14
Lohongai iman kiro nondriya totohun
1 Pe wawu koro ndruwa sai para ndriya ndramat kimbulihi ndramat, pe ndriya wawu kinamili hu yukyuk ata Mwoiwan Haiyan. Hapeko yukyuk para akawong nongna hu poropet, ara akanamiliy tisingiy.
2 Paratesah, ndramat mepo iwong iya hu nongna kol handra-handra, ara kiniwong kinna kili ndramat pwi, hapeko iya kili Ngindrai. Pe ndrokonan para aliy, kinlahi ndramat hamou lohongan kileu kiya hu nongan ara pwi, hapeko, iro wong iya hu nongan kokohon iyau pwoke ta Mwoiwan Haiyan.
3 Hapeko hu masih mepo ngara kawong nongna hu poropet, ara huwong iya kili hu ndramat para kipwokeyani hu, pe para kimbusi hu karahatini hu, pe para kipomene hu.
4 Pe yiy mepo iwong iya nongna kol handra-handra, ara ipwokeyani yiy mbukenan, hapeko yiy mepo iwong iya nongan para poropet, ara ipwokeyani hu mepo hurokum.
5 Pe unamili para wawu masih kawong kiya nongna kol handra-handra, hapeko unamiliy para wawu kawong kiya nongan para poropet i. Yiy mepo iwong iya nongan para poropet, ara ihohin iyata yiy mepo ngara kiwong nongna kol handra-handra. Pe kipoo hamou kiratiyani ndroiyi nongna kol ara, pwen andre kipwokeyani hu mepo hurokum.
6 Pwen wawu nali pe pisu, kapa kusa kili wawu pe kuwong kiya nongna kol handra-handra, pwen andre kusopwat wawu tapeh, kipoo kuwong hu nongan kokohon, ndre lohongai iman, ndre nongna poropet, ndre nongan para pwahanou kisa kili wawu, pwen ara hiyan, ndre?
7 Pe hu melit mepo mangasahu pe mwoiwa hu pwi, tehe kuwah ndre ndramiy para karai, ara ndramat hamou andre kipahasani ndringe hu tapeh kapa koro rai, kipoo karai pe kahilingi ngasahu, ndre pwi?
8 Pe kapa ndrah para karai ndringen kinileu pwi, pwen hiyeh andre kimwanye yiy para pahun?
9 Pwen wawu ara tehen aliy i. Kapa wawu kawong hu nongan kiya nongna kol handra mepo hu ndramat hu kowu, pwen andre hu ndramat kapahasani tesah wawu tora pwai tapeh? Ara pwen tehe wawuro wong mwaihei o.
10 Pwen matisan hu nongna kol handra-handra, ara soyon, pe hupep hutopo kol pwan, pe masih ara, ara ma ndroiyihu ko.
11 Pe kapa lohongo kinileu kinna nongna ndramat hamou iro wong iya aliy pwi, pwen yo ara urayah tehe ndramat hamou para mawen iya kili ndramat iro wong ara, pe ndramat irowong ara, ara irayah tehe ndramat hamou para mawen isa kili yo.
12 Pwen pe wawu ara tehen aliy i. Wawu namiliy para kawiri hu yukyuk para mwoiwa ndramat, pwen wawu kapwoke para akawiri hu yukyuk para kimbusi hu mepo hu rokum para hu kamandra.
13 Paratesah, ndroiyin aro ko, yiy mepo ngara kiwong kiya nongna kol handra-handra, ara kitohun para hu karatiyani ndroiyi tesah huro pohowei.
14 Paratesah, kapa kutohun kiya nongna kol handra, ara mwoiwo iro tohun, hapeko lohongo ara kinnun o iro.
15 Pwen pe andre kumbusi tesah? Yo andre kutohun kiya mwoiwo, hapeko kutohun kiya lohongai ileu to yi, pe andre kupowaliy kiya mwoiwo, pe kupowaliy kiya hu nongan mepo lohongo ileu iya aliy i.
16 Pe kapa akahari ngala Ngindrai kiya mwoiwa wawu, pwen hamou mepo lohongan kinileu pwi, pe kiro mwele wawu ara andre kipa “Ndrokonan” kiya tawuloh tawawu tapeh, paratesah, ikowu tesah wawuro wong iya aliy.
17 Konan kapa aro rawuloh kiya hiyan iya, hapeko andre kinpwokeyani hu ndramat pwi.
18 Pe urawuloh iya kili Ngindrai tehe ngara kuwong kiya hu nongna kol handra-handra soyon mepo iramwaitini wawu masih.
19 Hapeko nondriya hu ndramat hu rokum, ara unamiliy imwonen para kuwong hu nongan mayimihin mepo ilahi lohonga ndramat kileu kiya aliy, para kisopwat hu hayah, pe mbuna kuwong kiya hu nongan mapusongui (10,000) mepo hukowu iya aliy.
20 Pwen wawu nali pe pisu, akaitohai para akalohonge tehe hu mbunah pe iya kultuw pwassin mepo andre kimbusi wawu tehe malaman. Hapeko lohonga wawu, ara kiro tehe hu ndramat lohongahu iman.
