy iyki melit masih ita pahandra Kristus.
28 Pe tandrohonga Ngindrai kimbusiy toro, pwen Norun mbukenan andre kiya pahandran, pe Kristus andre kiro pahandra Ngindrai mepo iyki melit masih iro pahandran, pwen pe Ngindrai, ara andre kiro mu kiya melit masih.
29 Pe kapa hu ndramat andre kantine kimat pwi, pwen hu mepo kanwiri paptais iya kimat andre hu kambusi tesah? Pe kapa hu ndramat kanmat kantine pwi masih, pwen pe hu ndramat tora wiri paptais, ara ndroyin tesah?
30 Pe kapa hu ndramat kanmat andre kantine pwi, pwen paratapeh pe worou mbukenan topo kuni nopwaran iya hu paramwandrai masih.
31 Pe lang masih ngara kukuni nopwaran para kumat kiya aliy—pe ndrokonan tehe usap ngala wawu, paratesah, wawu ro ndruwa Yesu Kristus mepo Yapan torou.
32 Pe kapa kurahatai kiyapolo hu kan puyap para kol Epesus kiya hu lohongai ta ndramat, pwen tesah hiyan andre kuwiriy kiyau aliy eh? Pe kapa hu ndramat kanmat Ngindrai kinhingi hu kantine kimat paiwe pwi, pwen tehe nongan haiyan kinpwai kinpa,
“Kiya tukanamnam pe kayin ndran, paratesah,
moh andre tukamat.”
33 Hu ndramat mbuna hu kapakarawani wawu: “Kapa tuka susuye kiya sura hu ndramat kultuwayi hu mwomwan, ara andre kapwalngani kultuw hiyan torou.”
34 Lohonga wawu kimui kiya tesah hiyan, pe akaitohai para akambusi pakut mwomwan, paratesah, hu ndramat hayah hutora, ara ngara hu kalowani nongna Ngindrai—upwai toro ara para kimbusi wawu kamasi.
Lohongai para nombuwe ndramat mepo kisa tine kimat
35 Hapeko ndramat hamou andre kisok kipa, “Hu ndramat kanmat andre kasa tine paiwe tapeh? Pe nombuwe hu andre kirayah tapeh?”
36 Lohonga wawu pwi! Ndramat hamou ngara kihas peke anandrinai sih, ara andre kimang kimu na, pwen kisa hambunet.
37 Pe kiro mwonen wawu nakahas peke anandrinai sih ndre mbuwakei handra, hapeko ngara akahas peken imwonen, peke wit ndre peke melit handra yi.
38 Hapeko Ngindrai iyki nombuwe hu melit masih mepo hutopo mahapo, ara iro ndruwa namiliwan, pe hu peken handra-handra, ara ma nombuwe hu handra-handra.
39 Nombuwe melit masih kinna wule handra ko, ara pwi: Nombuwe ndramat ara handra, pe nombuwe hu kan ara handra, pe nombuwe hu norukan para wohowoh ara handra, pe nombuwe hu ni ara handra.
40 Pe hu melit para kol paingan yang ara manombuwe hu yi, pe hu melit para kol pwan ara manombuwehu. Hapeko nonowa nombuwe hu melit para kol paingan yang ara handra, pe nonowa nombuwehu melit para kol pwan ara handra.
41 Pe mwandrai ara nonowan handra, pe walah ara nonowan handra, pe hu piriy ara nonowa hu handra, pe hu piriy sih-sih ara nonowa hu kinna wule pwi yi.
42 Pwen tene torako, iya titine tahu ndramat kanmat. Nombuwe ndramat mepo roni, ara andre kihipwen, hapeko nombuwe ndramat mepo andre kisa tine kimat, ara andre kinto-kinto.
43 Pe nombuwe ndramat turoniy, ara konho ranuhuyaniy pwi, hapeko nombuwe ndramat mepo andre kisatine, ara andre karanuhuyaniy. Nombuwe ndramat turoniy ara pwoke pwi, hapeko nombuwe ndramat andre kisatine ara ma pwoke tan.
44 Pe nombuwe ndramat turoniy, ara para kol pwan, hapeko nombuwe ndramat andre kisatine kimat ara ma mwoiwan. Pe kapa ma nombuwe ndramat para kol pwan, pwen ma nombuwe ndramat para mwoiwarou i.
45 Pwayan kinpwai toro: “Ndramat iho mu mepo Atam, ara irayah ndramat hamou mwalen.” Hapeko Atam hamou iho mulan, ara irayah ndramat para kiyki taleh kiya mwoiwa ndramat.
46 Mwoiwa ndramat kinsa imu, ara pwi, hapeko nombuwe ndramat, pwen iya mulan mwoiwa ndramat.
47 Ndramat iho mu, ara Ngindrai imangsani yiy iyau kohu pwan, pe ndramat iho mulan, ara iyau kol paingan yang.
48 Pe yihu mepo para kol pwan ara tehe ndramat mepo mangsani yiy iyau pwan; pe yihu mepo para kol paingan yang, ara tehe yiy mepo iyau kol paingan yang.
49 Pwen mwenserou tehe ndramat para kol pwan, pwen tora ko, andre mwenserou kirayah tehe ndramat para kol paingan yang i.
50 Wawu nali pe pisu, upwai ngawan isa kili wawu, tehe nombuwe ndramat pe ndrai, ndre nombuwehu ndramat mepo andre kimat masih, ara andre kinto mwalen lang masih pwi, pe kinlahiy para kinna nondriya Kingtom ta Ngindrai, ara pwi.
51 Wawu kahalingiy, andre kupwaingani nongan handra kokohon kisa kili wawu: Pe andre worou masih kanmat pwi, hapeko andre Ngindrai kimbusi worou masih tukapiy—
52 pe andre kirayah kindrou pwi ko, tehe mararou ngara kikasi, pe kiro mwonen ndrah para lang kiyapwen kirang. Paratesah, ngasa ndrah andre kiya, pe hu ndramat kanmat andre hu kasatine, pe kanhipwen pwi, pe worou, ara Ngindrai andre kimbusi worou tukapiy.
53 Paratesah, nombuwe ndramat mepo andre kimat, ara andre kipiy pe kirayah nombuwe ndramat mwalen, pe nombuwe ndramat mepo andre kihipwen, ara andre kipiy kirayah nombuwe ndramat mepo andre kinto-kinto.
54 Pe kiro mwonen nombuwe worou mepo andre kimat ara kipiy pe andre kinmat pwi, pe nombuwe worou para kol pwan kirayah ara andre kiro mwalen. Pwen pwayan mepo kinpwai ara andre kirayah manan toro: “Ngindrai ara kintamwaitini kimat.”
55 “O kimat, pwoke tam aleheh?
O kimat, pwoke para pwala tam aleheh?”
56 Paratesah, pwala para kimat ara pakut mwomwan, pe pwoke para pakut mwomwan, ara nongan para pwahanou.
57 Hapeko tukarawuloh kiya kili Ngindrai! Yiy iyki pwoke ta Yapan torou Yesu Kristus isa kiltou, pe worou kantamwaitini kimat.
58 Pwen tora ko, wawu nali pe pisu para nere imwonen, ara wawu koro tine pwokeyan, pe hapesah mbuna kitiwani wawu. Wawu kaiki wawu masih mbukenan kiya mbulya Yapan, paratesah, wawu pahasaniy tehe mbulen wawu tora mbusiy iya kili Yapan, ara andre kinna mwaihei o, ara pwi.