21 Pwayan kinpwai pwen ita Nongan para Pwahanou ipa toro:
Yapan ipa,
“Pe andre kuwong kiya kili hu ndramiro mbukenan,
kiya nongna kol mepo handra masih,
kiyau poho hu ndramat para mawen,
pe andre kuwong kiya kili hu ndramat iye,
pe konan hu kahalingi, hapeko andre hu konto ndruwan pwi.”
22 Pwen pe hu nongna kol handra-handra, ara kaipisa melit handra iya kili hu ndramat hu pwotisingi lohongahu, ara pwi, hapeko ta hu mepo hu kanpwotisingi lohongahu pwi. Pe nongan para nongna hu poropet, ara ata hu ndramat hu kanpwotisingi lohongahu pwi, ara pwi, hapeko tahu ndramat mepo hu pwotisingi lohongahu.
23 Pwen pe kapa hu ndramat masih kene ngara karokum hu kasa rawure hu masih, pe hu kawong kiya hu nongna kol handra-handra, pe hu hayah mepo lohongahu kinileu kinna nongan ara pwi, ndre hu ndramat hayah hu kanpwotisingi lohongahu pwi, pe hu kasa nondriyan, ara andre hu kapa lohonga wawu kinmeu, ndre pwi?
24 Hapeko kapa ndramat hamou kinpwotisingi lohongan pwi, ndre hamou i mepo lohongan kinileu pwi kisa nondriyan kiro mwonen hu ndramat masih hu koro wong kiya nongna hu poropet, ara andre nongna wawu masih kiluwi lohongan tehe yiy ara ndramat hamou pakut tan mwomwan.
25 Pe lohongai masih kokohon ta ndramat ara, ara andre kiro yelan ngawan. Pwen andre kitumbuwe ngundrun pe kitohun kiya kili Ngindrai, kipa, “Ngindrai ara ndrokonan ita mwalinga wawu!”
Sai mwayih para totohun.
26 Pwen pe wawu nali pe pisu, andre tukapa tesah? Kiro mwonen wawu kasa pe kambultere kasa harong, ara wawu masih ma mbulya wawu, hamou ara atan waliy handra, pe hamou ara nongan handra para pwahanou, pe hamou ara atan nongan handra kokohon, pe hamou ara ngara kiwong nongna kol handra-handra, pe hamou ara ngara kirapaiwani ndroiyi nongan. Masih aro, ara kirayah para kipwokeyani hu ndramat hurokum.
27 Pe kapa hamou kiwong kiya nongna kol handra, hilu lumou—ndre hu timou—ara hu kawong, hamou kiwong kimu kihipwen hamou i, pe hamou ara para kirapaiwani nongan.
28 Pe kapa ndramat para rapaiwani nongan pwi, pwen ndramat mepo iro wong iro nondriya hu ndramat hurokum, ara kimun, pe kiwong kiya kili yiy mbukenan pe kiya kili Ngindrai.
29 Pe poropet malmou ndre matimou hu kawong, pe hu hayah ara hu kapirani nokulani tesah hu kanpwai.
30 Pe kapa Ngindrai kiyingani nongan handra kokohon kiya kili ndramat hamou mepo irompwan, kiya ndramat hiyeh ita wong ara, ara kimun.
31 Paratesah, wawu masih ara wawu lahiy para kawong kiya nongna hu poropet, pwen andre ndramat masih kawiri pwahanou pe andre hu koro tine pwokeyan.
32 Pe hu ndramat mepo huwong nongna poropet, ara hu ngara koro pahandra pwoke para namiliwa mwoiwa hu.
33 Paratesah, Ngindrai ara Ngindrai para tasumbuwe pwi, hapeko para ndriya wayis—pe hu ndramat masih ta Yapan, ara tehen aliy i.
34 Pe hu pihin ara hu kamun o hukoro nondriya hu ndramat hu rokum, pe mbuna hu kawong, hapeko hu kaiki hu kaya pwan, tehe Nongan para Pwahanou ngara kipwai.
35 Kapa hu pihin ara hu namiliy para kapahasani ndroiyi nongan handra, kiya hu kasok hu nambuyu hu kiro ndron suwe hu mbukenan, paratesah, andre kiyki masirai kiya kili yiy kapa pihin hamou kiwong kiro nondriya hu ndramat hurokum.
36 Tehen tapeh? Nongna Ngindrai itine iro kili wawu imu, ndre? Ndre wawu ko wawu wiri nongna Ngindrai pe kinna kili hu ndramat hayah pwi, ndre?
37 Pe kapa ndramat hamou kilohonganiy tehe yiy ara poropet hamou, ndre yukyuk ta Mwoiwan Haiyan ita kili yiy, pwen yihu karawuloh kiya tesah urupo ratuluwiy isa kili wawu tehe ara nongna Yapan ipwandrandrahani wawu iya aliy.
38 Hapeko kapa ndramat hamou kindrihisani nongan iye, pwen andre hu ndramat kanyirowe yiy i.
39 Pwen tehen tora ko, wawu nali pe pisu, wawu kanamiliy para akapohowe nongna hu poropet, pe wawu mbuna kasingori hu ndramat para kawong kiya nongna kol handra-handra.
40 Hapeko melit masih, ara akambusiy kiro hiyan o, pe kiro mwonen meresayan.